S Kollegiehuus vo dr Uniwersidäät Baasel

Us der alemannische Wikipedia, der freie Dialäkt-Enzyklopedy

Koordinate: 47° 33′ 30,8″ N, 7° 35′ 2″ O; CH1903: 610933 / 267547

S Kollegiehuus vo dr Uniwersidäät Baasel
Dialäkt: Baseldütsch

S Kollegiehuus vo dr Uniwersidäät Baasel befindet sich am Petersblatz 1 in dr Stadt Baasel. S Geböid gältet as e Baasler Kulturguet.

Nutzig[ändere | Quälltäxt bearbeite]

Hüte finde im Kollegiehuus Vorlääsige, Vordräag und Daagige statt. E Däil vo dr Verwaltig und d SKUBA (Studentische Körperschaft der Universität Basel) befinde sich au dört.

Gschicht[ändere | Quälltäxt bearbeite]

Usschnitt us dr Stadtaasicht vo Basel vom Matthäus Merian em Eltere, 1642.[1] Dr Petersblatz mit sine Böim isch in dr Middi in dr undere Helfti vo däm Bild. S alte Züüghuus (22) isch grad oobedraa. Es isch abbroche worde zum Blatz für s nöije Kollegiegeböid z mache.

Sit dr Gründig vo dr Uniwersidäät im 15. Joorhundert isch s Kollegiehuus am Rhiisprung gsi. Wo noch dr Reformazioon d Uni im ehemoolige Augustinerklooster an dr Augustinergass e zuesätzligs Geböid überchoo het, het das, wil s witer oobe gsi isch, s Oobere Kollegium ghäisse and s alte am Rhiisprung isch zum Undere Kollegium worde.

D Uni isch kuum gwaggse bis ins 20. Joorhundert, schliesslig het mä aber doch afo iigsee, ass mä e nöis Kollegiehuus brucht. Wil schon e Hufe Geböid vo dr Uni in dr Nööchi vom Petersblatz glääge si, wie s Bernoullianum, wo 1874 iigweit worde isch, s Vesalianum zää Joor spööter, d Universidäätsbibliodek 1896 oder s Botanische Instidut 1898, het mä sich für dr Petersblatz entschiide. Wil mä drfür s alte Züüghuus het müesse abbräche, isch s 1936 zun ere Volksabstimmig choo. Denn isch s aber rasch gange. Dr Roland Rohn het d Blään gmacht, 1937 het mä afo baue und 1939 isch s nöije Kollegiehuus iigweit worde.

Vo 2001 bis 2003 isch s Geböid ganz renowiert worde.

Fuessnoote[ändere | Quälltäxt bearbeite]

  1. Uf dr Aasicht vom Merian vo 1642 gseet mä dr Petersblatz mit sini Böim rächts uf em Bild.

Kwelle[ändere | Quälltäxt bearbeite]