Johann Schneider-Ammann

Johann Schneider-Ammann (2011)

Dr Johann Niklaus Schneider-Ammann (* 18. Februar 1952 z Sumiswald, heimetbrächtigt z Hasle bi Burgdorf) isch e Schwyzer Unternähmer un Bolitiker (FDP). Vo 2010 bis 2018 isch er im Schwyzer Bundesrot gsii.

Läbe

Dr Schneider-Ammann het an dr ETH Züri Elektrotechnik studiert un het 1977 mit em Diplom abgschlosse. Anne 1982/83 het er e Master of Business Administration an dr Schuel INSEAD z Fontainebleau bi Paris erworbe.

Anne 1978 isch er Projäktleiter bi Oerlikon-Bührle worde, 1981 isch er in s Maschinebauunternähme vu dr Familie vu syre Frau Katharina Schneider-Ammann yydrätte, zerscht as Prokurist, syt 1990 as Presidänt vu dr Ammann Group. Syt dr Deilnahm vu dr Ammann Group an dr Sanierig vu dr Mikron Technology Group anne 2003 isch er dert au Presidänt vum Verwaltigsrot. Däm Gremium het er scho dervor as Mitglid aaghert. Syter anne 1998 nimmt er au Yysitz im Verwaltigsrot vu dr Swatch Group, in dr dertige oberschte Muetergsellschaft Swatch Group SA. Syt 1999 presidiert er dr Verband vu dr schwyzerische Maschine-, Elektro- un Metallinduschtri Swissmem; derzue isch er Vizepresidänt vum Wirtschaftsdachverband Economiesuisse.

Anne 1999 isch dr Schneider-Ammann in dr Nationalrot gwehlt wore. In dr Johr 2003 un 2007 isch er widergwehlt wore. Är ghert dr Kommission fir Wirtschaft un Abgabe aa.

Dr Johann Schneider-Ammann isch am 22. Septämber 2010 in dr Ersatzwahl vum Hans-Rudolf Merz näbe dr Simonetta Sommaruga zum neje Bundesrots-Mitglid gwehlt wore. Am 1. November het er sis Amt im Eidgenössische Volkswirtschaftsdepartement (EVD) aaträte. Im 2016 isch er dr Bundespräsident vo dr Schwiiz gsi. Am 25. Septämber 2018 het dr Schneider-Ammann sy Ruggdritt per 31. Dezämber bekannt gee.

Dr Schneider-Ammann isch ghyrote un het zwei Chinder. Är isch Burger vu Hasle bi Burgdorf un wohnt z Langethal.

Weblinks

 Commons: Johann Schneider-Ammann – Sammlig vo Multimediadateie

• Johann Schneider-Ammann uf dr Websyte vo dr Bundesversammlig
• Website von J. N. Schneider-Ammann

Fuessnote

Vorgänger Hans-Rudolf Merz

Mitgliid im Schwiizer Bundesrat 2010–2018

Nochfolgeri Karin Keller-Sutter

Dä Artikel basiert uff ere fräie Übersetzig vum Artikel „Johann_Schneider-Ammann“ vu de dütsche Wikipedia. E Liste vu de Autore un Versione isch do z finde.