Usschnitt us dr Stadtaasicht vo Basel vom Matthäus Merian em Eltere, 1642.[1] Dr Petersblatz isch in dr Middi in dr undere Helfti vo däm Bild. Linggs vom Petersblatz isch dr Petersgraabe und die inneri Stadtmuure. Dr Bärefelserhof stoot näben em Durm vo dr Stadtmuure.
Dr Bärefelserhoof isch e historischs Geböid in dr Schwizer Stadt Baasel gsi. Er het sich in dr Groossbaasler Altstadt am Petersgraabe befunde. 1956 isch er abbroche worde.
Scho um s Joor 1310 chunnt im Zinsbuech zu St. Peter en Aadelshoof vor, wo mä vom Stiftsgässli uss dri khoo isch. Er het «Zum Luttebach» ghäisse und isch an dr Innere Stadtmuure am Petersgraabe aabaut gsi und e hooche Runddurm isch drnääbe gstande. 1488 het dr Rootsherr Ulrich zum Luft dr Luttebacherhoof im Ridder Lütold vo Bärefels ge, wo dr Familiesitz von em e chliini Burg oobe vo Ääsch gsi isch. Säggs Bäärefelser si Bürgermäister vo Baasel gsi. Dr Hoof am Petersgraabe isch bis 1640 im Bsitz vo dr Familie bliibe, vo denn aa isch er immer wider witerverkauft worde, bis 1908 d Veräinshuusgsellschaft d Liigeschaft kauft und umbaut het.
D Baasler Handelsgsellschaft, e Noochfolgere vo dr Baasler Mission, het 1947 dr dr Bärefelserhoof am Petersgraabe kauft und en 1956 lo abbräche und an sim Blatz vom Archidekt Paul Trüdinger e Verwaltigsgeböid lo baue.
