Mia Aegerter
| Mia Aegerter | |
|---|---|
| Geburtsname | Myriam Aegerter |
| Uf d Wält cho | 9. Oktober 1976 Fryburg im Üechtland |
| Beschäftigung | Schauspiileri, Musiker |
| Instrument | Vokalischt |
| Aktiv | 1998 bis hüt |
D Mia Aegerter (* 9. Oktober 1976 als Myriam Aegerter z Frybùrg im Üechtland) isch e Frybùrger Pop-Sängeri ùn Schauspiileri. Bekannt worde isch si vorallem dur meereri Näbe- ùn Hauptrolle in schwyzerische ùn dütsche Film, ùn dur ihri drüü Albe. Si singt ùn schauspiilert ùff Schwyzerdütsch, Hochdütsch ùn Änglisch.
Biografi
[ändere | Quälltäxt bearbeite]D Mia Aegerter isch z Düdinge im Kanton Frybùrg inere musikalische Familie ùffgwaggse. Ihri Muetter isch Gitarrelehreri ùn spiilt inere Band, wie au de Vater, wo Schlagzüüg spiilt. Scho als Chind het si aagfange Musik mache ùn in Theaterstügg schauspiilere. 1997 isch si für es Joor in d Vereinigte Staate ùn het dörte Gsang ùn Theater glehrt. Näbem Bärndütsch ùn Hochdütsch redt si no Änglisch ùn Französisch. Nooch de Sekundarschuel z Düdinge ùn de Matura am Collège Saint-Michel z Frybùrg isch si 1998 ùff Münche go aa de Musicalakademi Gsang, Tanz ùn Schauspiil studiere. Erschti Ùfftritt het si 1998 bim Imitatorewettbewerb in de Sändig Lass Dich überraschen gha, wo si gwùnne het, ùn si isch in de Soundmixshow mit em Titel „Torn“ vo de Natalie Imbruglia ùffträtte. Usserdäm isch si als Tänzeri im Videoclip Doubledecker vo de Band Liquido ùffträtte. Spööter isch si ùff Berlin, wo si vo 2000 bis 2003 in de Serie Gute Zeiten – Schlechte Zeiten Ùfftritt als „Xenia di Montalban“ gha het. 2002 isch si mit eme Pleura-Erguss in s Spital cho, ùn het miesse d Ufftritt für 6 Monet ùnterbräche.
Am Aafang vo 2003 isch d Mia zum erschte Mool als Sängeri ùffgfalle, wo ihri Debut Single „U don't know how to love me“ in d Top-20 vo de Schwyzer Single Charts cho isch. 2003 het si deno de Prix Walo in de Kategori "Newcomer 2003" ùn de SWISS AWARD erhalte. Im glyche Joor isch si usserdäm in de Roll vo de „Laura Moretti“ im Schwyzer Film Achtung, fertig, Charlie! ùffträtte. Si het au de Titelsong vùm Film Hie u Jetzt gsùnge, wo im Spootjoor 2003 in d Top-5 vo de Schwyzer Single Charts cho isch. Am 1. April 2004 het si für des Lied de VIVA COMET in de Kategori „Best CH Act“ gwùnne. Ihr Debutalbum „So wie i bi / The way I am“ isch 2004 erschiine, ùn isch bis ùff Blatz 5 in de Schwyzer Charts cho. Im glyche Joor het s Jugendmagazin Bravo TV vùm ZDF moderiert. 2004/2005 isch mit ere eigne Band ùffträtte, ùn het zum Byspil im Vorprogramm vo de Dütschlandtour vùm Ronan Keating gspiilt.
Am 8. Januar 2005 het si de SwissAward in de Kategori „Showbusiness“ übecho. Dernäbe isch si no in de Jury vo 2004/05 Ussgaab vo de TV-Show MusicStar ùff SF DRS gsi. Am 12. März 2005 het si mit „Alive“ aa de dütsche Vorentscheidig zum Eurovision Song Contest 2005 deilgnoo, wo si ùff de 3. Blatz cho isch. Au 2005 het si d wyybligi Hauptroll im Schwyzer Film Leben auf Kredit gspiilt.
D Single „Meischterwärk“ ussem zweite Album „Vo Mänsche u Monschter/Of Humans and Monsters“ isch am 12. Mai 2006 erschiine; s Album sälber isch am 9. Juni in d Läde cho, ùn in de erschte Wùch ùff Blatz 21 vo de Schwyzer Charts cho. D Single het sich dergäge nit guet verchauft, ùn de Vertrag ùn d Zämmearbet mit de Plattefirma ùn em Management isch beändet worde. Usserdäm isch si in däm Joor Jury-Mitgliid in de Sändig „Musicstar“ gsi.
Am 30. Januar 2009 isch ihr dritts Album „Chopf oder Buuch“ veröffentlicht worde. In de erschte Wùch isch s Album ùff Blatz 17 vo de Schwyzer Charts cho.
Im März 2009 isch de Mystikthriller Hinter Kaifeck in d Kinos cho, wo d Mia Aegerter d Roll vo de „Viktoria Gruber“ spiilt. Dernäbe schryybt si e monatlichi Kolùmne in de Luzerner Zeitung.
Diskografi
[ändere | Quälltäxt bearbeite]Single
[ändere | Quälltäxt bearbeite]- U don't know how to love me (2003)
- Hie u jetzt / Right here right now (2003)
- So wie i bi (2004)
- Alive (2005)
- Meischterwärk (2006)
- Land in Sicht (2009)
- Du bisch mini Heimat feat Polo Hofer (2012)
Albe
[ändere | Quälltäxt bearbeite]- So wie i bi / The way I am (2004)
- Vo Mänsche u Monschter / Of Humans And Monsters (2006)
- Chopf oder Buuch (2009)
- Gränzgängerin (2012)
- Nichts für Feiglinge (2017)
Filmografi
[ändere | Quälltäxt bearbeite]Film
[ändere | Quälltäxt bearbeite]- 2003: Achtung, fertig, Charlie!
- 2005: Leben auf Kredit
- 2007: In Formatica
- 2009: Hinter Kaifeck
- 2009: Spaghetti für Zwei (Churzfilm HHF)
- 2014: Die Fahnderin
Serie
[ändere | Quälltäxt bearbeite]- 2000-2003: Gute Zeiten – Schlechte Zeiten
- 2005: Leben auf Kredit
- 2007: Marco Rima Show
- 2008: 112 - Sie retten dein Leben (Episodehauptroll)