Stadtmüsik Ändinge

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen


D Stadtmüsik Ändinge (dt. Stadtmusik Endingen) isch ä Symphonischs Blosorcheschter vu dr Oberstufe vu dr Stadt Ändinge am Kaiserstuehl.

Orcheschter[ändere | Quälltäxt bearbeite]

Guät achtzig Laiemüsiker üs verschidene Altrsklasse spile im Häuptorcheschter. Gspiilt wäre Sinfonischi Orcheschterwerke, sowie Filmmüsik un moderni Funkstickli. Dr Stadtmüsikdirektor isch vu dr Stadt agstellt, wäge däm müsiziärt d Stadtmüsik äu bi viile städtische Veranstaltunge. Termin fir s Johreskonzert isch alliwiil ä Wuch vor Ostere am Palmsamschdig. Üsserdem findet sitt ä baar Johr im Summer ä grosses Freiluftkonzert statt, wu äu Gaschtorcheschter dezue iglade wäre. Agschlosse isch äu e Jugendkapelle un e Vororcheschdr, wu Kinder un Jugendlichi uffs gmeinsam Müsiziere vorbereitet wäre. Beidi wäre äu vum Stadtmüsikdirektor gleitet.

Gschicht[ändere | Quälltäxt bearbeite]

Erschtmols erwähnt isch d'Stadtmüsik anno 1753 wore. Am Afang sin's numme wenig Müsiker gsi, wu kapelleartig mitänander müsiziert hän. Erscht sit dr 1950er Johre isch d'Zahl vu dr Müsiker nooch un nooch gstiige. Anno 1991 het dr Ändinger Stadtrot bschlosse, d'Üsbildung vu junge Müsiker stärker z'ferdere. Demit verbunde isch dia fescht Astellung vun eme Stadtmüsikdirektor gsi. Hit sin iber 150 Kinder in dr Üsbildung vu dr Stadtmüsik.

Anno 2003 het d'Stadtmüsik ihr 250-jähriges Jubiläum gfiirt. Alässlig vu sällem Jubiläum het d'Stadt Ändinge dr Komponischt Jan van der Roost beufftrait, e Jubiläumswerk z'komponiere. S'Stuck Volcano isch am 12. April 2003 unter dr Leitung vum Komponischt in dr Ändinger Stadthalle uruffgfiehrt wore un isch inzwische e beliebts Stuck bi nationale un internationale Wettbewärb. S'Feschtbankett im Jubiläumsjohr isch vum Kabarettischt Matthias Deutschmann moderiert worre. Üsserdem het mer e Internationale Wettbewärb fir Blosorcheschter organisiert. Vorsitzender vu dr Jury isch dr Jan van der Roost gsi.

Präsident vum Orcheschter isch qua Amt dr Ändinger Burgermeischter.

Dirigente[ändere | Quälltäxt bearbeite]

Vu 1928–1960 isch dr Albert Witzenhausen Dirigent vu dr Stadtkapelle gsi. Anno 1960 net dr Johannes Meybrunn üs Hochdorf s'Amt ibernumme un bis anno 1989 gha. Fir e Ibergang isch no dr Helmut Dold Dirigent wore un sit 1991 isch dr Martin Baumgartner Stadtmüsikdirektor.

Vorstand[ändere | Quälltäxt bearbeite]

  • Präsident: Burgermeischter Hans-Joachim Schwarz
  • Stadtmüsikdirektor: Martin Baumgartner
  • Erschte Vorstand: Simone Löffler
  • Zweite Vorstand: Fabian Scherer
  • Rechneri: Sandra Fink
  • Schriftfiehrer: Stefan 'Schääl' Wäldin

Gaschtdirigente[ändere | Quälltäxt bearbeite]

2003 un 2009 isch dr beriehmt belgisch Komponischt Jan van der Roost als Gaschtdirigent biim Johreskonzert awesend gsi un het zamme mit dr Stadtmüsik sinni Stickli Volcano un Ballad fir Bassposune uruffgfiehrt. Anno 2007 war dr eestrichisch Komponischt Otto M. Schwarz in Ändinge. Unter sinere Leitung het d'Stadtmüsik Stickli wie Dragon Fight, Groovin' Around, Funk Attack un Starflash gspiilt.

Konzertreisene[ändere | Quälltäxt bearbeite]

Anno 1982 het d Stadtmüsik die alemannisch Exklave Colonia Tovar in Venezuela bsüecht.

Anno 2008 het d Stadtmüsik ä Konzertreis nooch Japan unternumme. Dia elftägig Volcano-Tour het ihr Name vu dr Uftragskomposition vum belgische Komponischt Jan van der Roost gha, wu äu im Land vu dr ufgängige Sunne uffgfiehrt worre isch.

D Stadtmüsik het Konzert z Inzai, in zwei Schuele z Chigasaki un in ere christliche Maidlischuel z Tokio gä, wu ä Ändinger Orgle het, un ä Doppelkonzert mit em Toshiba Fuchu Wind Orchestra in dr Fuchu Dream Hall. D Stadtmüsik isch s erscht europäisch Laieorcheschter gsi, wu zsämme mit eme fiehrende japanische Werksorcheschter ä Konzert gstaltet het. D Stadtmüsik het ä Partnerschaftsvertrag mit em Inzai Wind Ensemble.

Weblink[ändere | Quälltäxt bearbeite]