Portal:Schwiiz/Einleitung
D Schwiiz (dütsch Schweiz, französisch Suisse, italienisch Svizzera, rätoromanisch Svizra) isch es Land z Europa. D Schwiiz isch vo Länder umgäh, wo zu de Europäische Union ghöre, isch aber - wii au s öschtliche Nachbarland Liechteschtei - keis EU-Mitgliid. D Schwiizer verschtönd sich als Willensnation, des heisst es git kei gmeinsami Schproch und dodermit verbundeni gmeinsami Kultur, wo d Schwiiz zu ere Nation macht. D Schwiizer sind zäme in eme Land, will si des so wei.
D Schwiiz isch in drei grossi Naturrüüm glideret, in d Alpe, s Mittelland und de Jura.
Di 26 Kantön hei e grossi Selbschtändigkeit, wo sich in de Stüürpolitik, in de Schuel und in vilne andre Beriich duet uswirke, mengisch so fescht, dass me di Wahrig vo de unterschidliche Interesse vo de Kantön au abfällig Kantönligeischt nennt.