Achille Bonito Oliva

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
Dr Achille Bonito Oliva (Middi) mit em Liedermacher Antonello Venditti (linggs)

Dr Achille Bonito Oliva (* 4. Novämber 1939 z Caggiano, Provinz Salerno) isch en italiänische Kunsthistoriker, Kunstkritiker und Autor und zelt zu de renommiertiste Kunsttheoretiker für Geegewartskunst z Italie. Er het am Ändi vo de 1970er Joor dr Begriff vo dr italiänische Transavantgarde, Transavanguardia, brägt.

Lääbe und Wärk[ändere | Quälltäxt bearbeite]

Dr Achille Bonito Oliva het 1961 in de Rächtswüsseschafte graduiert; denn het er Litratuur mit Schwerpunkt Poetik studiert. In dr Middi vo de 1960er isch er Mitgliid vo dr neoavantgardistische Schriftstellerveräinigung Gruppo 63 gsi. 1967 het er d Lürikbänd Made in Mater und 1968 Fiction Poems uusegee. 1968 isch er uf Rom, won er sich in de Joor druf as Kommentator und Kritiker im Beriich vo dr Geegewartskunst a Naame gmacht het. 1980 het er si vilbeachtets Wärk La Transavanguardia Italiana veröffentligt, wo dr dogmatisch Überbau für die junge Mooler, wo us dr Arte Povera uusechoo si, dr Sandro Chia, Francesco Clemente, Enzo Cucchi oder Mimmo Paladino gliiferet het und sofort uf witeri öiropäischi Künstler, zum Bischbil die Nöije Wilde z Dütschland oder d Figuration Libre z Frankriich beiflusst het. Vom Aafang vo de 1980er het er e Hife Usstellige wie d Aperto 80 organisiert, won er Kurator bi dr 39. Biennale vo Venedig 1980 gsi isch, oder 1982 d Avanguardia transavanguardia z Rom. 1993 het er d Kuratoriumsläitig vo dr 45. Biennale übernoo. 2007 het dr Achille Bonito Oliva Usstellig Transcendental Realism: The Art Of Adi Da Samraj in dr 52. Biennale vo Venedig gläitet.

Dr Achille Bonito Oliva het e Hufe Abhandlige, Essei und Rezepzioone über die avantgardistische Tendänze in dr Kunst verüffentligt und het die epochale Noochwirkige vom Manierismus uf d Estethik vo dr Modärne beschriibe. Für si Wärk het er vili Uszäichnige überchoo, drunder 1991 dr internazionaal Briis für Kunstkritik, Valentino d’Oro.

Zur Zit isch dr Achille Bonito Oliva Brofässer für Zitgenössischi Kunst an dr Sapienza Universidäät vo Rom.

Schrifte[ändere | Quälltäxt bearbeite]

  • Dialoghi d’artista. Incontri con l’arte contemporanea 1970−1984, Electa, Mailand 1984, ISBN 88-435-1072-X (italiänisch, änglisch)
  • Die Ideologie des Verräters. Manieristische Kunst - Kunst des Manierismus. Übersetzig vom Heinz-Georg Held, DuMont, Köln 2001, ISBN 3-7701-5424-X
  • Im Labyrinth der Kunst. Übersetzig vo dr Isolde Eckle, Merve, Berlin 1982, ISBN 3-88396-025-X
  • Italian Transavantagarde. (Original 1980), Giancarlo Politi, Mailand 1992, ISBN 88-7816-038-5 (änglisch)
  • Eingebildete Dialoge. Merve, Berlin 1992, ISBN 978-3-88396-097-5

Weblingg[ändere | Quälltäxt bearbeite]