Schloss Kaschtle
| Schloss Kaschtle | ||
|---|---|---|
 | ||
| Entstehigsziit: | 1238 | |
| Erhaltigszuestand: | erhalte | |
| Ort: | Oberflachs | |
| Geografischi Lag: | 47° 26′ 32,6″ N, 8° 7′ 8,9″ O | |
| ||
S Schloss Kaschtle isch es Schloss uf em Gmeindsbann vo Oberflachs im Schwiizer Kanton Aargau. Es ligt uf eme Felsvorsprung am Weschtrand vom Dorf.
Entschtande isch d Burg öppe um 1200 und ligt numme e chli ewäg vo de Burg Schänkebärg. S erschti mol in ere Urkund taucht si im Johr 1238 uf, wo d Schenke vo Kaschtle als Schlossherre gnennt sind. D Kaschteler sind Vasalle vo de Kyburger gsi. Wo d Kyburger im 1264 usgschtorbe sind, hei d Habsburger d Landesherrschaft gerbt und im 1311 sind Kaschtler usgschtorbe. D Herre vo Müline hei Kaschtle und d Nachbarburg Rucheschtei kauft und hei es chlises Herrschaftsgebiet etablirt. Im 1631 het de Johann Ludwig von Erlach beidi Burge kauft und het d Burg Kaschtle ab 1642 in es Schloss laa umbaue. D Schtei vo de Burg Rucheschtei sind dodefür bruucht worde. De Umbau isch sehr tüür gsi und isch erscht 1650 fertig gsi. D Erlacher hei Kaschtle und d Herrschaft, wo dazughört het, öppe hundert Johr schpäter an d Schtadt Bärn verchauft. Uf dem Wäg isch di chlinschti Landvogtei vo der Bärner entschtande, zu dere hei näbe Oberflachs di Dörfer Gaueschtei, Schinznach und Villnachere ghört. Im 1803 isch s Schloss Kaschtle in de Bsitz vom Kanton Aargau cho, wo s Schloss im 1836 an Privati verchauft het. Im 1855 hei d Gebrüder Schmutziger vo Aarau s Schloss chauft und e «Rettigsaastalt für verwaisti und verwahrlosti Zögling» für Reformiirti gründt. Einer vo de Zögling het am 24. Ougschte 1907 s Schloss aazündt. D Aaschtalt het wägem Widerufbau erscht im 1909 wider chönne eröffnet werde. Hüt isch im Schloss Kaschtle es Schulheim für «normal begabti, verhaltensuffälligi Schüeler».
Weblink
[ändere | Quälltäxt bearbeite]
Commons: Schloss Kasteln – Sammlig vo Multimediadateie
