Werner vo Hombärg
Dr Graf Werner II. vo Hombärg (* 1284; † 21. März 1320 bi Genua) isch e Ridder, Afüerer vom ene Ufgebott vom dütsche König und e Minnesänger gsi.
dr Graf vom Jura
[ändere | Quälltäxt bearbeite]Dr Werner II. vo Hombärg isch us em Gschlächt vo de Grafe vo Frohburg cho. Sin Vatter isch dr Graf Ludwig I. vo Hombärg und syni Muetter d Elisabeth vo Rapperschwil gsi. Ane 1315 het er d Gräfin Maria vo Öttinge ghürootet. Er het zu de Gönner vom Chlooschter Ottebach z Züri ghört.
Vom Erb vo synere Muetter het dr Graf Werner zum Familiepsitz im Jura ane au no Herrschafte im Gebiet vo Schwyz übercho. Er isch wäge dene Güeter in Händel mit de Chlööschter Rychenau, Äinsidle, Sanggale und Pfèèfers und sogar au mit em König Albrecht I. verwicklet gsi. Ane 1303 het er di alti Stammburg vo dr Familie, d Homburg im Sisgau, und d Stadt Lieschtl em Bischof vo Basel verchauft.
dr Rychsridder
[ändere | Quälltäxt bearbeite]Sid em Afang vom 14. Joorhundert het dr Graf vo Hombärg zu de nöchere Dienschtlüüt vom düütsche König Friedrich ghört. Ane 1309 isch er Rychsvogt i dr Innerschwiiz worde. Er isch offebaar imene guete Verhältnis zu de Landlüüte i de Gebiet vo Uri und Schwyz gstande. Im Johr 1313 het em dr düütsch Kaiser dr wichtig Zoll vo Flüelä am Vierwaldstettersee afertrout.
Wo dr König Heinrich VII. 1310 mit emene Rychsheer über d Alpe uf Itaalie ggangen isch, het en dr Graf Werner als Truppefüerer begleitet. Dr Heinrich isch uf dere Fahrt vom Papscht zum Kaiser gchrönt worde. Und jetz het er de Graf us dr Schwiiz grad als oberschte Haupme vo dr Lombardei ygsetzt. Im Dienscht vom Kaiser het dr Hombärger do au d Ufsicht über d Passtroosse im Tessin gha. Er isch denn bis 1314 z Italie gsi und drno über d Alpe zrugg id Heimet ggange. Drufabe isch er im Dienscht vom öschtrychische Herzog Leopold gstande.
Uf emene nöchschte Chriegszug in Süüde isch dr Werner vo Hombärg bi dr Belagerig vo Genua gstorbe.
dr Minnesänger
[ändere | Quälltäxt bearbeite]Vom Graf Werner sind acht Minnelieder überliferet. Die sind im Buech Codex Manesse ufgschribe. Dr Hombärger isch warschynlech öppedie bim Ridder Manesse z Züri z Psuech gsi. Ufe dr Rücksyte vom Blatt 43 vom Manesse-Codex stoot gschribe, dr Werner vo Hohebärg sig dr wichtigscht Minnesänger vo dr Schwiiz gsi. Es Bild vo dere Liederhandschrift zeigt dr Graf Werner wien er dr Kampf umene iteliäneschi Stadt afüert; me könnt en am Wafferock, wo druff s Hombärger Wappe mit de beide Adler, wo über enand flüüget, z gseh isch.
Dr Gottfried Keller schribt übere Werner vo Hombärg i sinere Schrift Hadlaub (1878).
Literatur
[ändere | Quälltäxt bearbeite]- Max Schiendorfer: Die Schweizer Minnesänger. Neu hg. nach der Ausgabe von Karl Bartsch. Bd 1: Texte. Tübingen 1990.
- Wolfgang Schmid : Kaiser Heinrichs Romfahrt. Zur Inszenierung von Politik in einer Trierer Bilderhandschrift des 14. Jahrhunderts. Koblenz 2000, ISBN 3-931014-47-9.
- Georg von Wyss: Graf Wernher von Homberg. Reichsvogt in den Waldstätten Uri, Schwyz und Unterwalden und Reichs-Feldhauptmann in der Lombardei zur Zeit Kaiser Heinrichs VII. Zürich 1860.
Weblink
[ändere | Quälltäxt bearbeite]
Commons: Codex Manesse – Album mit Multimediadateie- Hans Stadler: Homberg, Werner von. In: Historisches Lexikon vo dr Schwiiz.
- Andreas Z’Graggen: Wie ein Minnesänger die Schlacht bei Morgarten auslöste (Site cha nüme abgrüeft wärde; Suche im Webarchiv) , uf luzernerzeitung.ch