Theodor II. (Gegepapscht)

Us der alemannische Wikipedia, der freie Dialäkt-Enzyklopedy

Dr Theodor II. isch am Änd vum 7. Johrhundert Gegepaapscht gsii.

Lääbe un Wiirke[ändere | Quälltäxt bearbeite]

Wu dr Paapscht Johannes V. im Augschte 686 gstoorben isch, isch s zue Ussenadnersetzige zwisch em Klerus un Burgermilize chuu. Boodi Fraktione hän si nit chenne ainige uf e gmainsam Kandidat. Dr Stryt het si zuegspitzt un d Militärbartei het dr Theodor zum Paapscht gwehlt. Wu si boodi Fraktionen am 21. Oktober 686 uf dr Konon hän chenne ainige, het d Bartei vu dr Burgermiliz ihre Kandidat Theodor gheiemloo un het dr Wahl vum Konon zuegstimmt. Wu där Ändi Septämber 687 gstooren isch, het dr Theodor syni Aasprich uf dr Paapschtdroon aagmäldet.

Geg dr Theodor isch dr Archidiakon Paschalis mit nit ganz suufere Mittel aadrätte. Är het – scho vor s Konons Dood – dr Exarch vu Ravenna, dr Johannes Platys, mit 100 Bfund Gold bstoche, ass dää syni Beamte z Room ghaiße het, fir dr Paschalis z stimme.

D Bartei vum Theodor isch aber schnäller gsii un het waidli di innere Gmäächer vum Lateran bsetzt, derwylscht dr Paschalis un syni Aahänger in dr ussere hän mieße blyybe. Wel kain vu dr beede Kandidate het welle noogee, het mer si, wie bi dr Wahl vum Konon, uf e dritte Kandidat bsunne un boodi Fraktione hän am 15. Dezämber 687 dr Titularprieschter vu St. Susanna, Sergius, zum Noofolger fir dr Paapscht Konon gwehlt.

Dr nei Paapscht isch vu dr reemische Bevelkerig unterstitzt wore, wu dr Lateran gstiirmt un d Bsetzer uusegheit het. Derwylscht dr Theodor sy Niiderlaag akzeptiert het un d Wahl vum Sergius anerkännt het, het dr Paschalis uf sym Aaspruch bstande. S isch froogli, eb mer en iberhaupt as Geegepaapscht derf wäärte, wel er nie gweit wooren isch.

Iber Theodor waißt mer nyt uuse, ass er zwaimool fascht Paapscht woore wäär. Mer waißt nit emol, in wellem Johr er gstoorben isch.

Literatur[ändere | Quälltäxt bearbeite]

Dä Artikel basiert uff ere fräie Übersetzig vu dere Version vum Artikel „Theodor_II._(Gegenpapst)“ vu de dütsche Wikipedia. E Liste vu de Autore un Versione isch do z finde.