Skulpturhalle Basel

D Skulpturhalle Baasel isch e Museum für Abgüss vo antike Plastike und Skulpture an dr Middlere Strooss 17 in dr Schwizer Stadt Baasel. Si isch äins vo de Baasler Kulturgüeter, wo nazionaali Bedütig häi.

D Sammlig[ändere | Quälltäxt bearbeite]

D Sammlig het öbbe 2000 Abgüss und isch nit nume die grössti in dr Schwiz, sondern isch äini vo de bedütendste uf dr ganze Wält. In de letschte 25 Joor het sich dr Bestand vo Abgüss verdreifacht. D Verwaltig vo dr Sammlig isch sit 1961 em Antikemuseum Baasel understellt.

Mit dr Sammlig het mä 1830 aagfange und si het sich vo 1849 aa im Museum an dr Augustinergass befunde, wo denn grad eröffnet worde isch und hüte dr Standort vom Naturhistorische Museum und vom Museum vo de Kulture isch. 1887 isch si in d Baasler Kunsthalle züüglet, wo mä bsundrigs für si e Flügelbau as „Skulpturehalle“ baut het. 1927 het mä d Abgüss in dr Kunsthalle in s Laager doo, wil die staatlig Bildersammlig in s Geböid iinechoo isch und dr Blatz gfeelt het, zum d Skulpture z zäige. 1936 isch e Nöibaubrojekt in ere Volksabstimmig abgleent worde, und vier Joor druf het mä denn für d Abguss-Sammlig brovisorisch e Blatz in ere Fabrik gfunde, wo leer gstande isch. Zum Nöibau isch s erst 1963 choo.

D Abgüss mache s mööglig, Däil vo Wärk, wo über verschideni Museum verströit si, wider zämmezfüere und so ganzi antiki Wärk z rekonstruiere. Uf dr ganze Wält äimoolig isch s „Parthenonbrojekt“, wo mä drfür Abgüss vo alle erhaltene Räst vo dr Bauplastik vom Athener Parthenontämpel gmacht het. Si si jetz eso usgstellt, ass mä dr ursprünglig Zämmehang cha gsee. Es het au e Serie vo Archidekturmodäll im Maassstaab 1:20, wo d Usstellig ergänze.

Dr Läiter vo dr Skulpturhalle isch zur Zit (2010) dr Tomas Lochman, e Sohn vom Jan Milič Lochman.