Raurakische Republik

Us der alemannische Wikipedia, der freie Dialäkt-Enzyklopedy
Hops zue: Navigation, Suech
S Fürstbistum Basel im 18. Johrhundert
Dialäkt: Baseldütsch

Die Raurakischi Republik bzw. Raurachischi Republik (franz. République rauracienne) isch e Dochderrepublik gsi, wo am 17. Dezämber 1792 under em Iifluss vo dr Französische Revolution us de Gebiet vom Fürstbistum Basel, wo zum Riich ghört hai, errichtet worden isch. Si isch am 23. Merz 1793 ufglöst und in die Französischi Republik iigliideret worde.

Dr Name bezieht sich uf e keltisch Stamm vo de Rauriker, wo in dr Antike am südlige Oberrhii gläbt het.

Gschicht[ändere | Quälltäxt bearbeite]

Gstützt uf s Verdeidigungsbündnis vo 1780 vom Fürstbistum Basel mit Frankriich hai französischi Druppe, wo dr Erst Koalitionschrieg agfange gha het, im April 1792 die nördlige Deil vom Fürstbistum, wo zum Dütsche Riich ghört hai, bsetzt. Die südlige Gebiet vo La Neuveville, Montagne de Diesse, Biel, Erguel und Moutier und au Montsevelier si under em Schutz vo dr Eidgenosseschaft gstande und si nit bsetzt worde.

Wo die Französischi Republik im Septämber 1792 usfrüeft worden isch, isch s zu Unruhe im Fürstbistum und zur Bildig vo revolutionäre Gremie cho. Am 17. Dezämber isch die Raurakischi Republik als ersti Dochderrepublik vo dr französische proklamiert worde. Zwei Nationalversammlige si gschiiteret, e dritti het sich under em Druck vo Frankriich für en Aaschluss an die Französischi Republik entschlosse. Am 23. Merz 1793 isch die Raurakischi Republik ufglöst und as Département du Mont Terrible Deil vo Frankriich worde. Im Friide vo Campo Formio am Ändi vo 1797 si die südlige Deil vom Fürstbistum, wo nid bsetzt gsi si, no zum Département cho. Scho 1800 isch s aber in s Département Haut-Rhin integriert worde.

Mit em Ändi vo dr napoleonische Herrschaft in Europa het me en Anwort müesse finde, wäm die ehemolige fürstbischöflige Gebiet sötte ghöre. 1813 si d Koalitionsdruppe iimarschiert, aber s Département isch im erste Pariser Friide no bi Frankriich bliibe. Der Wiener Kongräss het denn am 20. Merz 1815 beschlosse, si dr Schwiiz aazschliesse und se uf d Kantön Bärn und Basel z verdeile.

Symbol[ändere | Quälltäxt bearbeite]

Die Raurakischi Republik het – im Gegesatz zu andere französische Dochderrepublike – in ihrer churze Existänz kei eigeni Nationalflagge iigfüehrt. Es isch aber bekannt, ass e Staatswappe aagnoh worden isch. Das het im Wäsentlige us em römische Liktorebündel bestande, wie me s au hüte no im Siigel vo Frankriich findet.

Dr Kanton Jura as Nochfolger vo dr Raurakische Republik[ändere | Quälltäxt bearbeite]

1979 isch dr Kanton Jura proklamiert worde. Er umschliesst die meiste ehemolige Riichsdeil vom Fürstbistum Basel und luegt uf die Raurakischi Republik as Vorläufer.

Weblingg[ändere | Quälltäxt bearbeite]

Dä Artikel basiert uff ere fräie Übersetzig vu dere Version vum Artikel „Raurakische_Republik“ vu de dütsche Wikipedia.

E Liste vu de Autore un Versione isch do z finde.