St. Kolumban vo Luxeuil

De St. Kolumban. Bobbio Abbey.

De St. Kolumban vo Luxeuil (*um 540 z Irland; † 23. November 615 z Bobbio, Italie) isch en irische Wandermönch gsii und ghört zu de erste Missionare vo de Alemane. Er werd au Kolumban vo Bobbio oder Kolumban de Jüngeri gnennt und tar nöd mitem Kolumban vo Iona (521-597) verwechslet were, wo z Schottland missioniert het.

s Lebe

Irland

De Kolumban isch um 540 im irische Landtail Leinster uf d Welt choo. Er isch Mönch wore und isch e Schüeler vom Abt Sinell wore und nochene vom St. Comgall, wo Abt im nordirische Chloster Bangor gsii isch. Spööter isch er de Laiter vo de Chlosterschuel vo Bangor wore.

Luxeuil

Ane 591 isch er mit zwölf Schüeler uufbroche, drunder de St. Gallus, de Comininus, de Domoal, de Equonanus und de Eunocus. Si sind mitem Schiff a d Chüste vo de Bretagne gseglet und hend den vom fränkische König Childibert II. d Uufforderig öbercho, i de Vogese bim Ort Annegray (Dép. Haute-Saône) e Chloster z gründe. Die Gmainschaft isch schnell gwachse und drum hend si 15 km wiiter süüdlich bi Luxovium (Luxeuil) im Jura e nois Chloster gründet und spöter no ais z Fontanae (Fontaine). De Kolumban, wo Abt vo Luxeuil gsii isch, isch under de Gunst vom König Childibert II. gstande. Won er aber dem sin Noofolger, de Theuderich II., kritisiert het, weg sinere Lebeswiis, het er müese noch guet zwanzg Joor sis Chloster im Jura verloo und er isch mit sinene Jünger uf Austrasie zum König Theudebert II. und het e zittli am Königshoof z Metz glebt.

Bregez

Ane 610 isch d Mönchsgmainschaft aber wider loszoge. Si sind vo Metz uf Mainz und denn em Rhii und a de Limet no an Zörisee cho, wo si mitem Schiff uf Tugge gfaare sind. De Ort het em Kolumban gfale und d Missionare hend afange Zele baue. De Gallus het aber im Iifer di haidnische Tempel vo de Iihaimische aazunde. Drufabe hend d Wandermönch müese vo Tugge flüche und sind uf Arbe am Bodesee choo. Vo dai uus sinds mit em Schiff uf Bregez, wo si no im Joor 610 s erscht tütschi Chlooster ggründet hend.

D Biwooner vo Bregez hend aber i de Chile vo de St. Aurelia drai isigi Götterbilder ghaa und die nebetem Christegott vereert. De Gallus het die Statue aber gnoo und in See ine grüert und druf aber het sich e Tail vo de Bivölkerig bichere loo. D Alemane, wo i de Umgebig glebt hend, sind aber no Haide gsii und amene Tag isch de Kolumban anes Bieropfer an Gott Wodan choo und het s Bierfass dör blosses Aapuste zerstört und so d Öberlegehait vo sinere Religioo offebaart. Doch isches mit de Ziit immer mee zu Konflikt mit de Iihaimische choo und im End sind zwee Mönche erschlage wore. De alemannische Herzog Gunzo, wo z Überlinge residiert het, het ene den as Herz glait, s Land z verloo. Dezue isch no choo, as de König Theudbert II., de Bschützer vom Kolumban, vo sim Brüeder Theuderich II., e Find vom Kolumban, umbroocht woren isch. So hend d Mönch Bregez verloo und sind uf Italie. Nume de St. Gallus isch blibe und uf Arbe zrugg, woner im Urwald en Aisidelai ggründet het, am Ort vom spötere Chloster Sanggalle.

Italie

De Kolumban isch mit sinene Jünger uf Italie cho und de Agilulf, de König vo de Langobarde, het em erlobt, bi Bobbio e Chloster z gründe. D Königin Theodelinda het em ghulfe drbii. Z Bobbio isch de Kolumban am 23. November 615 gstorbe.

Um 640 het denn de Mönch Jonas vo Bobbio s Lebe vom St. Kolumban uufgschirbe.

Literatur

• Sancti Columbani Opera. Ed. by G.S.M. Walker: The Dublin Institute for Advanced Studies, 1970.

Weblinks

 Commons: Kolumban vo Luxeuil – Sammlig vo Multimediadateie