Stäinebärg
| Dialäkt: Baseldütsch |
Dr Stäinebärg isch e wichdigi Verkeersaadere in dr Baasler Innestadt. Er goot vom Bankveräin bis zum Barfüesserblatz.
D Bauwärk
[ändere | Quälltäxt bearbeite]Am Stäinebärg stöön zwäi wichdigi baaslerischi Kulturinstituzioone, s Stadtcasino mit em Muusigsaal an dr Nummere 14 und d Kunsthalle am Stäinebärg 7. Au dr Theaterblatz mit em Fasnachtsbrunne lit am Stäinebärg, dört won emol s Stadttheater gstande isch, und wisawii an dr Nummere 4 isch en anders Kulturguet, s erste Baasler Schuelhuus, wo as e Schuelhuus konzipiert worde isch und wo hüte Däil vom Historische Museum isch, und oobe am Bankveräin befindet sich dr Schilthoof, wo dr Johann Jakob Stehlin dr Elter 1842 baut het.
Gschicht
[ändere | Quälltäxt bearbeite]
Linggs am alte Stadtgraabe isch s Innere Aeschedoor. Dört öbbe het dr Stäinebärg aagfange und isch dusse dr Stadtmuure nooch bärgab bis zum Eseldurm bim Barfi gange.
Dr Stäinebärg isch im früeje 19. Joorhundert en attraktive Ort zum Baue worde. 1820 si dr Eseldurm und dr Wasserdurm abgrisse und im Joor druf isch dr inneri Stadtgraabe ufgfüllt worde. S Stadtcasino isch 1826 in Bedriib gnoo worde. Aber no 1846 het mä nonig ganz uf s Middelalter chönne verzichte und non emol e stedtischs Kaufhuus baut, wo aber schon e Generazioon spööter em Muusigsaal het müese Blatz mache. Drfür het dr Siidebandfabrikant Forcart e guete Blick gha, für was sich loont. Er het dr Root überzügt, ass es Zit sig, zum Vordäil vo dr Stadt s innere Äschedoor lo abrisse, und het sich druf vom Johann Jakob Stehlin em Eltere dört oobe am Egge zur Freije Strooss e Residänz lo baue.
Wo mä in dr Middi vom 19. Joorhundert alli Stadtmuure abgrisse het, het dr Stäinebärg e zentrale Blatz bote, wo d Baasler Bürgerschaft iiri kulturelle Aspirazioone het chönne erfülle. Dr Archidekt Johann Jakob Stehlin dr Jünger het s Usgsee vo dr Strooss in groossem Maas brägt. 1872 het er mit dr Kunsthalle dr bildende Kunst e Häim gee, 1873–1875 het er e vierrängigs Barock-Geböid für s Stadttheater baut, und dr Konzärtsaal vom Stadtcasino 1876.
Die siibe Dramlinie, wo sit 1894, wo die ersti von ene baut worde isch,[2] über e Stäinebärg füere, häi de Muusigliebhaber im Konzärtsaal immer wider e chli d Fröid an dr Muusig verdorbe mit iirem Rattere.
Fuessnoote
[ändere | Quälltäxt bearbeite]- ↑
Die ganz Aasicht vo dr Stadt Baasel vom Matthäus Merian em Eltere vo 1642.
- ↑ Meier: Basel in der guten alten Zeit: Von den Anfängen der Photographie (um 1856) bis zum Ersten Weltkrieg, Springer-Verlag 2013, S. 197
Koordinate: 47° 33′ 14,4″ N, 7° 35′ 24,7″ O; CH1903: 611410 / 267042