Tochterrepublik

Us der alemannische Wikipedia, der freie Dialäkt-Enzyklopedy
Hops zue: Navigation, Suech
Champignons républicains (republikanischi d. h. revolutionäri Champignons), französischi Karikatur, um 1799. – D Monarche vo Europa si vom ene Meer vo neue Republike umgee, wo wie Bilz us em Bode schiesse: In dr Midi die grossi französischi Mueterrepublik, um si ume chliineri Dochderrepublike.

Dochderrepublike, mänggisch au Schwösterrepublike, si Staate gsi, wo noch dr französische Revolution vo 1792 aa errichdet worde si und Verfassige noch em revolutionäre französische Vorbild gha hai. Si si hüfig noch ere diräkte militärischi Intervention entstande, wo französischi Druppe lokali Revoluzzer understützt hai.

Die meiste Dochderrepublike si erst noch dr jakobinische Phase vo dr Französische Revolution 1793–1794 entstande, und ihr Schiggsal isch äng mit dr Karriere vom Napoléon Bonaparte noch 1796 verbunde gsi, vor allem mit siinen Erfolg im Italiefäldzug. Dr ideologisch Hindergrund vo dr Verbreitig vo de revolutionäre Ideä isch nie ganz verschwunde, aber militärstrategischi Überlegige, wo d Bildig vo fründlige Pufferstaate de Gränze vo Frankriich nooch si vo grösster Bedütig gsi. Das gseht me dra, ass dr Napoleon nit nume Dochderrepublike errichdet het sondern je spöter immer meh au Monarchie, wie 1801 s Königriich Etrurie, 1805 s Königriich Italie wo die Italiänischi Republik abglöst het, 1806 s Königriich Holland as Noochfolgerstaat vo dr Batavische Republik, 1806 s Königriich Neapel, s Herzogtum Warschau (vo 1807–1815), s Königriich Spanie under em Joseph Bonaparte, die dütsche Staate, wo alli under em Iifluss vom Napoleon gstande si, bsundrigs d Staate vom Rhiibund – vor allem die drei napoleonische «Musterstaate», s Königriich Westphale, s Grossherzogdum Frankfurt und s Grossherzogdum Bärg.

Umvollständigi Liste vo Dochterrepublike[ändere | Quälltäxt bearbeite]

1790 isch vo Revolutionäre in de Östriichische Niiderlande d Republik vo de „Vereinigte Belgische Staate“ errichdet worde, wo denn aber unterdruggt worden isch. Spöter si under andere die Republike errichdet worde

Anderi Republike si blant gsi, wie dr Tellgau oder Helvetie, aber nid–oder in ere andere Form–errichdet worde wie die Rhodanischi Republik, wo schlussändlig numme us em Wallis bestande het.