Theudebert I.

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
Theudebert I.
König im Deilriich Metz
Theodebert I 534 548 king of Metz.jpg
E Goldmünze mt em Bild vom Theudebert I.
Regierigsziit 534-548
Uf d Wält cho zwüsche 495 und 500
Gstorbe Ändi 547 oder Afang 548
Vorgänger Theuderich I.
Dronfolg Lex Salica: Nume Söhn erbe, s Riich wird under de Erbe ufdeilt.
Nochfolger si Sohn Theudebald
Verhürotet mit 1. Deuteria (Konkubine)
2. Wisigard
3. Unbekannt

Dr Theudebert I. (* wohrschiinlig zwüsche 495 und 500, † Ändi 547 oder Afang 548) isch e merowingische König vo de Franke gsi. Er het vo 533 bis zu seinem Dod in däm Riichsdeil gherrscht, wo spöter as Austrasie bezeichnet worden isch, und het z Reims gresidiert.

Läbe[ändere | Quälltäxt bearbeite]

Scho as junge Ma under siim Vater, het dr Theudebert bewiise, ass er e fähige Chrieger siig. Öbbe 516 het er d Armee vom dänische König Chlochilaich, wo ins nördlige Frankeriich iigfalle gsi isch, besigt. Si Ruef isch no grösser worde wäge siine Chriegszüg im Süde gege d Gote.

Noch em Dod vo siim Vater hai em Theudebert siini Unggle, dr Childebert und dr Chlothar, siis Riich welle under sich ufdeile, so wie si s mit däm vom Chlodomer gmacht gha hai, aber dr Theudebert het sich verdeidigt und schliesslig het dr Childebert si Friide mit em gmacht und ihn adoptiert as si Erb. Zsämme hai si dr Chlothar agriffe, aber nochdäm ihri Armee Schade gnoh het im ene Sturm, hai si mit em Friide gmacht. Dä het aber nume churz duurt und dr Theudebert het Gäld vom byzantinische Kaiser Justinian I. übercho, für zum em in siim Kampf gege d Ostgote z Italie z understütze. D Franke hai s Gäld gnoh, si aber mit eignige Ziil uf Italie zoge, wo si s Land usblünderet hai. Schliesslig hai d Byzantiner nit nume gege d Gote sondern au no gege d Franke z kämpfe gha.

Dr Theudebert het ussepolitisch Grosses vorgha. Brief von em zele d Länder uf rings um siis Rich, won er Aspruch druf erhobe het, drunder au byzantinische Bsitz. D Franke hai historisch d Hegemonii vo Ostrom anerkennt gha, aber dr Theudebert het si Unabhängikeit understriche mit allem, won er gmacht het. So het er Goldmünze mit siim eigene Bild lo präge, was e kaiserligs Privileg gsi isch, wo vor ihm vo de Franke akzeptiert worden isch. D Byzantiner hai, noch em Chronist Agathisa, afo vermuete, ass dr Theudebert sogar d Invasion vo Thrazie wurd plane.

Dr Theudebert isch in siim vierzähnte Regierigsjohr (Ändi 547 oder Afang 548) gstorbe, und si Sohn vo dr Gliebte Deuteria, dr Theudebald, isch unagfochte Herrscher worde.

Nit nume berüehmt as Chrieger, isch dr Theudebert vo siine Ziitgenosse für si Understützig vo dr gallische Chille globt worde, so vom Gregor vo Tours, wo mit keim Wort uf siini Undate igoht,[1] und au dr Fortunatus erwähnt si Frömmikeit.

Familie[ändere | Quälltäxt bearbeite]

Wie anderi fränkischi Herrscher au, het dr Theudebert mehreri Fraue gha. Er het sich 531 mit dr Wisigard, dr Dochder vom König vo de Lombarde Wacho, verlobt. Vo 532 bis 637/8 aber het er mit ere verhürotete Galloromanin, dr Deuteria, e Verhältnis gha, wo dr Sohn Theudebald uf d Wält brocht het. Er het se müesse verstosse, wil siini fränkische Chrieger us irgend eme Grund d Deuteria nit hai möge. Denn het er d Wisigard doch no ghürotet. Die isch aber churz druf gstorbe, und dr Theudebert het e Frau ghürotet, wo me dr Name von ere nit weiss. Si hai zsämme e Dochter, d Berthoara, gha.

Fuessnote[ändere | Quälltäxt bearbeite]

  1. Martin Heinzelmann, Christopher Carroll, Gregory of Tours, Cambridge University Press, 2001, S.136