Ernst Pfister

dr Ernst Pfister 2004

Dr Ernst Pfister (* 28. April 1947 z Drossinge; † 4. Septämber 2022) isch e dytsche Bolitiker (FDP) gsii. Är isch vu 2004 bis 2011 Wirtschaftsminischter vum Land Bade-Wirttebärg gsii.

Lääben un Beruef

Dr Pfister isch zerscht uf d Volksschuel z Drossinge gange, isch no uf s Gimnasium gange un het anne 1967 z Villinge-Schwenninge s Abitur gmacht. Derno het er bis 1968 sy Grundwehrdienscht bi dr Bundeswehr abglaischtet. An dr Uniwersitet Dibenga un Fryburg het er Bolitikwisseschafte, Germanischtik un Sportwisseschafte studiert un s Studium 1973 mit em erschte Staatsexame abgschlosse. Anne 1974 het er s zwait Staatsexame gmacht. Ab 1975 het dr Pfister am Villinger Hoptbühl-Gimnasium unterrichtet, wun er in Personalrot gwehlt un Personalrotsvorsitzer woren isch.

Dr Ernst Pfister isch evangelisch un ghyrote gsii, är het zwai Chinder ghaa. Är het zletscht z Drossinge un uf dr Insle Richenau gläbt.

Sy Haimetstadt Drossinge het en 2012 zum Ehreburger ernännt. Anne 2014 isch dr Ernst Pfister mit em Verdienschtorde vum Land Bade-Wirttebärg uuszaichnet wore.

Bolitik

Dr Ernst Pfister isch anne 1969 in d FDP/DVP yydrätte un isch u 1972 bis 1989 Vorsitzer vum Kraisverband Duttlinge gsii. Är isch 1980 in Gmaitrot vu dr Stadt Drossinge gwehlt wore, wun er bis 2004 Mitglid dervu gsii isch. Vu 1984 bis 2004 isch dr Pfister au stellverdrättende Burgermaischter vu Drossinge gsii. Zwische 1984 und 1996 isch dr Pfister Mitglid vum Kraisdag vum Landkrais Duttlinge gsii. Vu 1980 bis 2011 isch er Mitglid vum Landdag Bade-Wirttebärg un vu 1996 bis 2004 Vorsitzer vu dr FDP-Landdagsfraktion gsii. Dr Pfister isch allmol iber e Zwaitmandat vum Wahlkrais Duttlinge-Eschinge in Landdag gwehlt wore. Bi dr Wahl zum 14. bade-wirttebärgische Landdag 2006 isch er uf e Wahlergebnis vu 16,4 % chuu (FDP-Landesergebnis 10,8 %). Im Juli 2004 isch er as Noofolger vum Walter Döring, wu im Zug vu dr sognännte „Umfragen-Affäre“ het mieße zruggdrätte, bade-wirttebärgische Wirtschaftsminischter wore. D Funktion as stellverdrättende Minischterbresidänt, wun er 2004 au ibernuu ghaa het, het er am 14. Juni 2006 an dr Ulrich Goll abgee, wun er dr barteiintärn Kampof um d Spitzekandidatur verlore ghaa het. Dr Pfister het si 2011 us dr Bolitik zruggzoge.

Sunschtig Engaschmänt

Dr Ernst Pfister isch Ehrebresidänt vum Dytsche Harmonika-Verband e. V. un Vorsitzer vum Vorstand vum forum vergabe e. V. gsii, derzue Vorsitzer vum Verwaltigsrot vu dr FDP-noche Reinhold-Maier-Stiftig. Är isch Vorsitzer vum Ufsichtsrot vu dr Mäss Stuegert un Mitglid vum Ufsichtsrot vu dr Landesstiftig Bade-Wirttebärg un dr Tourismus-Marketing GmbH Bade-Wirttebärg gsii. Derzue isch dr Pfister au Bresidänt vum Tourismus-Verband Bade-Wirttebärg un au Mitglid vu dr Dregerversammlig vu dr Landesbank Bade-Wirttebärg gsii.

Weblink

 Commons: Ernst Pfister – Sammlig vo Multimediadateie

• Wärch vu un iber Ernst Pfister in dr Dytsche Digitale Bibliothek
• Uuszug us em Abgordnetehandbuech (PDF-Datei; 75 kB)
• Ernst Pfister uf dr Syte vu dr FDP Bade-Wirttebärg
• Biografy vum Pfister uf dr Syte vu dr Wirtschaftswoche
• Ernst Pfister im Munzinger-Archiv (Artikelaafang frei abruefbar)

Fueßnote

Dä Artikel basiert uff ere fräie Übersetzig vu dere Version vum Artikel „Ernst_Pfiste“ vu de dütsche Wikipedia. E Liste vu de Autore un Versione isch do z finde.