Seebuck
| Seebuck | ||
|---|---|---|
 Seebuck vom Südoschte | ||
| Hechi | 1.448,2 m ü. NHN | |
| Lag | Baddè-Württèbärg, Dütschland | |
| Gebirg | Schwarzwald | |
| Dominanz | 0,65 km | |
| Schartehechi | 29 m ↓ Grüble | |
| Geografischi Lag | 47° 51′ 52″ N, 8° 1′ 20″ O | |
| ||
| Bsunderheite | Fèldbärgturm (Uusichtsturm) | |
.JPG)
Dè Seebuck isch èn 1.448,2 m ü. NHN[1] hochè Buckel vom Fèldbärg-Massyv un isch, noch em Baldeweger Buck, dè dritthögschte Bärg im Schwarzwald. Er lyt wiè s Fèldbärg-Massyv im Zèntrum vo Südbaddè un im südweschtlichè Eggè vo Baddè-Württèbärg (Dütschland).
Geography
[ändere | Quälltäxt bearbeite]Dè baumfreye Gipfel vom Seebuck lyt im Hochschwarzwald 1,7 Kilometer südöschtlich vom Fèldbärg-Hauptgipfel (wo au dè Högschte heissè duèt), beidi sin durch è flachi Muldè (Grüble odder Fèldbärgsattel) vonènand drènnt; d Schartèhöchi bedrait lediglich 29 m.
Diè steil abbè keièndi Nordoschtsitè vom Seebuck isch Deil von èrè Karwand vom Fèldseechessel. Am Fuß vo dè Wand lyt dè Fèldsee, wo von è baar Quèllbächle a dè Oschtflankè vom Seebuck hèr gschpisè wörd, abber nu ein Abfluss, dè Seebach, hèt. Dè Seebach entwässerèt s Fèldbärg-Massyv bis in Titisee iè, un gòt nõch èm Titisee als Guètach un zämmè mit dè Haslach spôter als Wuètè bis in Hochrhy abbè. Diè gschwendèti Südoschtsitè vom Bärg wörd als Winterschportgebièt bruucht un ghört nit zum umgäbbendè Nadurschutzgebièt Fèldbärg. In Volängerung zum Winterschportgebièt lyt am Fuèß vom Seebuck s Dorf Fèldbärg, è baar Meter unnè draa isch Passhöchi vom Fèldbärg. Am Südfuèß vom Seebuck, è bitzeli unterhalb vo dè Passhöchi, lyt d Quällè vo dè Menzèschwander Alb. D Oschtsitè vom Seebuck zeigt sich vom Seebachdal un dõdemit vom Titisee als Èrschts, wè-mò vo Titisee-Neuschtadt dehèr chunnt, un wörd deshalb öfter als Gsicht vom Fèldbärg-Massyv wòòr gnõ. Am Fuèß vo dè Seebuck-Weschthaaldè gòt d Fèldbärg-Passschtrõß i s Fahler Loch abbè un denn witer uff Todtnau im Obberè Wisèdal. D Nordhaaldè vom Seebuck ordnet sich ganz im Högschtè unter.
Tourismus
[ändere | Quälltäxt bearbeite]Fèldbärgturm
[ändere | Quälltäxt bearbeite]Uff èm Seebuck lyt dè Fèldbärgturm, èn ehemòligè Funkturm, wo als Uussichtsturm diènt un sit 2013 è Schinkèmuseum behèrbärgè duèt.[2] I dè Summermonät cha im högschtglegènè Trauzimmer vo Baddè-Württèbärg im 11. Stock vom Turm ghürõtet wörrè.[3]
Summer
[ändere | Quälltäxt bearbeite]Dè Bärg isch è belièbts Zyl für Uusflügler. Dè Parkblatz bzw. s Parkhuus am Fuèß vom Seebuck isch Uusgangspungt für zaalrychi Wanderungè uff diè Bärgruggè (Richtung Fèldbärg, Stübbèwasè un Notschrei, uff dè Dote Maa un uff s Herzogèhorn odder gu Hinterzartè), wo i dè Nôchi ligèd bzw. i diè aagränzendè Täler (Menzèschwander Dal, Wisèdal, St. Willelmer Dal, Zaschtler Dal). Dè "Felsèwäg", wo am Steilhang vom Gipfelberych zum Fèldsee abbè gòt, isch nu für drittsicheri Wanderer mit feschtem Schuèwärch geignèt, biètet abber è abwechslungsrychi Wègfüürung un Uusbligg uff dè Fèldsee, wo i dè Dǜèfi unnè lyt.
Winterschport
[ändere | Quälltäxt bearbeite]Näbbè Wanderwäg, Radwäg un Schneeschuèroutè biètet er èn Huufè Winterschportmöglichkeitè. Uff èm Seebuck git s diversi Schiipischtè mit unterschydlichè Schwirigkeitsgraad für Aafänger un Fortgschritteni. Füüf Lift erleichterèd dè Uffschtyg. Im Einzelnè sin sèll – vom Parkblatz uus gsää – vo rächts nõch links: èn ältèrè Zweier-Sessellift (am Waldrand am nordöschtlichè Ènd vo dè Pischtè), èn modernè Sechser-Sessellift mit Wètterschutz un èn Dellerschlepplift. Sit èm Winter 2005/2006 chönnèd Pischtèfaarer übber è hölzerni Skibrugg uff d Pischtè südlich vo dè Passschtrõß B 317 wechslè, ooni s Winterschportgräät abzschnallè un d Passschtrõß z Fuèß übberquerè z müèsè. Èn wittèrè Sechser-Sessellift mit Abdegghuubè, d Zeigerbaan, schafft sit Dezembèr 2015 è diräkti Liftvobindung zwǜschè Grafèmatt un Seebuck un ersetzt dè Zeigerschlepplift.[4] Bi uusreichender Schneehöchi wörd èn Funpark ygrichtet, wo vor allem Snowboarder akrobatischi Sprüng üèbè chönnèd. Dört hèn vom 17. bis 19. März 2006 diè Dütschè Snowboard-Meischterschaftè stattgfundé.[5]
Dè 6er-Sessellift wörd im Summer mit Kabinè uusgrüschtet, wo 8 Lüt iè gön. I dè Talschtation vo dè Baan git s näbbè Garagè für Pischtèraupè un Motoorschlittè, dè technischè Yrichtungè un Sanidäraalaagè au Kassè, èn Schiservice un è Sanidätsruum vo dè Bärgwacht Schwarzwald. Unterhalb vom aaltè Fèrnseedurm unterhaaltèt d Bärgwacht Fryburg d Bärgrettungswache Fèldbärg-Seebuck. Diè högscht Bärgrettungswache vo Baddè-Württèbärg isch a Wuchèèndè un Fyrtig toujours bsetzt un isch für dè Bärgrettungsdiènscht am Seebuck un im Fèldbärggebièt zuèschtändig.
Am Fuèß vom Seebuck, gegèübber vom großè Hotelkomplèx Fèldbärger Hof, git s sit 2006 d „Freestyle-Rundi Fèldbärg“, è 1,7 km langi Loipè (klassisch un Skating, lycht). Durch d Südflankè vom Seebuck volauft au d Vobindungsloipè vom Fèldbärger Hof zué dè Todtnauer Hüttè un zuè dè Stübèwasèschpur (Deil vom Fèrnschiwanderwäg Schonach–Belchè, klassisch un Skating, schwèr).
Am 9. Dezembèr 2015 isch am südöschtlichè Fuèß vom Seebuck è Parkhuus mit 1200 Blätz ygweyt worrè. Sèll isch mit 1300 Meter s högschtglègeni Parkhuus z Dütschland. Dè Bau von èm Parkhuus isch umschtrittè gsi; im Johr 2006 hèt d Bevölkerung vo dè Gmeind Feldbärg in èm Bürgerentscheid dèfür gschtimmt.[6] Schu im Johr 2010 isch am Seebuck è knappi halbi Million in Schneekanonè inveschtyrt worrè,[7] im Hèrbscht 2014 hèt dè Fèldbärger Gmeindrõt zuèdèm èn Uffdraag übber Geländemodelyrungsmaßnaamè für 125.000 EUR vogää, um Furchè, Dällè un Kantè vo aaltè Quèrwäg, Wasserleitungè sowiè füchti Stellè vo aaltè Drainagè am Seebuck wèg machè z lõ, un dõdemit s Beschneiè sowiè s Präpòryrè vo dè Pischtè zuèkümpftig z erlychtèrè.[8]
Zämmèfassend wörd klar, dass a dè Seebuckhaaldè diè ganz Infraschtruktur für dè Tourismus am Fèldbärgmassyv aaglait worrè isch, wôrend diè beidè höcherè Büggel, dè Högschte un dè Baldèwäger Buck als Naturschönheitè (vom Sendemascht uff èm Högschtè èmòl abgsää) glänzèd.
Kultur
[ändere | Quälltäxt bearbeite]
Im Gipfelberych vom Seebuck am Rand vom Fèldseechessel isch è Bismarckdenkmòl us Bruchschtei baut worrè. Am Bismarckdenkmòl isch è Bildnismedaillon aabrocht. S Denkmòl isch zwǜschè 1895 un 1896 vom Fridolin Diètsche gschaffè worrè.[9] Gossè worrè isch s Relièf vom Wilhelm Pelargus z Stuègètt, diè èrscht Skizzè stammt vom Karlsruèr Professor Karl Gagel (1861–1916).[10][11] Zuè dè Yweyung am 4. Oktobèr 1896 hèt s Komitee für s Uffschtellè vom Denkmòl im Otto vo Bismarck è Telegramm gschickt. Sini Antwort isch i dè Fryburger Ziting abdruggt worrè:
„Ich bin sehr dankbar für die hohe Ehre, die mir mit der Errichtung des Denkmals gerade auf dem Feldberge erwiesen wird und habe aus früheren Besuchen des schönen badischen Landes die anschauliche Erinnerung des Schwarzwalds.“
Diè Feierlichkeitè sèlber sin mit èm Feschtbankett am Vorõbèd sowiè nèm offizièllè Feschtèssè am Daag vo dè Eröffnung zelebryrt. Um dè Aaschturm an Feschtgäscht z begegnè, hèt uff dè Höllèdalbaan èn Sonderzug vo Fryburg nõch Titisee vokeert.[13]
Ab Septembèr 2009 isch s Denkmòl sanyrt worrè, nõchdèmm sèll zletscht elf Johr dèvor schu mòl gmacht worrè isch.[14]
Am Rand vom großè Parkblatz am Fuèß vom Seebuck (bim Fèldbärger Hof) isch è Naturschutzzèntrum für dè Südschwarzwald baut worrè, s Natur-Huus. È bitzeli unnè draa lyt obberhalb vo dè Passschtrõß diè högschtglègèni Kirchè vo Dütschland: Diè katholischi Pfarrkirchè Verklärung Christi.
Weblingg
[ändere | Quälltäxt bearbeite]
Commons: Seebuck – Sammlig vo Multimediadateie- Fèldbärgturm mit Schinkèmuseum uf feldbergbahn.de
Einzelnõchwys
[ändere | Quälltäxt bearbeite]- ↑ Chartedienst vom Bundesamt für Naturschutz
- ↑ Schwarzwälder Schinkenmuseum. feldbergbahn.de, archiviert vom Original am 19. Dezember 2015; abgruefen am 3. Dezember 2015.
- ↑ Feldberg: Ringwechsel im högschtè Standesamt vo Baddè-Württèbärg (Memento vom 12. Augschte 2017 im Internet Archive) uff dè Websitè vo dè Schwarzwald Tourismus GmbH
- ↑ Zeigerbaan (Memento vom 14. Oktober 2017 im Internet Archive) uff skiresort.de
- ↑ Snowboard: Tolle Titelkämpfe (Site cha nüme abgrüeft wärde; Suche im Webarchiv) , suedkurier.de, 20. März 2006, abgruèfè am 9. März 2013
- ↑ Große Investitionen, aber der Schnee fehlt (Memento vom 5. März 2016 im Internet Archive) Stimme.de, abgruèfè am 24. Dezembèr 2015.
- ↑ Feldberg: 500 000 Euro für d Beschneiung. Badischi Ziting, 14. September 2010, archiviert vom Original am 28. November 2016; abgruefen am 27. November 2016.
- ↑ Ralf Morys: Kosmetik: Seebuckhang: Gelände wird für 125.000 Euro modelliert. Badischi Ziting, 27. September 2014, archiviert vom Original am 28. November 2016; abgruefen am 27. November 2016.
- ↑ Heinz Schmitt (Hrsg.): Denkmäler, Brunnen und Freiplastiken in Karlsruhe 1715–1945. 2 Ufflaag, Voöffentlichungè vom Karlsruèr Stadtarchiv 7, Karlsruè 1989, ISBN 3-7617-0264-7
- ↑ karlsruhe.de: Geschichte: Künstler Karl Gagel vor 150 Jahren geboren (Memento vom 19. Dezämber 2016 im Internet Archive), Stadtziting vom 18. Februar 2011, Zuègriff am 17. Juli 2011
- ↑ Artikel i dè Fryburger Ziting vom 6. Oktobèr 1896, Zuègriff am 17. Juli 2011
- ↑ Fryburger Ziting vom 7. Oktobèr 1896, Zuègriff am 30. Dezembèr 2010
- ↑ Aakündigung i dè Fryburger Ziting vom 2. Oktobèr 1896, Zuègriff am 8. Januar 2011
- ↑ badische-zeitung.de: Fèldbärg: Kein Bligg uff Bismarck (Memento vom 2. Dezämber 2016 im Internet Archive), 26. Septembèr 2009, Zuègriff am 30. Mai 2010
|
Dä Artikel basiert uff ere fräie Übersetzig vu dere Version vum Artikel „Seebuck“ vu de dütsche Wikipedia. E Liste vu de Autore un Versione isch do z finde. |