Samuel Preiswerk

Dialäkt: Baseldütsch

Dr Samuel Briiswärk (* 19. Septämber 1799 z Rümlige; † 13. Januar 1871 z Baasel) isch e reformierte Baasler Theoloog, Pfarrer und Dichder vo Kiirchelieder gsi.

Biografii

Dr Samuel Briiswärk isch dr Soon vom Pfarrer Alexander Briiswärk und dr Anna Maria gebooreni Buurget gsi. Er het z Baasel, z Tübinge und denn z Erlange studiert. Dört isch er im Winter-Semester 1821/22 Mitgliid vo dr Erlanger Burscheschaft worde. 1822 het er e Vikariat z Biel-Bänke übernoo. Zwäi Joor spööter isch er Pfarrer am Baasler Waisehuus worde und 1828 Leerer am Missionshuus. Scho in dere Zit het er Kiirchelieder afo schriibe, und die häi en spööter über d Gränze äwäg bekannt gmacht. Im Joor 1830 isch er z Muttez Pfarrer worde. Aber wo sich vo 1832 aa dr Komflikt zwüsche dr Stadt und em Land Baasel het afo ufhäize, het dr Briiwärk sich gwäigeret, revoluzioonsfründligi Gebät z sääge, und isch si Boste wider loos gsi. 1834 isch er z Gämf Leerer an dr Theologische Schuel vo dr Evangelische Gsellschaft worde. Dört isch si hebräischi Grammatik uusechoo, won er uf Franzöösisch verfasst het und wo uf vier Uflaage cho isch. Wil er sini Kontakt zu Verdräter vom katholisch-apostolische Irvingianismus nit het welle ufgee, het er d Gsellschaft 1837 verloo. Er isch uf Baasel und isch 1839 Dozänt für Hebräisch und s Alte Testamänt worde und 1840 Pfarrer vo dr Lienerdskiirche. Vo 1859 aa isch er dr Pfarrer vo dr Münstergmäind gsi, und isch Antist und Vorsteher vom stedtische Kiirche- und Schuelwääse worde. Z Baasel het er vo 1838 bis 1843 d Zitschrift Das Morgenland. Altes und Neues für Freunde der Heiligen Schrift uusegee und het din Bropaganda gmacht für e jüüdischi Häimet in Palestina. 1860 het en d Uniwersidäät Baasel zum Eeredokter vo dr Theologii gmacht.

Wärk (Uswaal)

• Grammaire hébraïque précédé d'un précis historique sur la langue hébraïque
• Paradigmes du verbe parfait, des verbes imparfaits et des noms de la langue hébraïque, extraits de la grammaire hébraïque
• Die Sach ist dein, Herr Jesu Christ (1829; MG 427)

Litratuur

• Jacob Burckhardt: Einsegnungsrede für Samuel Preiswerk in: Die Einsegung des Herrn Samuel Preiswerk (1845).
• Hans Fritzsche: Samuel Preiswerk. In: Biographisch-Bibliographisches Kirchenlexikon (BBKL). Band 7, Herzberg 1994, ISBN 3-88309-048-4, Sp. 923–925.
• Peter A. Preiswerk: Preiswerk, Samuel. In: Historisches Lexikon vo dr Schwiiz.
• unbekannter Autor: Preiswerk, Samuel. In: Allgemeine Deutsche Biographie (ADB). Band 26, Duncker & Humblot, Leipzig 1888, S. 552.

Fuessnoote

Dä Artikel basiert uff ere fräie Übersetzig vum Artikel „Samuel_Preiswerk“ vu de dütsche Wikipedia. E Liste vu de Autore un Versione isch do z finde.