Sergius I.

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
dr Sergius I., Darstellig in dr Basilika Sankt Paul vor dr Muure

Dr Sergius I. (* z Palermo; † 7. Septämber 701) isch vu 687 bis zue sym Dood Paapscht gsii.

Lääbe un Wiirke[ändere | Quälltäxt bearbeite]

Dr Sergius isch dr Suhn vun eme Tiberius un isch us ere syrische Emigrantefamilie chuu. Är isch z Palermo uf d Wält chuu un z Sizilie ufgwachse.

Noch em Dood vum Paapscht Konon hän zwee Manne um s Paapschtamt gstritte: dr Erzdiakon Paschalis un dr Erzprieschter Theodor II. S reemisch Volk un dr Klerus hän aber dr Sergius gwehlt, vermuetli am 15. Dezämber 687. Fir sy Zuestimmig zum Amtsaadritt het dr Exarch vu Ravenna, dr Johannes Platys, d Zahlig vu 100 Goldbfund gfoorderet, wun em dr Paschalis versprochen ghaa het.

Dr Sergius het si syner Läbdig fir d Chrischtianisierig vu Ängland yygsetzt. Är het dr weschtsächsisch Cheenig Caedwalla daift, het dr Aldhelm vu Sherborne, dr Abt vu Malmesbury, mit allne Chreft unterstitzt, het dr Ängländer Willibrord zum Bischof gweit un en zum Breedige uf Fryysland gschickt. Är het au d Beziehige zum Frankeryych gfeerderet.

Um 693 het dr Sergius Händel kriegt mit em byzantinische Chaiser Justinian II., wel er si gwaigeret het, d Akte vum Quinisextum z unterschryybe. Zue dr strittige Pinkt hän d Verurdailig vum Paapscht Honorius I. un di protokollarisch Glyychstellig vum Patriarch vu Konstantinopel mit em Paapscht gheert, dernääbe s Verbot vum Samschigfaschte un d Darstellig vum Chrischtus as Agnus Dei gheert. Dr Versuech, dr Paapscht verhafte un uf Konstantinopel verschlaipfe z loo, sch am Widerstand vu dr Milize vu Rom un em Exarchat vu Ravenna gschyteret. Us dr Zyt noo dr Absetzig vum Justinian 695 waißt mer nu no weenig: Dr Sergius isch vylmol unterwägs gwsii un het e Hufe Chilche gweit.

Dr Paapscht Sergius het di chilchli Liturgy uusgstaltet: Dr Gsang vum Agnus Dei isch vu ihm in d Mässliturgy ufgnuuwoore, Di reemische Chilche het er ryych uusschmicke loo un anne 688 het er d Reliquie vum Leo em grooße in s Inner vu dr Petersbasilika iberfiere loo.

Sy kadoolische Maandaag isch dr 8. Septämber, s eerscht Moo gnännt im Feschtkaländer vum Willibrord.

Literatur[ändere | Quälltäxt bearbeite]

  • Vera von Falkenhausen: Sergio I, santo. In: Enciclopedia dei Papi, Band 1; Istituto della Enciclopedia Italiana, Roma 2000, S. 633–637.
  • Matthias Hardt: Sergius I.. In: Biographisch-Bibliographisches Kirchenlexikon (BBKL). Band 9, Herzberg 1995, ISBN 3-88309-058-1, Sp. 1436–1441.

Weblink[ändere | Quälltäxt bearbeite]

 Commons: Sergius I. – Sammlig vo Multimediadateie
VorgängerAmtNachfolger
KononPapscht
687–701
Johannes VI.
Information icon.svg Dä Artikel basiert uff ere fräie Übersetzig vu I.&oldid=187790016 dere Version vum Artikel „Sergius I.“ vu de dütsche Wikipedia. E Liste vu de Autore un Versione isch I.&action=history do z finde.