Paschalis I. (Gegepapscht)

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen

Dr Paschalis I. († 692) isch vum Septämber bis Dezämber 687 (noch ere andere Interpretation bis 692) Geegepaapschtt gsii.

Lääbe un Wiirke[ändere | Quälltäxt bearbeite]

Noch em chuurze Pontifikat vum Paapscht Konon, wu am 21. Septämber 687 gstoorbe gsii isch, het s zwee meegligi Noofolger gee. Dr aint, dr Theodor II., isch scho vor em Pontifikat vum Konon, noch em Dood vum Johannes V., vun ere reemische Militeerbartei zum (Geege-)Paapscht glupft, e baar Wuche speeter aber zue Gunschte vum Konon gheie loo woore. No sällem sym Dood het er wiider sy Aaspruch uf dr Petersdroon aagmäldet.

Geg dr Theodor isch dr Archidiakon Paschalis mit nit ganz suufere Mittel aadrätte. Är het – scho vor s Konons Dood – dr Exarch vu Ravenna, dr Johannes Platys, mit 100 Bfund Gold bstoche, ass dää syni Beamte z Room ghaiße het, fir dr Paschalis z stimme.

D Bartei vum Theodor isch aber schnäller gsii un het waidli di innere Gmäächer vum Lateran bsetzt, derwylscht dr Paschalis un syni Aahänger in dr ussere hän mieße blyybe. Wel kain vu dr beede Kandidate het welle noogee, het mer si, wie bi dr Wahl vum Konon, uf e dritte Kandidat bsunne un boodi Fraktione hän am 15. Dezämber 687 dr Titularprieschter vu St. Susanna, Sergius, zum Noofolger fir dr Paapscht Konon gwehlt.

Dr nei Paapscht isch vu dr reemische Bevelkerig unterstitzt wore, wu dr Lateran gstiirmt un d Bsetzer uusegheit het. Derwylscht dr Theodor sy Niiderlaag akzeptiert het un d Wahl vum Sergius anerkännt het, het dr Paschalis uf sym Aaspruch bstande. Är het versuecht, dr Exarch vu Ravenna uf Room z hoole, un het sällem doderfir nomol 100 Goldbfund versproche. Dr chaiserli Statthalter isch au wirkli uf Room chuu, het si jetz aber fir dr Sergius uusgsproche un dr Paschalis gheie loo. Die 100 Bfund Gold het em jetz dr Sergius zalt.

Hilf- und mittellos het dr Paschalis d Wahl vum Sergius aber ainewäg nit anerkännt un gege sälle intrigiert, bis er as Diakon abgsetzt, as Zauberer aagchlagt un in er Chlooschter verbannt wooren isch. Deert isch er anne 692 gstoorbe, bis zletscht het er uf sym Aaspruch uf d Noofolg vum Konon bstande.

E Geegepaapscht isch dr Paschalis aigetli nume ne baar Moonet gsii. Wel er aber nie sy Aaspruch ufgee het oder zrugdrätten isch, cha mer ihm au ne meejeehrig Pontifikat (687–692) zueschryybe. Mer chaan em au dr Paapschttitel ganz abspräche, wel sy Amtsfierig nit vollständig gsii isch.

Literatur[ändere | Quälltäxt bearbeite]

  • Philippe Levillain: Dictionnaire historique de la Papauté. Fayard, Paris 2003, ISBN 2-213-61857-7
  • Bruno W. Häuptli: Paschalis. In: Biographisch-Bibliographisches Kirchenlexikon (BBKL). Band 24, Nordhausen 2005, ISBN 3-88309-247-9, Sp. 1155–1157.
Information icon.svg Dä Artikel basiert uff ere fräie Übersetzig vu I. (Gegenpapst)&oldid=148726263 dere Version vum Artikel „Paschalis I. (Gegenpapst)“ vu de dütsche Wikipedia. E Liste vu de Autore un Versione isch I. (Gegenpapst)&action=history do z finde.