Louis Moilliet

Us der alemannische Wikipedia, der freie Dialäkt-Enzyklopedy
Hops zue: Navigation, Suech

Dr Louis Moilliet (* 6. Oktober 1880 z Bärn; † 24. August 1962 z Vevey) isch e Schwiizer Künstler gsi. Er isch bekannt worde as Mooler und Glasmooler. Si expressionistische Moolstil isch mit dr Bewegig vom Orphismus verbunde gsi.

Läbe und Wärk[ändere | Quälltäxt bearbeite]

Dr Moilliet het z Düsseldorf, z Weimar und spöter in dr Meisterklass vom Leopold von Kalckreuth an dr Stuttgarter Akademii gstudiert. Er het Studiereise uf Rom (1907) und Tunesie (1908) gmacht. 1909 het er dr August Macke kenneglehrt und isch en änge Fründ von em worde. 1909 bis 1910 isch er wider z Tunesie gsi. 1910 het er d Pianistin Hélène Gobat ghürotet. Im Oktober 1911 het er si Fründ Paul Klee z Münche bsuecht und het dört d Mooler vom «Blaue Reiter», dr Wassily Kandinsky und dr Franz Marc, kenneglehrt. In dere Zit si siini fauvistische Bilder entstande. 1914 isch dr Moilliet mit em Klee und em Macke uf Tunesie gange, wo sich die drei in ihrer Aquarellmoolerei gegesitig inspiriert hai. 1916 isch si Frau gstorbe. Im Summer 1920 het er dr Hermann Hesse im Tessin bsuecht, won en as Vorbild für e Mooler Louis in Klingsors letzter Sommer gnoh het. Er het für e Hesse Text illustriert. Zwüsche 1919 und 1921 isch er in Marokko, Algerie und Tunesie umegreist. In dere Zit isch e grossi Wärkgruppe vo Aquarell entstande. Noch 1923 het er nüme in Öl gmoolt sondern het Aquarell gmacht und Glasfänster bemoolt. D Glasmoolerei isch in de 1930er Johr zu siiner Vorliebi worde.

Vo 1950 aa het dr Moilliet z La Tour-de-Peilz, eme Vorort vo Vevey, gwohnt, won er 1962 im Alter vo 82 Johr gstorben isch.

Litratur[ändere | Quälltäxt bearbeite]

  • Jean-Christophe Ammann: Moilliet, Louis. In: Neue Deutsche Biographie (NDB). Band 17, Duncker & Humblot, Berlin 1994, ISBN 3-428-00198-2, S. 716.
  • Jean-Christophe Ammann: Louis Moilliet, Das Gesamtwerk, DuMont Schauberg, Köln, 1972
  • Klee, Macke, Moilliet: Die Tunisreise. Sonderausgabe, Katalog zur Ausstellung. Hatje Cantz Verlag, Ostfildern 2006, ISBN 978-3-775-70177-8
  • Anna Schafroth: Louis Moilliet 1880–1962. Blick in die Ferne. Benteli Verlag, Bern 2007, ISBN 978-3-716-51488-7

Weblingg[ändere | Quälltäxt bearbeite]