Evangelisch-reformierti Chülcha vom Kanton Fryburg

Di Evangelisch-reformierti Chülcha vom Kanton Fryburg (uf französisch: Eglise Evangélique Réformée du canton de Fribourg) isch d reformiert Kantonalchülcha im Schwyzer Kanton Fryburg. Si isch Mitgliid i der Evangelisch-reformierte Chülcha Schwiiz.

Gschicht

De Kanton Fryburg isch traditionell katolisch. Wäge de gmeinsame Herrschaft mit em Kanton Bäärn über d Region vo Murte, isch denn s Murtebiet nöd alei unter de Kontrolle vo de Schtadt Fryburg gsi. So hät d Bevölkerig von de Gmiine Murten, Kerzers, Môtier, Meyriez un Ferenbalm sich könne 1530 für d Reformation entscheide. Wäge de Zuewanderig hät sich im Jaar 1836 i de Schtadt Fryburg di erscht Diaschporagmiin im Kanton gründt. Na de Gründig vom Bundesschtaat 1848 hät Zuwanderig im Kanton Fryburg stark zugnoo. Bsunders us em Bäärnbiet sin Reformierti in d Gränzregione iigwandert. D Verhältnis, bsunders im Seisebezirk sin unter de reformierte Bevölkerig schlächt gsi. D Vätere hei iri Chinn nöd welle in e katolischi Schuel schicke. Uf Initiative vo Bäärner Pfärrer sin drum reformierti Schuele gründt cho, wi zum Bischspiil im Wyssestei (Gmiin Rächthaute), z Bärg (Gmiin Schmitte) un im Kessibrunnholz. Im Johr 1854 het de Kanton Fryburgs erscht mol es Chülchagsetz verabschid, vo dem au di reformiert Chülcha betroffe gsi isch un 1863 isch im Seisebezirk di erscht Chülchagmiin gründt cho, d Chülchagmiin Santooni, wo ma denaa in Chülchagmiin Seisebezirk ungnännt hät. Erscht im Jaar 1998 hät de Kanton d Stüüraaglägeheite für di reformiert Chülcha übernoh un si uf däm Wäg mit de katholisch Chülcha gliichgstellt. Di bis do anne gröscht Chülchagmiin vom Kanton, d Chülchagmiin vom Seisebezirk isch zum 1. Januar 1999 in füf selbschtändigi Chülchegmiine ufteilt worde und 2001 hät ma d Chülchagmiin Romont-Châtel-Saint-Denis ufteilt.

Gmiine

Di Fryburger Chülcha hät (Schtand 2008) 16 Chülchagmiine mit (Schtand 2006) 38'000 Mitglider:
Im Seebezirk:

• Murte gliichzitig Sitz vo de Kantonalchülcha
• Meyriez
• Môtier - Vully
• Kerzers
• Ferenbalm
• Cordast

Im Seisebezirk:

• Bösinge
• Wünewiu-Flamatt - Ueberstorf
• Düdinge
• Santooni
• Wyssestei/Rächthaute

Die andre 5 Chülchagmiine entschspräched jewiils de Bezirk:

• Fryburg für de Saanebezirk
• Estavayer-le-Lac für de Broyebezirk
• Chatel-St-Denis für de Vivisbachbezirk
• La Glâne - Romont
• Bulle - La Gruyère

Leitig

De Sitz vo de Chantonalchülcha isch z Murte. D legislative Gwalt hät d Synode un d exekutiv de Synodalrat. Präsident vom Synodalrot isch sit em Jaar 1999 de Daniel de Roche. Uf de Synode vom 4. Juni 2012 het de Daniel de Roche uf e witeri Kandidatur verzichtet. Zum Nachfolger isch de Pierre-Philippe Blaser gwählt worde, wo Pfarrer in der Chülchagmeind Môtier-Vully isch und am 1. Juli 2012 sini Schtell aaträte het.

Weblink

• Website vo de Fryburger Chülcha