Antikenmuseum Basel

Us der alemannische Wikipedia, der freie Dialäkt-Enzyklopedy
Hops zue: Navigation, Suech
S Antikemuseum Basel d und Sammlig Ludwig (Berri-Wohnhüüser)
Dialäkt: Baseldütsch

S Antikemuseum Basel und d Sammlig Ludwig z Basel widme sich usschliesslig dr antike Kunst und Kultur vom Mittelmeerruum. S Antikemuseum ghöört zu de Kulturgüeter vo nazionaaler Bedütig.

D Sammlig[ändere | Quälltäxt bearbeite]

S Museum isch s einzige in dr Schwiiz, wo usschliesslig antiki Kunst und Kultur vom Middelmeerruum zeigt und versammlet altägyptischi, griechischi, etruskischi, römischi und vorderasiatischi Objekt. Die si vom 4. Johrduusig v. Chr. bis ins 6. Johrhundert n. Chr. entstande. S Schwergwicht isch uf dr Periode vo 1000 v. Chr. bis 300 n. Chr. Wäsentligi Beständ bilde die altägyptischi Abdeilig und d Sammlig vo griechische Vase und Skulpture. Bsundrigi Akzänt setze d Bronzestatuette, d Terrakotte und dr Goldschmuck.

Zum Antikenmuseum ghört au d Skulpturhalle Basel mit Gipsabgüss vo antike Skulpture und vom Parthenon-Fries.

S Museum[ändere | Quälltäxt bearbeite]

D Hindersiite mit em Oberliechtsaal-Aabau

S Antikemuseum stoht gegenüber em Kunstmuseum Basel und isch s jüngste vo de staatlige Museä vo Basel. Antiki Objekt hai scho zum Urbestand vo dr öffentlige Basler Museumssammlig gehört, wo 1661 mit em Chauf vom Amerbachkabinett entstanden isch. D Antikesammlig isch allerdings nid bsundrigs bedütend gsi und isch au wenig pflägt worde. No bis zum Aafang vom 20. Johrhundert het mä d Gipsabgüss, wo mä e Hufe drvo kauft het, meh beachdet, und zerst im neue Museum an dr Augustinergass, vo 1887 aa im ene eigene Usstelligsruum in dr Kunsthalle Basel zeigt worde si. D Beständ vo dr originale antike Kunst si 1894 zwüschen em Historische Museum (antiki Chliikunst und Münze) und em Kunstmuseum (Grossplastike) ufdeilt worde. Die meiste vo de öbbe zweiduusig Objekt si im Lager bliibe, d Skulpturehalle het mä 1927 zuedoo.

D Konzentration vo de Objekt, wo sit em Ändi vom 19. Johrhundert verstreut gsi si, im ene eigene Huus isch 1961 mit dr Gründig vom Antikemuseum bassiert. Das isch möglig worde dank bedütende Gäld- und Sammligsgschänk. Drei Vierdel vom Usgstellte isch us privatem Bsitz cho. S Antikemuseum isch 1966 im ene klassizistische Wohnhuus vom Melchior Berri us de 1820er Johr und eme modärne Oberliechtsaal eröffnet worde. D Schänkig 1981 von dr Antikesammlig vom Peter Ludwig het zum Aaschluss vom e Gebäud näbedra gfüehrt, wo au vom Berri und us dr gliiche Zit isch, und zur Neueröffnig 1986 under em Name «Antikemuseum Basel und Sammlig Ludwig». Die letzte bedütende Erwiitrige si 2001 gmacht worde mit dr permanänte Ägyptenabdeilig im ene eigene Saal under em Innehof und 2002 mit dr Abdeilig «Orient, Zypere und früehs Griechenland».

Leitig[ändere | Quälltäxt bearbeite]

Zur Zit (2010) isch dr Peter Blome Diräkter vom Museum.

Lueg au[ändere | Quälltäxt bearbeite]

Litratur[ändere | Quälltäxt bearbeite]

  • Annemarie Monteil: Basler Museen. Birkhäuser Verlag, Basel 1977, S. 78–82, ISBN 3-7643-0945-8

Weblingg[ändere | Quälltäxt bearbeite]

47.5543797.593251Koordinate: 47° 33′ 15,8″ N, 7° 35′ 35,7″ O; CH1903: 611639 / 267085