Die Fischerin vom Bodensee

Filmdate
Orginalplakat
Orginaltitel:	Die Fischerin vom Bodensee
Produktionsland:	Deutschland
Erschinigsjoor:	1956
Längi (PAL-DVD):	90 Minute
Orginalsprooch:	Deitsch
Altersfreigaab:	FSK 6
Stab
Regie:	Harald Reinl
Drehbuech:	Karl Heinz Busse, Harald Reinl
Produktion:	Ernst Neubach
Musig:	Ralph Maria Siegel, Franz Winkler
Kamera:	Ernst W. Kalinke
Schnitt:	Lieselotte Prattes
Bsetzig
D Marianne Hold als Maria Gassl (Titlroll) Dr Gerhard Riedmann als Hans Bruckberger Annie Rosar als Stefanie Bruckberger, em Hans sei Muadr Dr Joe Stöckel als Karl Bruckberger, dr Môô vo dr Voriga Dr Josef Egger als dr Maria ihr Großvaddr Dr Loisl Blank als Loisl Dr Rudolf Bernhard als Anton Schweizer D Isa Günther als deam sei Dechtrle Anny D Jutta Günther dera ihr Zwillengsschweschtr Fanny

Dialäkt: Schwäbisch

Die Fischerin vom Bodensee isch a deitscher Hoimetfilm vom Regisseur Harald Reinl. D Ennaufnahma send em ARRI-Atelier z Mincha dreht worra, d Ussaufnahma am Bodasee, ond zwar z Meersburg, z Friidrichshafa, en Hagnau ond en Ondruhldenga. S erscht Mol ens Kino komma isch der Film am 24. Juli 1956 em Universum-Theatr en Stuegert.

Handlong

Dr Frialeng helt Eizug am Bodasee. Wia jeda Dag fehrt au heit wiidr d Maria Gassl mit em Loisl, ama kloina Bua aus dr Nochbrschaft, zom Fischa uf da See naus. Wia se grad ihre Netz ausglegt hot, saust a Modorschbortboot drher. Des gheert de Schweizer Zwillengsmädla Anny ond Fanny. Dia machet sich wiidr mol an Schbass draus, d Maria zo ergra, weil se dui fir hochnäsig haldet, ond fahret middla durch dera ihr Fischrnetz. Drom braucht mr sich et wondra, dass dr Maria ihr Fang zemlich mickrig ausfellt. Ond wia se des Wenige, wo se gfanga hot, uf em Markt en Bregenz (fir d Kenner: sella Szene isch am Haafa vo Meersburg uffgnomma worra) vorkaufa will, folgt de negschd bees Iborraschong: Koinr kauft-ra was aa, weil se dr reich Fischzichtr Bruckberger ruiniira will ond seine Fisch zo-ma viil niidrigora Preis foilbiadet, wo sui sich abr et leischda kôô.

D Maria leabt alloi em Haus mit ihrem Graußvaddr. Se kôô sich wedr an ihr Muadr noh an ihrn Vaddr erennra. Dr alde Gassl ischt arg vorschuldet. Drom hot’r vor, sei Fischreireacht fir a Nôsawassr an da Bruckberger zo vorkaufa. Deam sei Jongr, dr Hans, hot scho lang a Aug uf dui scheena Maria gworfa ond dät se gern heirada. Wia dr Hans heert, was dia Schweizr Zwillengsmädla mit dr Maria gmacht hend, wäscht’r deane zwoi grendlich da Kopf, ond en dr Naacht fillt’r hälenga dr Maria ihre Netz mit lautr Fisch vo seim Vaddr seira Zucht. D Maria isch abr et uf da Kopf gfalla ond merkt glei, weam se dui Wohltat zo vrdangga hot. Se goht zom Hans Bruckberger ond fordret en uf, r soll jô glei wiidr sei Almosa zrucknemma. Wia se abr hoimkommt, hot ihr Graußvaddr dia Bruckberger-Fisch scho vorkauft ond mit-em Erlees seine Schulda beglicha. Jetzt siiht d Maria bloß noh oin Ausweag, om em Hans s Geld fir e Fisch geaba zo kenna: Se vorkauft ihr alda wertvolla Tracht zo ma guada Preis. Wia se nôô em Hans s Geld brenga will, kommt’s endlich zo-ra vorsehnlicha Ausschbrôôch zwischa deane zwoi Sturkepf.

Dr alde Bruckberger ischt scho seit Johr ond Dag mit dem Direktr Anton Schweizer aus dr Schweiz, deam Vaddr vo de Zwilleng Anny ond Fanny, befreindet ond wenscht sich nix sehnlichr, als dass sei Soh amol oine vo deane Mädla heirada dät. Wiidr amol hot a nuier Monat oogfanga, ond dô trifft sich emmr dr alde Bruckberger mit em Schweizer bei-ma Stammdisch en Eschtreich zo-ra Sauftour. Weil abr dr Bruckberger arg ondr dr Fuchtl vo seim Weib stoht, wo d Haushaltskass vorwaldet, discht’r dera a schees Märle uf, om seine Ausfliig plausibl zo macha: Er häb em Nochbrland a ooehelichs Kend, ond des dät emmr am Monatsôfang uf d Alimende warda. Desmol abr haldet’s dia zwoi Schwereneedr bsondrs lang beim Stammdisch aus. D Sonn goht scho uf, wia dr Bruckberger hoimkommt. Sei Stefanie ischt außr sich ond will endlich wissa, wer sei Kend ischt. Do druf fellt em Bruckberger nix Bessrs ei, wia d Maria Gassl als sei ooehelichs Kend auszgäa.

Wia dr jong Bruckberger dui Nochricht heert, trifft-en fascht dr Schlag, weil’r jetzt glaubt, r hett sich en sei oigna Schwestr vorliabt. S dauret abr et lang, bis der Schwendl vo seim Vaddr ans Liacht kommt.

Z Meersburg fendet s jährliche grauße Trachdafescht statt. Des will dr Hans Bruckberger zom Ôlass nemma, sich en äller Effentlichkeit mit dr Maria zo vorloba. Dui abr ischt neanets zo fenda. Ihr Graußvaddr moint, se häb Angscht, dr Hans kennt an ihrer ooglärda Vorgangaheit Ôôstoß nemma. Sofort stirzt sich dr Hans en de Schweizer-Zwilleng ihr Schbortboot ond suacht da ganza See ab. Uf deam Insele, wo-nr erscht kirzlich sei erschda Liibesnacht mit dr Maria vorbroocht hot, fendet’r se schliaßlech.

Zruck en Meersburg stellt sich durch nan Zuafall raus, dass dr Direktr Schweizer et bloß dr Vaddr vo deane Zwillengsmädla ischt, sondern au dr Vaddr vo dr Maria Gassl. Weil dr alde Bruckberger scho emmr gwenscht hot, dr Schwiigrvaddr vo-ma Dechtrle vo seim Schweizer Freind zo werra, stoht jetzt ara Vorlobong zwischa dr Maria ond em Hans nix meh em Weag.

Musig

Des Liad, wo em Film da Nôma gäa hot, isch sechs Johr eldr als dr Film selbr ond en de 1950er-Johr em deitscha Schbroochroom a saumäßig erfolgreicher Schlagr gwäa. Sowohl dr Tekscht wia au d Musig hot dr Franz Winkler (1906 bis 1962) 1950 gschriiba. De erschde viir Zeila laudet

Die Fischerin vom Bodensee
ist eine schöne Maid juchhe,
ist eine schöne Maid juchhe,
die Fischerin vom Bodensee ...

Neaba deam Hauptschlager kommet nomol zwoi Liadr vor, wo schbeziell fir dean Film vom Ralph Maria Siegel (1911 bis 1972) komboniirt ond vom Ernst Neubach (1900 bis 1968) tekschdet worra send:

Ohne Dich kann ich nicht leben,
ohne Dich kann ich nicht sein!
Ohne Dich da treib ich eben
wie ein Boot auf dem Meere allein ...

ond

Im Himmel gibt’s kein Bier –
drum trinken wir es hier!
Denn sind wir nicht mehr hier –
dann trinken die andern unser Bier ...

Als Gsangsgrubba hend en deam Film Das Sunshine-Quartett ond Das Blank-Trio mitgwirkt.

Bsundere Kulisse

Bsunders am Aafang und Ende vum Film isch die Kulisse vu Meerschburg us de Mitte vum 20. Jahrhundert feschtghalte worre. Es fallet uff d Musikkapelle us de Länder rund um de Bodesee, d Trachteträgerinne mit ihrene fein gwirkte Goldhaube und es Schlussbild vu de Lage vu Meerschburg am Steilabfall mit de Oberstadt und de Unterstadt.

Schbroch und Kultur

Sterend a deam Film ischt – zomendescht fir d Zuaschauer aus-em alemannischa Schbrochroom –, dass’r oim vorgauklet, em deitscha ond em estreichischa Doil vom Bodasee dätet d Leit fascht bloß boirisch schwätza. Älle Hauptrolla – außr dera vom Anton Schweizer – send mit Persona bsetzt, wo entwedr Eschtreicher (abr koine Vorarlberger) odr Boira odr zomendescht en so-nem Schbrochroom ufgwachsa send ond des oin au meh odr wenigr stark an ihrer Ausschbroch heera lend.

De Film bringt aber au an d Oberfläch, das d Bwohner vu all de Länder um de See e gmeinsame Natur- und Heimatverbundeheit hond und sich freundschaftlich bgegnet und ungzwunge mitenand schwätzet. So wie dett im Film d Ehre verteidigt wird, so eigebrödlerisch und ohne Mitgfühl, dees isch fir uns im 21. Johrhundert nur no schwer zu verstande.

Kritik

S Lexikon des internationalen Films (Bd. 2 en dr Ausgab vo 1988) moint, es dät sich om-an märchen- ond kolportaschehafda Hoimetfilm mit luschdige ond rihrselige Zuatada handla.

Litradur

S Programm zom Film (Verlag Das neue Filmprogramm GmbH, Firma Heinrich Klemmer, Mannheim)

Weblink

• Die Fischerin vom Bodensee in dr Internet Movie Database
• Die Fischerin vom Bodensee bei deutscher-tonfilm.de
• Die Fischerin vom Bodensee bei Filmportal.de