Achtburger

Us der alemannische Wikipedia, der freie Dialäkt-Enzyklopedy
Dialäkt: Baseldütsch

D Achtburger si in dr Stadt Basel im spoote Middelalter e Grubbe vo acht nitaadlige Patrizier gsi, wo sit 1212 im Root vo dr Stadt Basel gsässe si.

Zerst si d Achtburger äifach Bankiee und Kauflüt gsi, wo riich und wirtschaftlig und au bolitisch iiflussriich gsi si. Wo dr Iifluss vo de Zümft vom 14. Joorhundert aa gwaggse isch, het sich au d Stellig vo de Achtburger veränderet. D Zümft häi Verdräter im Root vo dr Stadt überchoo und d Achtburger, wo scho e Zit lang vorhär im Root gsi si, si gsellschaftlig no hööcher ufgstiige. Si si vo denn aa e Däil vom Patriziat gsi, wo vorhär nume Aadligi drzueghört häi, und häi sich sälber as Junker afo bezäichne. Gliichzitig het sich d Grubbe vo de Achtburger bolitisch ufgspaltet: e Däil häi mit em Aadel sümpathisiert, wo sich uf Östriich orientiert het, anderi häi d Zümft understützt, wo in dr Stadt immer mächtiger worde si.

Achtburger het nume chönne wärde, wär gnueg Gäld ghaa het, zum e standesgmässes Lääbe chönne z füere. Usserdäm het en Achtburger im 15. Joorhundert vo äinere vo de drei patrizische Drinkstuube müesse ufgnoo wärde, wo zämme as hoochi Stuube bekannt gsi si. Zu deene häi die bäide sogenannte oobere Stuube ghöört, d Gsellschaftsstuube zum Brunne und d Gsellschaftsstuube zur Mugge und d Gsellschaftsstuube zum Süfze.[1]

Noch dr Abschaffig vo de patrizische Briwilegie im Joor 1515 und dr Reformazioon si die mäiste Achtburger und Aadlige, wo no katholisch gsi si, usgwanderet. 1521 häi d Patrizier im Root zää vo iire zwölf Sitz verloore. Dr letscht Achtburger isch bis 1545 im Root gsässe. Die bäide patrizische Rootssitz si vo denn aa umbsetzt bliibe, au wenn si formaal nit abgschafft worde si.

Käins vo de Gschlächter vo de ehemoolige Achtburger isch hüte no z Basel aasässig.

Litratuur[ändere | Quälltäxt bearbeite]

  • Alioth, Barth, Huber: Basler Stadtgeschichte. Bd. 2. Basel 1981.

Fuessnoote[ändere | Quälltäxt bearbeite]

  1. Peter Ochs, Geschichte der Stadt und Landschaft Basel, Erster Band, 1819.
Dä Artikel basiert uff ere fräie Übersetzig vum Artikel „Achtburger“ vu de dütsche Wikipedia. E Liste vu de Autore un Versione isch do z finde.