Franziska Brantner

Dialäkt: Undermarkgreflerisch

d Franziska Brantner, 2023

D Franziska Katharina Brantner (* 24. Augschte 1979 z Löörech) isch e dytschi Bolitikwisseschaftleri, Sozialwisseschaftleri un Bolitikeri (Bindnis 90/Di Griene) un syt Novämber 2024 Bundesvorsitzeri vu ire Bartei. Si ghert syter anne 2013 em Dytsche Bundesdag aa un isch syt em 8. Dezämber 2021 Barlemäntarischi Staatssekretäri bim Bundesminischter fir Wirtschaft un Klimaschutz.

Uusbildig un Beruef

Dr Brantner isch z Neieburg ufgwagse un het am Dytsch-Franzesische Gimnasium z Fryburg ire Abitur gmacht. Noch em Abitur het si ai Johr lang in dr Biro vu dr Heinrich-Böll-Stiftig z Tel Aviv un z Washington, D.C. gschafft. Nocherdani het si Bolitikwisseschaften mit Schwärpunkt Internationali Bezieige un Europabolitik an dr Verwaltigshochschuel Sciences Po z Paris un an dr Columbia University’s School of Public and International Affairs (SIPA) z New York mit Master- un Diplomabschluss 2004 studiert. 2010 isch si an dr Universitet Mannem mit ere Arbet iber d Reformfähigkait vu bolitische Inschtitutione am Byschpel vu dr Verainte Natione promoviert wore. In däre Zyt het si as wisseschaftlgi Mitarbaiteri am Lehrstuel fir Bolitischi Wisseschaft II vum Thomas König z Mannem gschafft un het e Lehrufdrag fir Internationali Bolitik ghaa. Am European Studies Center vum St Antony’s College z Oxford isch si vu 2006 bis 2007 wisseschaftligi Mitarbaiteri gsii.

Bi dr Kumferänz „Peking+5“ vu dr UN-Vollversammlig anne 2000 (ere Noofolgkumferänz zur UN-Wältfrauekumferänz vu Peking 1995) un no bis 2005 isch d Brantner Ko-Vorsitzeri vum „Youth Caucus“ vu dr UN Commission on the Status of Women gsii. Fir dr Entwickligsfonds vu dr Verainte Natione fIr Fraue (UNIFEM), d UN-Frauerächtsorganisation, het si as Beroteri gschafft un z Brüssel e Kooperationsprojäkt mit dr franzesische EU-Rotsbresidäntschaft vum Johr 2008 koordiniert, wu dr europäische Rameblan zur Resolution 1325 vum UN-Sicherhaitsrote entwicklet het. Fir dr European Council on Foreign Relations het si mitgschribe an ere Studie zur EU-Mänschnrächtsbolitik in dr Verainte Natione. Fir d Bertelsmann-Stiftig het si z Brüssel zum Thema europäischi Ussebolitik un europäischi Antworte uf d Finanz- un Wirtschaftskrise gschafft.

D Brantner isch no dr Richtlinie vum Bundesverband Mediation glehrti Mediatori. Si schwätzt flissig Franzesisch, Änglisch un Spanisch.

D Brantner isch mit em Dibenger Oberburgermaischter Boris Palmer liiert gsii un het mit ihm e gmainsami Dochter, wu im Maie 2010 uf d Wält chuu isch. Si läbt z Haidelberch un z Berlin.

Bolitik

D Brantner isch anne 1996 dr Griene Juged bydrätte un isch Mitglid im däre ire bade-wirttebärgische Landesvorstand (1996–1997) un im Bundesvorstand (1997–1999) wore. In dr Zyt vu irem Studium an dr Sciences Po in Paris het si ne grieni Hochschuelgruppe grindet un isch dert 2001/2002 Mitorganisatori vum erschte „Europäische Studäntekonvänt“ gsii.

Si isch Mitglid vu dr Frides- un Sicherhaitsbolitische Kummission vu dr Bundesbartei gsii un Mitglid vum Autoreteam fir s Wahlprogramm vu dr Bartei zue dr Europawahl 2009.

Bi dr Europawahl 2009 het si uf Blatz 11 vu dr Bundeslischt vu Bindnis 90/Di Griene as gmainsami Kandidati vu dr Griene vu dr Metropolregion Rhy-Necker kandidiert un het dodermit ais vu dr insgsamt 14 Mandat vu dr dytsche Griene im Europäische Barlemänt gwunne. Si het dr Fraktion Grieni/EFA aaghert un isch ussebolitischi Sprächeri vu dr Fraktion un ständigi Berichterstatteri fir s EU-Stabilitetsinschtrumänt fir Konfliktlesig un Krisereaktion gsii. Derzue het si fir di Griene/EFA d Verhandlige iber dr Ufböu un d Reform vum Europäische Uuswärtige Dienscht gfiert. Si isch ständig Mitglid un grieni Koordinatori im Uusschuss fir Uuswärtigi Aaglägehaite gsii un stellverdrättend Mitglid im Unteruusschusses fir Sicherhait un Verdaidigung, im Frauerächts- un Glychstelligsuusschuss un im Huushaltsuusschuss.

D Brantner isch Mitglid vu dr Europa-Union Barlemäntariergruppe Europäisch Barlemänt un ain vu vu vier Vize-Vorsitzer*ne vu dr European Parliament Platform for Secularism in Politics (EPPSP) gsii, eme Forum fir Mitglider vum Europäische Barlemänt ub dr Zivilgsellschaft.

Anne 2012 isch si in dr Noofolg vum Fritz Kuhn vu dr Griene im Bundesdagswahlchrais Haidelberch fir d Bundesdagswahl 2013 nominiert un isch iber d Landeslischt in Bundesdag gwehlt wore. Mit em Yyzug in Bundesdag het si am 21. Oktober 2013 ire Mandat im Europabarlemänt niderglait. In dr Legislaturperiod 2013–2017 isch si familiebolitischi Sprächeri vu dr Griene Bundesdagsfraktion gsii. Derzue isch si em Unteruusschuss Zivili Krisepreväntion vorghockt un isch stellverdrättend Mitglid im Uusschuss fir d Aaglägehaite vu dr Europäische Union un im Uuswärtige Uusschuss gsii.

Im Septämber 2017 het d Brantner ire Bundesdagsmandat chenne verdaidige. In dr Legislaturperiod 2017–2021 isch si Europabolitischi Sprächeri vu dr Bundesdagsfraktion Bindnis 90/Di Griene gsii. Si isch as Obfrau im Europauusschuss ghockt un isch stellverdrättend Mitglid im Uuswärtige Uusschuss gsii. Derzue isch si Barlemäntarischi Gschäftsfiereri vu ire Fraktion gsii.

Syter 2019 isch d Franziska Brantner im Vorstand vu dr Dytsch-Franzesische Barlemäntarische Versammlig.

Bi dr Bundesdagswahl 2021 het d Brantner s Diräktmandat im Bundesdagswahlchrais Haidelberch mit 30,2 % vu dr Erschtstimme gwunne. Syt em 8. Dezämber 2021 isch si Barlemäntarischi Staatssekretäri bim Bundesminischter fir Wirtschaft un Klimaschutz, Robert Habeck.

Syt em 8. Dezämber 2021 isch si Barlemäntarischi Staatssekretäri bim Bundesminischter fir Wirtschaft un Klimaschutz.

Am 16. Novämber 2024 isch d Brandtner uf dr griene Bundesdelegiertekumferänz z Wiesbaden näb em Felix Banaszak mit 78,15 % zur Bundesvorsitzeri gwehlt wore.

Mitglidschafte

D Brantner isch Mitglid vu dr iberbarteilige Europa-Union Dytschland, wu si fir e federal Europa un dr europäisch Ainigungsprozäss yysetze duet.

Weblink

 Commons: Franziska Brantner – Sammlig vo Multimediadateie

• Websyte vu dr Franziska Brantner
• Biographie beim Deutschen Bundestag
• Yytrag über Franziska Brantner in dr Abgordnete-Datebank vum Europäische Parlament
• d Franziska Brantner uf abgeordnetenwatch.de

Fueßnote

Dä Artikel basiert uff ere fräie Übersetzig vu dere Version vum Artikel „Franziska_Brantner“ vu de dütsche Wikipedia. E Liste vu de Autore un Versione isch do z finde.