Urban VII.

Dr Urban VII. (* 4. Augschte 1521 as Giambattista (Giovanni Battista) Castagna z Rom; † 27. Septämber 1590 au dert) isch vum 15. bis zum 27. Septämber 1590 Papscht vu dr kadolische Chilche gsii. Wämer vum Stephan (II.) absiit, wu syter 1961 offiziäll nimi as Papscht zellt wird, isch sy Pontifikat s chirzescht in dr Gschicht gsii.

Lääbe

Dr Giovanni Battista Castagna isch e Suhn vum Genues Cosimo Castagna un däm syre Frau, dr Remeri Costanza Ricci, gsii. Är het Zivil- un Chilcherächt an verschidene Universitete z Italie studiert. Beedi Studiegäng het er z Bologna mit eme Doktortitel abgschlosse, isch dermit Doctor iuris utriusque gsii.

Är isch druf in d Dienscht vu sym Unkel drätte, em päpschtlige Legat z Frankrych, em Girolamo Kardinal Verallo. Am 1. Merz 1553 het en dr Papscht Julius III. zum Erzbischof vu Rossano ernännt. Wel er no kai Prieschter gsii isch, isch er am 30. Merz 1553 zum Prieschter un am 4. April 1553 schließli zum Bischof gweit wore.

Dr Papscht Julius III.het en 1555 zum Gouverneur vu Fano gmacht. Dr Papscht Paul IV. bald ruf no zum Gouverneur vu Perugia un Umbria. In syre Aigeschaft as Erzbischof vu Rossano isch er Dailnämer vum Konzil vu Trient gsii.

Anne 1565 ich er päpschtlige Nuntius am Hof vum Philipp II. vu Spanie wore. Wun er uf Itaie retuurchuu isch, het er im Jänner 1573 sy Amt as Erzbischof vu Rossano niderglait. Dr Papscht Gregor XIII. het en im nämlige Johr as päpschtlige Nuntius uf Venedig gschickt.

1578 het en dr Papscht Gregor XIII. as usserordelige Legat uf Köln gschickt, no syre Rugchehr vu Köln het en dr Papscht zum Konsultor vum Hailign Offizium gmacht. Am 12. Dezämber 1583 het en dr Papscht Gregor XIII. schließli zum Kardinal vu San Marcello ernännt.

Unter em Pontifikat vum Papscht Sixtus V. het er seli vyl Yyfluss gwunne; am 19. Novämber 1586 isch er Großinquisitor vum Hailige Offizium wore.

Eso isch s chuu, ass s Konklave ihn am 15. Septämber 1590 zum neie Papscht gwehlt het. Zum Papschtname het er bwusst e Name gnuu, wu lang nimi bruucht woren isch: Scho dr hl. Urban I. isch Remer gsii. Dr Urban VII. isc aber scho in dr Nacht no syre Wahl chrank wore, wellewäg an Malaria, un isch noch eme churze Pontifikat vu nume 12 Däg gstorbe. Är isch in dr Cappella del’ Annunziata vu dr Basilika Santa Maria sopra Minerva vergrabe.

Literatur

Gino Benzoni: Urbano VII. In: Massimo Bray (Hrsg.): Enciclopedia dei Papi. Band 3: Innocenzo VIII, Giovanni Paolo II. Istituto della Enciclopedia Italiana, Rom 2000, S. 222–230 (treccani.it)..
Ytrag in d Catholic Encyclopedia, Robert Appleton Company, New York 1913 (änglisch)

Weblink

Commons: Urban VII. – Sammlig vo Multimediadateie

Castagna, Giambattista, In: Salvador Miranda: The Cardinals of the Holy Roman Church, online uf fiu.edu, Websyte vu dr Florida International University, abgruefen am 27. Mai 2017. (änglisch)
Illustration vu 1627: Urbanus VIII. Pont. Max. (Digitalisat)

Vorgänger	Amt	Nachfolger
Sixtus V.	Papscht 1590	Gregor XIV.

Dä Artikel basiert uff ere fräie Übersetzig vu dere Version vum Artikel „Urban_VII“ vu de dütsche Wikipedia. E Liste vu de Autore un Versione isch do z finde.