Paul Scheuermeier

Dr Paul Scheuermeier (* 25. Septämber 1888 z Züri; † 13. Augschte 1973 z Bärn) isch e Schwiizer Romanischt und Dialäktoloog gsi.

Lääbe

Dr Paul Scheuermeier isch dr Soon vom Johann Robert Scheuermeier vo Winterthur und dr Julie Scheuermeier geb. Täuber gsi. Er het am Gymi z Winterthur d Matuur gmacht und vo 1907 bis 1918 mit Underbrüch, won er zytewys as Lehrer gschaffet het, a dr Uni Züri studiert. Anne 1913 isch er mit de Profässer Louis Gauchat und Jakob Jud uf ene Studieräis is Bündnerland. 1918 het er z Züri s Dokterexaame gmacht. 1926 het er d Nellie Nicolet ghürootet.

1919 het er im Uuftrag vom Jakob Jud und em Karl Jaberg mit der Forschigsarbet für en Sproochatlas vo de iteliänische Dialäkt agfange. Do drfüür isch er langi Zyt im Bünderland, im Tessin und i den iteliänische Ragioone gsi; das isch bis ane 1925 ggange. Mit sym Material isch drufabe der Sprach- und Sachatlas Italiens und der Südschweiz AIS usechoo. S Grundlagematerial vo däm Projäkt isch als AIS-Archiv bim Inschtitut für iteliänischi Sprooch und Literatur a dr Uni Bärn.

Zrugg i dr Schwiiz het dr Scheuermeier z Bärn als Gymilehrer gschaffet. Drnäbe isch er i de Feerien immer wider is iteliänische Sproochpiet ggange zum no meh Sache z dokumäntiere. Jetz het er au Objäkt vo der Sachkultur gnöier aaglueget und im Inträsse vo dr Volchskund mit Fotinen und Zäichnige feschtghalte. Der Kunschtmooler Paul Boesch het em ghulfe bim schöön abbilde vo de Sache.

Vo 1959 bis 1962 het er z Aager, z Greschonei und z Eischeme zäme mit em Paul Zinsli un dr Gertrud Frei Uufnaame vo de Fluernäme gmacht.

1943 isch dr Scheuermeier als Nochfolger vom Louis Gauchat i die Filologischi Kommission vom Dicziunari Rumantsch Grischun choo. 1964 het em d Uni Bärn dr Eeredokter ggää.

Wäärch

Bauernwerk in Italien, der italienischen und rätoromanischen Schweiz, 1943–1956

Literatur

Mario Frasa: Scheuermeier, Paul. In: Historisches Lexikon vo dr Schwiiz.
Karin Rautmann: Die Entstehung des «Sprach- und Sachatlas Italiens und der Südschweiz» AIS. Einblick in einen Forschungsprozess. Hamburg 1993.
Andrea Schorta: Paul Scheuermeier 1888–1973. In: Vox Romanica, 33, 1974, S. 365–370.

Weblink

Fondo Paul Scheuermeier bim Lombardia Digital Archive, uf regione.lombardia.it