Die Schwizerische Rhiihääfe

Us der alemannische Wikipedia, der freie Dialäkt-Enzyklopedy
Konteinerhaafe Chläihünige
Dialäkt: Baseldütsch

Die Schwizerische Rhiihääfe (früener: d Rhiihäafe vo bäide Baasel) ligen em Rhii nooch in de bäide Kantöön Baasel-Stadt und Baasel-Landschaft. Die Binnehäafe si äini vo de wichdigste Dräischiibe vom Import und Export vo dr Schwiz.

D Freihäit vo dr Schiffaart uf em Rhii, wo vom aargauische Rhiifälde bis Rotterdam schiffbar isch, wird vo dr Mannheimer Akte vom 17. Oktober 1868 garantiert. Eso het d Schwiz e diräkte Zuegang zum Meer, wo völkerrächtlig garantiert isch. Sit 1992 cha mä per Schiff über e Main-Donau-Kanal au Ungarn und Südeuropa erräiche.

D Rhiihääfe[ändere | Quälltäxt bearbeite]

Über die drei Rhiihääfe in dr Region Baasel si, vo dr Mängi us, 2009 10 Brozänt vom gsamte Ussehandel vo dr Schwiz abgwigglet worde, und 30 bis 40 Brozänt vom jöörlige Mineralölverbruuch vo dr Schwiz wird über Liiferige über d Rhiihääfe abdeggt.

Rhiiabwärts git s die Hääfe:

Dr Auhafe Muttez[ändere | Quälltäxt bearbeite]

Dr Haafe vo Birsfälde, im Hindergrund dr Muttezer Auhaafe

Dr Auhafe lit uf dr lingge Rhiisite im Kanton Basel-Landschaft, isch e Däil vo de Birsfälder Haafenaalaage, befindet sich aber uf em Gmäindigebiet vo Muttez. Er isch zwüsche 1937 und 1940 baut worde und mä het en sithäär e baar mol erwiteret. Im Auhaafe wärde bsundrigs flüssigi Driib- und Brennstoff umgschlaage und glaageret, aber au Schweerguet, Spiisööl, Dünger, Doonärde und Geträid.

Dr Rhiihaafe Birsfälde[ändere | Quälltäxt bearbeite]

Dr Haafe Birsfälde lit uf dr lingge Rhiisite im Kanton Baasel-Landschaft und befindet sich im Gmäindigebiet vo Birsfälde. Er isch zwüsche 1937 und 1940 baut und sithär e baar mol erwiteret worde. Dä Haafe is uf en Umschlaag und d Laagerig vo flüssige Driib- und Brennstoff und vo Drochegüeter spezialisiert.

Dr Rhiihaafe Chläihünige[ändere | Quälltäxt bearbeite]

Ussicht vom Silodurm im Haafe Chläihünige in Richdig Norde zum Dreiländeregge

Dr Rhiihaafe Chläihünige, mänggisch säit men em au Rhiihaafe Klybeck-Chläihünige, lit im Baasler Woonviertel Chläihünige uf dr Chläibaasler, d. h. dr rächte, Rhiisite bim Dreiländeregge Schwiz/Dütschland/Frankriich. Dr Haafe bestoot us de bäide Haafebecki I und II und eme Umcheerbecki. Chläihünige het drei Konteinerterminal und verschiideni Silo und Tanklaager. Näbe Konteiner wärde hauptsächlig Drochegüeter wie Staal, Aluminium, Buntmetall und flüssigi Stoff umgschlaage.

Am 2. August 1922 isch s Haafebecki I eröffnet worde. Bis 1924 het mä d Kranaalaage und d Geböid für d Reedereie baut und vo 1936 bis 1939 isch s Haafebecki II.

Uf em Silodurm (s Bernoullisilo, wo 1923 vom Archidekt Hans Bernoulli baut worde isch) het s e Ussischtsblattform, wo s Publikum uufe cha, und vo dört cha mä dr ganz Haafe bschaue. Zämme mit dr Usstellig Verkehrsdrehscheibe Schweiz und unser Weg zum Meer und em Dreiländeregge isch dr Chläihüniger Rhiihaafe e beliebts Ziil für Schuelräise und Usflüüg.

Chläihünige isch dr Sitz vo dr Rheinschifffahrts- und Patentprüfungsbehörde und dr Häimethaafe vo dr Baasler Personeschiffaart. Baasel isch sit em 9. April 1941 dr offizielli Häimet- und Registerhaafe vo dr schwizerische Hochseeschifffaart.

Daate vo de Schwizerische Rhiihääfe[ändere | Quälltäxt bearbeite]

  • Flechi 1,3 km²
  • Umschlaagspotenzial vo gege 15 Mio. Donne Güeter im Joor
  • Umsatz vo 6,5 Mio. Donne (2010)
  • 100 km Baangläis
  • 7 km Keelengi
  • Silo für im Ganze 385'000 m³ Geträid
  • 80'000 m³ sunstigi Schüttguetlaager
  • Tanklaager für 1'250'000 m³ Flüssigguet
  • 250'000 m² deckti Laager
  • 200'000 m² offeni Laager (Konteinerterminaal)
  • 60 Krään wo zwüschen 5 und 400 Donne chönne lüpfe

D Veräinigung vo de Rhiihäafe[ändere | Quälltäxt bearbeite]

Bi ere Abstimmig zum Rhiihaafeverdraag het s Baselbieter Stimmvolk mit ere Meerhäit vo 81 Brozänt d Voorlaag aagnoo, ass dr Baaselbieter und dr Baasler Rhiihaafe sölle zämmegläit wärde.

Dank däm Rhiihaafeverdraag und dr Usgliiderig us de kantonale Verwaltige het d Vorussetzig existiert für en integrierti Vermarktig und optimierti Nutzig vo de Haafenareal. As öffentlig-rächtligi Aastalt häi die Schwizerische Rhiihääfe dr Handligsspiilruum überchoo, wo si bruche, zum im internazionale Wettbewärb - gegenüber de Hääfe im Ruhrgebiet und au gegenüber dr Iisebaan - z bestoo. Si chönne d Haafenareal flexibler usnütze, und Schwankige bim Export/Import wärde besser verdäilt und ufgfange. Das het langfristig d Erdraagschraft gsicheret und mä rächnet mit ere hööchere Wärtschöpfig.

D Zuekumft vo de Rhiihääfe[ändere | Quälltäxt bearbeite]

Im Haafe Chläihünige wird s in de zuekümftige Joorzäänt grösseri ruumblaanerischi Verändrige gee. D Haafenaalaage an de Rhiiuferlaage (Klybeck- und Westkee) sölle middelfristig nöije Nutzige Blatz mache. D Vorussetzig dodrfür isch aber, ass mä für d Logistikaalaage, wo höte dört sin, nöiji Standort cha finde.[1]

Mee as nume en Ersatzstandort isch s nöije Konteinerterminaal uf em Areal "Basel Nord", wo mit eme dritte Haafebecki söll an Rhii aabunde wärde. Das isch e Gmäinschaftsbrojekt vo de Schwizerische Rhiihääfe und vo SBB Cargo. Es isch en Antwort uf d Usbaublään vo de Seehääfe - drunder bsundrigs dr Usbau vo de Konteinerkapazidääte in dr Rotterdamer Maasvlakte 2. Verschiideni Prognoose göön drvo us, ass mit deene Kapazidäätserwiterige dr Konteinerverkeer für d Schwiz säll esi verdobblet wärde. Im Terminaal Basel Nord sölle jedes Joor bis zu 200'000 Konteiner umgschlaage wärde. (Zum Vergliich: Hüt wärde in de Schwizerische Rhiihääfe jeedes Joor 100'000 Konteiner verlaade.) S Projekt söll bis 2018 umgsetzt wärde.[2][3]

Weblingg[ändere | Quälltäxt bearbeite]

Fuessnoote[ändere | Quälltäxt bearbeite]

  1. Archivierte Kopie. Archiviert vom Original am 1. Januar 2013; abgruefen am 3. Mai 2014.
  2. http://portof.ch/de/aktuelles/terminal-basel-nord.php (Site cha nüme abgrüeft wärde; Suche im Webarchiv)[1] [2] Vorlage:Toter Link/portof.ch
  3. Archivierte Kopie. Archiviert vom Original am 26. April 2012; abgruefen am 3. Mai 2014.