Vorlage:AdW/7
Breisgauer Narrenzunft Freiburg|Brisgauer Narrezumft Friburg
D Brisgauer Narrezumft Friburg (dt. Breisgauer Narrenzunft Freiburg, BNZ) isch d Dachorganisation vu 34 Narrenzimft un em Herreelferrot vu de alemannische Fasnet z Friburg.
Newe de typisch alemannische Stroßefasnet mit eme große Narreschprung am Fasnetsmentig pflegt d Brisgauer Narrezumft au di karnevalistisch Tradition vu de Friburger „fimfte Johreszitt“ un duet e „Kappesitzig“ mit humoristische Biträg veraastalte. D Narrezumft isch in Form vun eme iidraite Verein organisiert. Ihri Mitglidszimft hän im Johr 2014 fascht 2.000 Mitglider, dodrunter 456 Kinder un Jugendligi bis 16 Johr ghet. Oberzumftmeischter vu de BNZ isch de Matthias Moser vu de „Blaue Narre“ (Stand: 2016).
D BNZ isch am 13. April 1934 grindet wore. Si het zum eine d Tradition vum 1888 grindete Carnevalsvereins Freiburg un vu de 1927 grindete Großen Karnevalsgesellschaft furtgfiert, wu im neie Verein ufgange sin, het awer vor allem alemannischi Fasnetsbriich z Friburg welle iifiere. Dodezue sin „Narreneschter“ in de Friburger Stadtdeil grindet wore. D Brisgauer Narrezumft isch 1937 Grindigsmitglid im Verband vu Owerrhinische Narrezimft (V.O.N.) gsii un bildet dem sii „Vogtei Friburg“.