Hermann Schaufler

dr Hermann Schaufler, 1995

Dr Hermann Schaufler (* 7. Juli 1947 z Dibenga; † 1. Septämber 2022) isch e dytsche Bolitiker (CDU) un Jurischt gsii. Är isch z Bade-Wirttebärg Wirtschaftsminischter (1989–1992) un Verchehrsminischter (1992–1998) gsii, ab 1996 zuesätzli au Umwältminischter.

Lääbe un Beruef

Dr Hermann Schaufler isch z Bierenga un z Bfullenga as ais vu fimf Chinder ufgwagse. Sy Vater sich frie an dr Folge vum Chrieg gstorbe.

Z Bfullenga sich er uf s Gimnasium gange un no uf s Wirtschaftsgimnasium z Reidlenga, wun er au sy Abitur gmacht het. Derno het er an dr Uniwersitet Dibenga Rächtswisseschaft un Wirtschaftswisseschaft studiert, anne 1973 het er s erscht juristisch Staatsexame un 1976 z zwait Staatsexame abglait.. Är her druf as Rächtsaawalt z Reidlenga un as Lehrbeufdraite an dr dertige Fachhochschuel fir Tächnik un Wirtschaft gschafft.

Dr Hermann Schaufler isch mit ere Richteri ghyrote gsii un het drei Chinder ghaa. Är isch am 1. Septämber 2022 im Alter vu 75 Johr gstorbe.

Bolitik

Bolitisch het si dr Schaufler ab 1963 in dr Junge Union engaschiert un isch anne 1965 in d CDU yydrätte. Fir dr RCDS isch er z Dibenga im Große Senat vu dr Uniwersitet ghockt. Vu 1975 bis 1981 isch er fir d CDU Mitglid vum Gmaitrot vu dr Stadt Reidlenga gsii. Em Kraisdag vum Landkrais Reidlenga het er vu 1979 bis 1988 aaghert. Vu 1997 bis 2000 isch er as Noofolger vum Dietmar Schlee Vorsitzer vum CDU-Bezirksverband Wirttebärg-Hauezollre gsii.

Anne 1980 isch dr Schaufler as Abgordnete in Landdag vu Bade-Wirttebärg yyzoge, wun er 2001 aaghert ghaa het. No dr Landdagswahle 1988 het en dr Minischterbresidänt Lothar Späth in sy Kabinett as Staatssekreter im Minischterium fir Wirtschaft, Mittelstand un Tächnology gholt. Anne 1989 het er vum Martin Herzog s Amt vum Wirtschaftsminischter, wun er au unter em Minischterbresidänt Erwin Teufel zerscht furtgfiert het.

Anne 1992 het s z Bade-Wirttebärg e Großi Koalition bildet wore, wu dr Schaufler vum Thomas Schäuble s Amt vum Verchehrsminischter ibrnuu het. Wu s Verchehrsminschterium anne 1996 in s Umwältminischterium yyglideret woren isch, het dr Schaufler s nei Doppelminischterium wytergfiert. E baar Beraich vum Umwältminischterium sin dodmol em Landwirtschaftsminischterium zuegornet wore.

Am 14. Oktober 1998 hat si dr Schaufler zwunge gsääne, dr Minischterboschte, d Barteiämter un au alli syni Ehrenämter un Ufsichtsrotsmandat niderzlege. In syre Funktion as Ufsichtsrotsvorsitzer vu dr landesaigene Sidweschtdytsche Verchehrs AG (SWEG) het er in dr Johr 1995 (20.000 DM), 1996 (10.000 DM) un 1997 (15.000 DM) Gälder zue Gunschte vum Fueßballverain SSV Reutlingen 05, wu dodmol finanziäll aagschlaa gsii isch, zwäckentfremdet ghaa un dodermit gege s Aktiegsetz, wu gulte het, verstoße. Am 29. Dezämber 2000 sich er wäge däm vum Landgricht Offeburg zue je aire Gäldstrof verurdailt wore; s Urteil het am 6. Dezämber 2001 vor em Bundesgrichtshof Bstand ghaa.

Privats

Dr Schaufler isch Mitglid vu dr kaolische Studänteverbindige AV Guestfalia Tübingen, K.D.St.V. Carolingia Hohenheim un K.D.St.V. Chursachsen Dresden gsii, alli im CV. Derzue isch dr Schaufler Mitglid vu dr Achalmritterschaft Reutlingen gsii.

Weblink

• Wärch vu un iber Hermann Schaufler in dr Dytsche Digitale Bibliothek
• Hermann Schaufler im Munzinger-Archiv (Artikelaafang frei abruefbar)

Fueßnote

Dä Artikel basiert uff ere fräie Übersetzig vu dere Version vum Artikel „Hermann_Schaufler“ vu de dütsche Wikipedia. E Liste vu de Autore un Versione isch do z finde.