Dr Bärefelserhoof am Stapflebärg

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
Disambig.svg Dä Artikel behandlet dr Bäärefelserhoof am Stapflebärg z Baasel. Für e Bärefelserhoof am Petersgraabe lueg doo.

47.5575388888897.5894194444444Koordinate 47° 33′ 27″ N, 7° 35′ 22″ O; CH1903: 611350 / 267436

Dr Bärefelserhoof
Dialäkt: Baseldütsch
Uschnitt us dr Stadtaasicht vom Matthäus Merian em Eltere im 17. Joorhundert[1]
Wemm mä vom Määrtblatz (rächts unde) die Freiji Strooss uufe lauft, isch dr Schlüsselbärg die ersti Gass uf dr lingge Site. Dr Stapflebärg biegt gege linggs vom Schlüsselbärg ab, wo dä e Kurve gege rächts macht, und goot an dr Martinsgass, wo vo linggs chunnt, und am Augustinerklooster (15) rächts verbii bis zur Augustinergass.

Dr Bärefelserhoof isch e historischs Geböid in dr Schwizer Stadt Baasel. Er befindet sich in dr Groossbaasler Altstadt am Stapflebärg 9 und stoot uf dr Liste vo de Kulturgüeter im Kanton Basel-Stadt. Es isch e Seminarhuus vo dr Uniwersidäät Baasel worde, söll jetz aber wider zum e Woonhuus umbaut wärde.

Baugschicht[ändere | Quälltäxt bearbeite]

1602 het dr Johann Lucas Isely, wo men em Hans Lux Isely «dr Riich» gsäit het, s Huus am Egge vo dr Martinsgass und em Stapflebärg lo baue und het s mit em Geböid «Ysenburg» an dr Martinsgasse 16-18 verbunde, wo au iim ghöört het. Wo dr Isely 1626 gstorbe isch, si vo sim Riichdum nume Schulde übrig bliibe. S Geböid isch denn e Zit lang leer gstande und e baar Mol witerverkauft worde. Dr Junker Friedrich Christoph vo Bärefels het s 1748 kauft, und vo denn stammt dr Naame Bärefelserhoof. 1802 isch d Siidebandfabrigg «Gebr. Bischoff» in s Huus khoo und het s zun ere Fabrigg umbaut. Dr hinderi Däil vo dr Liigeschaft am Stapflebärg 7 het d GGG 1879 für d Frauenarbetsschuel kauft. 1895 het dr Staat die bäide Liigeschafte, Stapflebärg 7 und 9, kauft.

1916 het d Uniwersidäät Baasel s Geböid afo bruuche. Im Undere Kollegium het s nüm gnueg Blatz ghaa, wo s Oobere Kollegium gsi isch, het mä s Museum an dr Augustinergass baut und es het usgsee, wie wenn s no lang wurd goo, bis e nöis Kollegiehuus baut wurd, und dorum het mä Seminarie am Stapflebärg afo iirichde, und dr Bärefelserhoof isch äins vo dene Seminarhüüser worde. Zerst si s Theologische und s Filologische Seminar (Latiinisch und Griechisch) iinekhoo, s Seminar für Indogermanischi Sproochwüsseschaft, s Orientalische Seminar, s Historische Seminar, s Juristische Seminar, s Dütsche Seminar, s Änglische Seminar und s Staatswüsseschaftlige Seminar, wo denn im Vergliich zu hüte vil weniger Blatz brucht häi. In de Drissger Joor isch s äng worde und e baar Seminar häi nöji Häim gfunde. Im Bärefelserhoof si no s Dütsche, s Filologische und s Historische Seminar bliibe und s chliine Seminar für Indogermanischi Sproochwüsseschaft. Eso isch s bis in d 1970er bliibe. S Filologische und Indogermanistische Seminar si uszoge und schliesslig isch s Historische Seminar ans Hirschgässli 21 züüglet und s Dütsche und Slavische Seminar an dr Äschegraabe 9.

Im Bärefelserhoof isch jetz no s Romanische Seminar dehäim gsi, bis es 2007 an d Maiegass 51 züüglet isch. Jetz söll s Geböid wider zum e Woonhuus umbaut wärde.[2][3]

Kwelle[ändere | Quälltäxt bearbeite]

Lueg au[ändere | Quälltäxt bearbeite]

Fuessnoote[ändere | Quälltäxt bearbeite]

  1. Merian Basel 1642.jpgDie ganz Aasicht vo dr Stadt Baasel vom Matthäus Merian em Eltere vo 1642.
  2. AM STAPFELBERG: Umnutzung von Bärenfelserhof und ehemaliger Frauenschule in Wohn- und Arbeitsräume. Baubeginn Anfang 2015.
  3. Basler Zeitung vom 01.07.2014 / Stadt: «Wohnungen im historischen Altstadthaus. Früherer Uni-Standort am Stapfelberg wird saniert und umgebaut»