Peter Offenburg

Us der alemannische Wikipedia, der freie Dialäkt-Enzyklopedy
Dialäkt: Baseldütsch

Dr Peter Offeburg (* 18. Merz 1458 z Baasel, † 4. Dezämber 1514 z Baasel) isch e Baasler Politiker gsi.

Lääbe[ändere | Quälltäxt bearbeite]

Dr Peter Offeburg isch as Soon vom Junker und Baasler Rootsherr und Herr vo Schaueburg Peter (oder Petermann) Offeburg und dr Agnes vo Laufe uf d Wält choo. Er isch en Änkel vom Oberstzumftmäister Henman Offeburg gsi.

Dr Peter Offeburg het 1477 d Juliana vo Schöneburg ghürootet und in zwäiter Ee e Schwöster vom Ludwig Kilchmann. 1481 het dr Offeburg dr Zoll vo Augst as Lääche bechoo. Zwüsche 1486 und 1494 het er as Landvogt vo Baasel uf dr Farnsburg amtiert. 1488 het er as Hauptmaa d Baasler Drubbe aagfüert, wo vom Kaiser Friedrich III. für e Zuug gege Flandere ufbote worde si. Ab 1495 isch er as Achtburger im Baasler Root gsässe. 1496 isch er Ooberstzumftmäister worde und 1501 zum Statthalter vom Bürgermäister gweelt worde. Won er denn 1501 zum Ridder gschlaage worde isch, het er au zum Bürgermäister chönne gweelt wärde und er het vo 1502 bis 1514 mit em Wilhelm Zeigler in däm Amt abgwäggslet, äi Joor dr äint und denn äi Joor dr ander. Er het im Root d Bardei aagfüert, wo sich für e Verbindig mit de Äidgenosse iigsetzt het und dr Biidritt vo 1495 aa vorberäitet het. Wo dr Schwoobechrieg 1499 mit em Friide z Basel beändet worde isch, isch s eso wit gsi, und dr Offeburg het 1501 im Naame vo Baasel dr Bund beschwoore.

Kwelle[ändere | Quälltäxt bearbeite]