Dr Baasler Politiker Wilhelm Klein

Dialäkt: Baseldütsch

Dr Wilhelm Klein (* 7. Oktober 1825 z Baasel; † 12. Mai 1887 z Baasel) isch e Schwizer Politiker gsi.

Dr Wilhelm Klein, zwüsche 1883 und 1887

Biografii

S Familiegraab uf em Friidhoof Wolfgottesacker, Baasel

Dr Wilhelm Klein isch dr Soon vom ene Leerer gsi, wo us Württebärg zuegwandert gsi isch. Er het z Baasel und Berlin studiert. Vo 1848 bis 1861 het er as Leerer an dr Bueberealschuel z Baasel gschafft. Vo 1861 bis 1875 isch er dr Redakter vom «Schweizerischen Volksfreund», em publizistische Sproochroor vo de Baasler Radikaale gsi, wo dr Klein scho jung drzueghöört het. Im Summer 1848 het er d Wuchezitig «Deutscher Zuschauer» vom Gustav Struve uusegee.

Scho in de 1850er-Joor isch er zum füerende freisinnige Politiker vo Baasel worde. Vo 1850 bis 1875 und wider vo 1881 bis 1887 isch er e Baasler Groossroot gsi, und 1862 und 1865 dr Rootbresidänt. Vo 1867 bis 1872 isch er au no Mitgliid vom Chläine Root gsi, vo 1875 bis 1878 und 1881 bis 1887 Regierigsroot. Vo 1863 bis 1878 und vo 1881 bis 1887 isch er im Nazionaalroot gsässe und vom Juni bis Oktober 1881 het er dr Kantoon Baasel-Stadt im Ständeroot verdrätte.

Dr Klein het sich für s schwizerische Fabrikgsetz iigsetzt, wo e Reakzioon uf en Undersuechig vo de Aarbets- und Lääbensverhältniss vo de Fabrikaarbäiter gsi isch, wo katastrofaali Zueständ zäigt het. Das Gsetz het e Normaalaarbetsdaag vo elf Stunde iigfüert, Chinderaarbet verbote und d Haftpflicht vo de Undernäämer bi Umfäll und Bruefschrankhäite greeglet.

Dr Klein isch 1878 zsämme mit em Fridolin Schuler und em Edmund Nüsperli vom Bundesroot zu äim vo de erste drei äidgenössische Fabrikinspekder gweelt worde.

Dr Wilhelm Klein isch 1887 z Baasel gstorbe und uf em Friidhoof Wolfgottesacker z Baasel begraabe. Dr Achilles Schlöth het d Büste uf em Graabstäi vo sim Familiegraab gmacht.

Familie

Im Klein si Schwiigersoon isch dr freisinnig Baasler Politiker Christiaan Roothebärger gsi, wo 1925 en äidgenössische Invalideversicherig (IV) und Alters- und Hinderlasseneversicherig (AHV) het welle iifüere, aber gschiteret isch.

Liddratuur

• Fritz Brändlin, Wilhelm Klein: Regierungsrat des Kantons Basel-Stadt und schweiz. Nationalrat. Ein Lebensbild, Basel 1907.

Weblingg

• Hermann Wichers: Klein, Wilhelm. In: Historisches Lexikon vo dr Schwiiz.