S Exarchat vo Ravenna

S Exarchat vo Ravenna (mä säit em au s Exarchat vo Italie) isch e oströmische/byzantinische Verwaltigsbezirk z Italie gsi. Dr Kaiser Maurikios het en im Jahr 584 (?) gründet und die zivile Kompetänze vom Pretorianerprefekt und die milidäärische vom magister militum in d Händ vom Exarch gee. S Exarchat vo Ravenna isch bis zu es 751 vo de Langobarde eroberet worden isch, e Bastioon vo dr byzantinische Macht in Italie gsi. Es isch aber nit die äinzigi oströmischi Brovinz in dr westlige Helfti vom antike Imperium gsi. Sizilie het en äigeni Verwaltigsäinhäit bildet; Korsika und Sardinie häi bis 698 zum Exarchat vo Karthago ghöört.

Dr Exarch het alli Gebiet östlig vom Apennin diräkt verwaltet. Die andere Gebiet vom Exarchat si under duces und eme magister militum gstande. D Gfoor für d Oströmer isch vo de Langobarde usgange, wo vo iirer Hauptstadt Pavia us s groosse Daal vom Po kontrolliert häi. S Piemont, d Lombardei, d Festland vo Venetie, d Toskana und s Hinderland vo Neapel häi de Langobarde ghöört. In Rom het sich dr Babst zum Herrscher entwicklet und isch immer unabhängiger worde.

S Exarchat isch vor allem mit lokale Milize gege d Langobarde verdäidigt worde. Die si zerst no Däil vo de kaiserlige Drubbe gsi, si aber immer sälbstständiger worde. Die bewaffnet Bürger häi dr exercitus Romanae militiae bildet und si die färne Vorlöifer vo de freije bewaffnete Bürger vo de italiänische Stedt im Middelalter gsi.

S Exarchat vo Ravenna und mit em d Herrschaft vo Ostrom in Italie isch zum ene Änd cho, wo dr Kaiser Leo III. em Exarch befoole het dr Babst Gregor II. z verhafde oder umzbringe. Dä Aaschlaag isch nid glunge und in Italie isch s zun ere Wälle vo Ufständ gegen e Kaiser cho. 726/727 het sich denn dr letschti Exarch Eutychius mit em langobardische Köönig Liutprand gegen e Babst Gregor verbündet, si häi en aber nid chönne stürze. 729/34 häi denn d Langobarde Ravenna iignoo und dr Eutychius het d Stadt mit dr Hilf vom Babst und de Venezianer chönne zrugggwünne. Im Joor 751 het dr Langobardeköönig Aistulf d Stadt eroberet, und s Exarchat vo Ravenna isch undergange.

Liddratuur

Charles Diehl: Etudes sur l'Administration byzantinischen dans l’exarchat de Ravenne. (568–751). Thorin, Paris 1888 (Bibliothèque des Écoles Françaises d'Athènes et de Rome 53, ISSN 0257-4101) (derzue: Diss. Univ. Paris, 1888).
André Guillou, Filippo Burgarella (Hrsg.): L’Italia bizantina. Dall’esarcato di Ravenna al tema di Sicilia. Utet Libreria, Turin 1988, ISBN 88-7750-126-X.
Ludo Moritz Hartmann: Untersuchungen zur Geschichte der byzantinischen Verwaltung in Italien. (540–750). Hirzel, Leipzig 1889.
Jon R. Martindale: The Prosopography of the Later Roman Empire. Bd. 3, Cambridge 1992.

Weblingg

Francesco Borri: Duces e magistri militum nell’Italia esarcale (VI–VIII secolo). Reti Medievali Rivista, VI - 2005/2 (PDF-Datei; 320 kB).

Dä Artikel basiert uff ere fräie Übersetzig vum Artikel „Exarchat_von_Ravenna“ vu de dütsche Wikipedia. E Liste vu de Autore un Versione isch do z finde.