Christian Scheufele
| Dialäkt: Schwäbisch |
Dr Christian Scheufele (* 18. Merz 1884 z Weila,[1] † 23. Sebdember 1915 bei Bischdriza[2]) ischt a deitscher Bildhauer us-em Schwôbalendle gwäa.
Aus seim Leaba
[ändere | Quälltäxt bearbeite]Dr Christian Scheufele kommt am 18. Merz 1884 z Weile an dr Teck uff d Welt. Sei Vadder isch dr Landwirt Johann Michael Scheufele (1845 bis 1922) ond sei Mueder d Catharina geborene Schaich (1851 bis 1918). Scho en seira Jugend isch sellem Bua sei greeschder Wonsch, schbäder amôl Bildhauer zo werra. Seine Eltra hend abr et gnuag Geld, om da Soh uff d Kunscht-Akademii schicka zo kenna, abr dr Schweizer Bildhauer Jakob Brüllmann (1872 bis 1938), a Soh vo-ma Thurgauer Stoimetza, wo z Stuegert zuagwandret ischt, nemmt dean hochbegabda Kerle en d Lehr.
Dr berihmde schwäbische Archidekt Martin Elsaesser vrschafft em Christian Scheufele sein erschda Ufftrag en dr Stuegerter Markthalle. Hendrher kommet noh Arbeida fir de evangelische Kircha em Stuegerter Stadtdoil Gaisburg, z Massabach em Ondrland[3] ond en Großgartach.[4] Mit deane Arbeida vrdeant dr Scheufele jedafalls so viil, dass’r sich 1913 sogar a oiges Atelier en dr Stuegerter Reuchlinstrôß leischda kôô. Abr scho zwoi Jôhr schbäder bricht dr Erschde Weltkriag aus, ond der Omstand wuud em Scheufele zom Vorhengnis: er muaß en da Kriag ziha. An dr Oschtfront bei Bischdriza wuud’r so schwer vrwondet, dass’r sich dô drvoo nemme erhola kôô. Am 23. Sebdember 1915 haucht’r sei Leaba aus. Grad amôl 31 Jôhr alt ischt’r wôrra. Sei ledschda Ruha fendet der Môô em Kirchhof vom polnischa Ort Kiemieliski, et weit weg vo dr Grenz zo Litauen.
Ausstellong
[ändere | Quälltäxt bearbeite]Noh em Scheufele seim Sterbejôhr ereffnet d wirdabergischa Keenigin Charlotte a Gedenkausstellong em legendära Stuegerter Kunschthaus Schaller en dr Mariastrôß.
A Auswahl vo seine Werk
[ändere | Quälltäxt bearbeite]
Nôchdem dr Kinschtler bloß 31 Jôhr alt wôrra ischt, hôt’r zwangslaifich et viil Bleibendes hendrlassa kenna. Abr a baar Kunschtwerk garandiiret emmerhin noh sei Ôdenka:
- D Säulakabidella en dr Stuegerter Markthalle
- En dr Evangelischa Jugendstil-Kirch em Stuegerter Stadtdoil Gaisburg: D Figura vom Mose, vom Keenich David ond vom Aposchdl Paulus ibr-em Eigangsbereich, em Chorraum d Kanzel, dr Altar ond dr Daufstoi. S Matrial vom Daufstoi ischt aus Trachyt-Tuffstoi, wo us-em Nerdlenger-Riis-Krader stammt.[5]
- Figura en dr evangelischa Georgskirch z Mássabach[6]
- En dr Lorenzkirch vo Großgartach: d Kreizigongs-Grubbe aus Holz (lueg s Bildle)[7]
Em Scheufele seine drei Figura en der Gaisburger Kirch:
-
d Mose-Figur ibr-em Eigangsportal -
d Figur vom Keenich David -
d Paulus-Figur
Quell
[ändere | Quälltäxt bearbeite]- Katharina Wilke: Ein hochbegabter Bauernbub. Der Stuttgarter Bildhauer Christian Scheufele (1884 - 1915). In: Schwäbische Heimat 68, 2017, S. 68 - 74;
- Gerhard Raff: Ein hoffnungsvoller, hochbegabter Bauernbub, a Ardikel ibr da Christian Scheufele en dr Stuegerter Zeidong vom 29. Sebdember 2015, Ausgab fir da Kreis Beblenga, S. 18
Fuaßnoda ond oinzlne Nôchweis
[ändere | Quälltäxt bearbeite]- ↑ dui Stadt gheert zom heidiga Landkrois Esslenga
- ↑ der Ort leit en dr heidiga Republik Polen
- ↑ heitzodag a Stadtdoil vo Schwaigern em Landkreis Heilbronn
- ↑ heitzodag a Stadtdoil vo Leingarten em Landkreis Heilbronn
- ↑ Gaisburger Kirche uf dr Webseit vo dera Kirchagmoind
- ↑ Georgskirche Massenbach uf dr Webseit vo martin-elsaesser-kirchen.de
- ↑ Lorenzkirche Großgartach uf dr Webseit vo martin-elsaesser-kirchen.de