Augustinergass

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen

47.55767.5907Koordinaten: 47° 33′ 27″ N, 7° 35′ 27″ O; CH1903: 611446 / 267443

D Augustinergass um d Nummere 21 ume
Dialäkt: Baseldütsch
Uschnitt us dr Stadtaasicht vom Matthäus Merian im 17. Joorhundert[1]
D Augustinergass goot vom Münsterblatz us am Augustinerchloster (Nummere 17 uf em Bild) verbii bis zum Brunne bim Rhiisprung.
Dr Augustinerbrunne

D Augustinergass isch e Gass uf em Baasler Münsterhüügel, wo s scho im Middelalter gee het. Si goot vom Münsterblatz bis zum Rhiisprung und het iire Naame vom Chloster überchoo, wo d Augustiner dört im 14. Joorhundert baut häi.

S Augustinerchloster[ändere | Quälltäxt bearbeite]

Hauptardikel: S Augustinerkloster

S Augustinerchloster isch mit dr Basler Reformazioon an d Stadt gfalle und die het s dr Uniwersidäät gee as Kollegium. Im 19. Joorhundert het dr Melchior Berri usser e baar Muure s Chloster lo abrisse, zum an sim Blatz e Museum baue, wo 1849 eröffnet worde isch. An dr Fassaade het dr Johann Jakob Oechslin e Fries aagmacht, wo d Basilea zäigt mit eme Wabbeschild und eme Füllhorn, und uf em Chopf het si e Muurechroone. Hüte si s Museum vo de Kulture und s Naturhistorische Museum doo dehäi.

Dr Augustinerbrunne[ändere | Quälltäxt bearbeite]

Usser em Museum het s no anderi Bauwärk an dr Augustinergass, wo dänggmolgschützt si. Am Ändi vo dr Gass bim Rhiisprung stoot e Basiliskebrunne. Im 15. Joorhundert isch öbbe dört dr Augustinerbrunne gstande mit eme Droog us Holz, wo s Wasser über Tüchle vo St. Margreth im Binnigerbann überchoo het. Im 16. Joorhundert het mä e nöije Brunne baut, mit eme Droog us Stäi und eme Basilisk oobe uf em Brunnestock.[2] No im 17. Joorhundert het dr Merian dä Brunne in sinere Aasicht vo Baasel zäichnet, wien er in dr Middi vo dr Gass stoot. Hüte isch er ganz nooch am Huus an dr Augustinergass 1. Oobe uf em Brunnestock hockt e Basilisk und hebt in sine Chralle s Schild mit em Basler Stadtwabbe, eme schwarze Staab uf wissem Grund.

Dr Augustinerbrunne isch e Baasler Kulturguet, wo für d Region vo Bedütig isch.

D Hüüser uf dr Rhiisite[ändere | Quälltäxt bearbeite]

Uf dr Rhiisite vo dr Gass het s guet erhalteni gotischi und barocki Woonhüüser, won e groossartigi Ussicht uf e Rhii und s Chläibaasel häi.[3] E Däil von ene stöön uf dr Liste vo de Kulturgüeter vo Baasel, so s Huus zem Goldige Stauffe (Augustinergass 5), s Huus zem Wildemaa an dr Augustinergass 13, dr Chläi Markgrööfler Hoof (Nummere 17) und dr Augustinerhoof (Augustinergass 19).

Dr Chläi Markgrööflerhoof[ändere | Quälltäxt bearbeite]

Dr Chläi Markgrööflerhoof isch e midelalterlige Bau, wo im Joor 1376 im Rudolf III. vo Hachbärg/Röttele ghöört und wäge däm dr Naame Markgroofehoof überchoo het. Bis 1520 isch er im Bsitz vo de badische Markgroofe gsi und isch e Zitlang au vo dr Uni brucht worde. 1866 het er de Burghets ghöört und denn fümf andere Bsitzer, bis dass er an dr Brofässer Hans Erlenmeyer us Berlin cho isch. 1998 het en dr Rainer Bartels kauft und renowiert. Sit 2005 ghöört er dr Kulturstifdig Bartels Fondation, wo zitgenössischi Kunst in alle Beriich förderet und Künstler Stipändie git und ene gratis Ateliee zur Verfüegig stellt.[4]

Dr Augustinerhoof[ändere | Quälltäxt bearbeite]

Dr Augustinerhoof isch 1379 vom Markgroof vo Baade kauft worde, 1522 het en äine vo sine Noochfolger dr Artistefakultäät vo dr Uni verchauft. Dr Kanton het en 1921 übernoo und 1922 s Chupferstichkabinett dört iigrichdet.[5] Vo 1937 bis 1998 isch s Schwizerische Instidut für Volkskund im Augustinerhoof dehäi gsi, denn het s dr Kanton an e brivate Äigedümer verchauft, wo s Geböid renowiert het.[6]

Dr Augustinerhoof isch e Baasler Kulturguet, wo für d Region vo Bedütig isch.

Bauwärk an dr Augustinergass[ändere | Quälltäxt bearbeite]

Fuessnoote[ändere | Quälltäxt bearbeite]

  1. Merian Basel 1642.jpg
    Die ganz Aasicht vo dr Stadt Baasel vom Merian vo 1642.
  2. Der Brunnen an der Augustinergasse uf altbasel.ch, abgrüeft am 17. Januar 2014
  3. Die Augustinergasse Archivlink (Memento vom 6. Oktober 2013 im Internet Archive) uf basel-virtuell.ch, abgrüeft am 17. Januar 2014
  4. Der »Kleine Markgräflerhof« in Basel (Memento vom 31. Dezämber 2015 im Internet Archive) uf markgraeflerhof-basel.net, abgrüeft am 17. Januar 2014
  5. Karl A. Burckhardt, Festschrift zur Eröffnung des Kunstmuseums, Basel, August 1936, S. 110
  6. Augustinerhof - Basel, Switzerland, Austrian and Swiss National Heritage Sites uf Waymarking.com, abgrüeft am 17. Januar 2014