Zum Inhalt springen

Trias (Religion)

Us der alemannische Wikipedia, der freie Dialäkt-Enzyklopedy
di Kapitolinischi Trias vo Palestrina

E Trias oder Triade (us altgriechτριάς, triás „Draizaal“, im Plural: τριάδες, triádes) bizaichnet i Religione e Gruppe vo drai Gotthaite oder mythische Wese, wo en engeri Gruppe bildet. Die drai Gotthaite chönnt us drai Gstaalte bistoo, wö nöd bsundrigs differenzeiert sind und mee as e Gruppe wörke tüend, wie d Schicksalgöttine, nämmli under anderem d Moire bi de Grieche, d Parze bi de Römer und d Norne bi de Nordgermaane. E Trias chan o us drai wichtige Gotthaite bistoo, so wie bi de Römer id kapitolinischi Trias, wo usem Jupiter, us de Juno und us de Minerva bistoot. Di hinduistischi Trimurti („Draigstalt“) bistoot us de drai Hoptgotthaite Brahma, Vishnu und Shiva. En anderi Form vonnere Trias bildet di christlichi Draifaltigkait usem Vatter, Soo und em hailige Gaist.

Hethiter & Hurriter[ändere | Quälltäxt bearbeite]

Im Aalte Riich (17. bis 15. Jh. v.Chr.) fo de Hethiter hend im offizielle Staatskult de Wettergott, d Sunegöttin vo Arinna und d Schutzgotthait vo Ḫattusa e Trias bildet. Die sind uursprüngli hattischi Gotthaite gsii. Bi de Hurriter het d Göttin Sauska zäme mit de baide Tiennerine Ninatta und Kulitta e festi Trias bildet.

Grieche & Röömmer[ändere | Quälltäxt bearbeite]

I de griechische Mythologii chömed meriri Draiergruppe vor, so sind d Moire, d Hore oder d Charite jewills e Gruppe us drai Göttinne gsii. Wichtig isch di apollinischi Trias gsii, wo us em Apollon, de Artemis und de Leto, d Mutter fo dene beede, bistande hett. Bi de Röömer hend ursprünglich de Jupiter, de Mars und de Quirinus di staatlichi Trias bildet, und di drai Priester vo dene, d Flamines maiores, hend groosse Iifluss ghaa. Spööter isch die älteri Trias dör di Kapitolinischi Trias ersetzt wore, wo de Jupiter, d Juno und d Minerva dezue ghört hend. En anderi wichitgi Trias bi de Röömmer hend di drai Fruchtbarkaitsgotthaite Ceres, Liber und Libera bildet.

Germane[ändere | Quälltäxt bearbeite]

Bi de Germane sind verschidnigi Triade guet bizüügt. Weered de Römerzitt sind so vor alem im Piet fo de germanische Tungrer im Henderland vo Köln verschidnigi lokaali Matroone vereert wore, wo us jewils drai Fraue bistande hend. Die hend as e Gruppe e Name ghaa. Im früene Mittelalter wered im Sächsische Taufglöbnis d Götter Wodan, Thunaer und Saxnote gnennt, wo e noi bikeerte Christ hett müesse abschwööre. I de nordische Mythologie sind meriri Triade bikannt. So agieret i de nordische Saage hüüffig de Odin, de Thor und de Loki zäme.

Anderi Gruppe[ändere | Quälltäxt bearbeite]

I de verschidnige Mythologie sind nöd nume Draiergruppe vorchoo. Typisch sind ono Zwaier-, Sibner-, Nüünner- und Zwölfergruppe.

  • Zwaiergruppe sind hüüfig Gschwüsterti, villfach Zwilling, wie di griechische Dioskure oder di röömische Stadtgründer Romulus und Remus oder d Alcis bi de germanische Naharnavale. Mengsmool sinds o en Eltertail und e Chind, wie d Demeter und d Kore i de griechische Mythologii.
  • Sibnergruppe sind nöd ase hüüffig. Z Mesopotamie und bi de Hethiter sind d Sebettu („di Sibe“) vereert wore. Die hend chöne benevolent oder malevolent sii. D Inder hend di Sibe Waise gchennt, wo mythischi Wese gsii sind.
  • Nüünnergruppe sind recht verbraitet. So hend di ägyptische Gotthaite Isis und Osiris zo de Nüühait vo Heliopolis ghört. Us de griechische Mythologii em bikanntiste sind woll di nüü Muse. I de nordische Mythologii het de Meergott Ägir nüü Töchtere ghaa und de Gott Heimdall nüü Müettere.
  • Zwölfergruppe sind o zimmli verbraitet. D Hethiter hend so di „zwölf Götter vo de Weggablig“ kennt, wo mitem Tootekult i Verbindig gstande sind. Im aalte Griecheland und bi de Röömmer sind verschidnigi Zwölfergruppe mee s Resultaat vonnere systematische Theologii gsii, wie di zwölf Titane oder ganz allgimain d Zwölfgötter, wo spööter mit de Olympier gliichgsetzt wore sind.
  • anderi Gruppe: Im Hinduismus wered mengisch „di 33 Götter“ gnennt; zo denen ghööred di wichtigste Gotthaite, die Zaal isch aber mee symbolisch z verstoo. Kai aigetlichi Gruppe sind die „tuusig Götter vom Land Ḫatti“ bi de Hethiter. Mit dem Uusdrugg sind aifach ali Gotthaite zäme gmaint. Tatsächlich sind mee as tuusig Götternäme us de hethitische Literatuur bikannt.

Lueg no[ändere | Quälltäxt bearbeite]