Seebrugg

Us der alemannische Wikipedia, der freie Dialäkt-Enzyklopedy
Uussicht vom Baanhof Seebrugg übber dè Schluchsee in Richtig Aha.
Strandbad Seebrugg

Seebrugg isch èn Wyler i dè Gemeind Schluchsee im Nadurpark Süèdschwarzwald. Er lyt uff 935 m übber Seehöchi am öschtlichè End vom Schluchsee nõch bi dè Staumuer vom Schluchseewärk, wo nebbè sinèrè Funktion als Stromerzüüger au èn turistischè Aazièhigspunkt isch. Seebrugg isch èn guètè Uusgangspunkt für Wanderungè i sellem Gebièt. È Jugendherberg büètet Übernachtigsmöglichkeitè für Wanderer un anderi Gäscht.

Gschichtè[ändere | Quälltäxt bearbeite]

Seebrugg isch während èm Beschtõ vo dè Landgrõfschaft Stüèlingè dè weschtlichschte Èndpunkt vo sellem Herrschaftsgebièt gsi.[1] Im Johr 1795 hèt dè Wyler 9 katholischi Ywooner ghaa, un isch asè a s Kloschter z Bläsy vokauft worrè. Sèlli Hèrrè hèn z Seebrugg è großi Wǜrtschaft un è großi Zehntschüèr baut, beidi sin bim Uffschtauè vom Schluuchsee i sèllèm untergangè.

Der überschtaute früèere See mit èm Hochmoor Feldmoos

Dè Bau vo dè Staumuèr, welli 1933 färtig gsi isch, hèt è yschnydends Ereignis für Seebrugg dargschtellt. Gmääß èm Ortsnamè muè vor èm Uffschtauè vom Ursee è Brugg a dèrè Schtell übber d Schwarza exischtyrt haa. S Niveau vom See isch nadürlich vo Ursee bis zum hütigè Stausee um ca. 30 Metèr gschtygè, wa immer au èn Landverluscht im Uferberych zur Folgi hèt. Im Zweitè Weltchrièg hèt sich z Seebrugg s Luftwaffèhälfer-Uusbildigslager Seebrugg befundè, wo dè Schüèler durch diè 3. lychte Flakabteilung 932 zu nèm Luftwaffèhälfer uusbildet worrè isch. Zuèdemm hèt diè FLAK-Abdeilig d Staumuèr vor Düèfflièger schützè söllè.[2]

Im Johr 1957 isch z Seebrugg è Strandbad mit Bademeischter un Voleih vo Ruèder- un Drèttböötli sowiè èn Kiosk ygrichtet worrè. Sit èm 1. Juli 1971 isch Seebrugg zämmè mit sim Gmeindehauptort Fuulèfürscht nõch dè Schluuchsee ygmeindet worrè. Schu dèvor isch Seebrugg also nit sèlbschtändig gsi, sondern a Fuulèfürscht aaghängt gsi.

Vokeer[ändere | Quälltäxt bearbeite]

Baanhofsgebäude
Roothuus-Wagongs z Seebrugg

Z Seebrugg zweigt vo dè B 500 diè L170 ab, welli gu Bõõdorf füürt. Z Seebrugg endet ußerdemm dè 32 Kilometèr langi Färnschiiwanderwäg Hinterzartè-Schluchsee.

Dè Baanhof Seebrugg isch Èndstation vo dè Dreiseèbaan, welli tagsüber im Stundètakt faarè duèt un s gsamti Feriègebièt um dè Schluchsee mit Titisee un Fryburg vobindè duèt.

Seebrugg isch früèner èn wichtigè Baanhof für dè Güèterumschlaag vo dè Badischè Staatsbrauerei Roothuus gsi, woraa hüt zwei Güterwagongs am Ènd vo dè Dreiseèbaan erinneret. Nöchdèmm s uff dè Dreiseèbaan kein Fernvokeer, sondern nu no Regionalvokeer gää hèt, sin diè umfangrychè Gleisaalaagè öschtlich vom EG nimmi für dè Personèvokeer gnutzt worrè. Des hèt au demit z duè ka, dass diè Dütsche Baan uff Wendezüüg gsetzt hèt. Im Regelbetrièb stoot s Deckigssignaal vor èm Abschtellgleisfäld uff Halt (Hp0).

Deckigslichtsignaal vom Baanhof Seebrugg. Für alli Regelzüüg dè öschtlichi Èndpunkt vo dè Dreiseèbaan.

Sit 2008 residyrt dè Ysèbaanvoein IG 3-Seèbaan e. V. uff sellem Abschtellgleisfäld. Nõchdem im Johr 2010 èn Wasserkranè z Seebrugg montyrt worrè isch, wörred ab 2013 d Gleisaalaagè im Baanhof sanyrt, um è Ysèbaanmuseum mit Museumsbetrièb z Seebrugg z etablyrè.[3]

Einzelnöchwys[ändere | Quälltäxt bearbeite]

  1. Hiroto Oka: Der Bauernkrieg in der Landgrafschaft Stühlingen und seine Vorgeschichte seit der Mitte des 15. Jahrhunderts. Hartung-Gorre, Konstanz 1998, ISBN 3-89649-312-4
  2. Friedbert Zapf: Schluchsee: Wo aus Oberschülern Flakhelfer wurden (Memento vom 24. Septämber 2015 im Internet Archive), Badische Zeitung, 5. April 2013, abgerufen am 7. Mai 2013
  3. Sebastian Barthmes: Schluchsee: IG Dreiseenbahn will Gleise sanieren (Memento vom 5. März 2014 im Internet Archive), Badische Zeitung, 9. Dezember 2010, Zugriff am 11. Juni 2011

Koordinate: 47° 48′ 3,7″ N, 8° 11′ 46″ O

Dä Artikel basiert uff ere fräie Übersetzig vum Artikel „Seebrugg“ vu de dütsche Wikipedia. E Liste vu de Autore un Versione isch do z finde.