Altes Schloss Bümpliz

Us der alemannische Wikipedia, der freie Dialäkt-Enzyklopedy
Ds Alte Schloss Bümpliz.

Ds Alte Schloss Bümpliz isch es Schloss i der Stadt Bärn im Stadteil Bümpliz i der Schwiz.

Ds Schloss isch im 9. Jahrundert als Holzwehrbou vom Hochburgundische Chönigshof errichet worde. Dä het ds Schloss tu irgendeinisch i Bsitz vo de asäsige Adels- u Patizierfamilie gäh. Der Wassergrabe isch im 11. Jahrhundert boue worde. Im 13. Jahrhundert het me der Steiturm umboue u im 15. Jahrhundert isch ds Schloss erwyteret worde.

1742 het me grad e Steiwurf wyt ewäg vom Alte Schloss Bümpliz, ds Neue Schloss Bümpliz boue. Ds Neue Schloss het tu em Alte Schloss Bümpliz der Name gäh.

1919 isch ds Alte Schloss zum ne Gmeinnützige Gemindshuus umfunktioniert worde. Da isch tu o ds erstemal es Resturant dinne gsi. Zudäm aber ou no e Bibliothek, u e Chindergarde. 1954 het d Stadt Bärn das Geböide gchouft u het's zwüsche 1979 u 1980 la renoviere.

Hüt isch wider es Restaurant dinne. Obeninne isch e Grossen u e Chlynere Saal. Ds Bärner Konservatorium üebt dert obe albe. Usserdäm finde im Grossesaal Konzärt u anderi Aläss statt. Zuesätzlech isch no d Bümplizer Ortsarchiv i däm Schloss.

Louft me vor em Schloss türe, de merkt me nid, das ds Schloss isch renoviert worde. D Front isch zwar renoviert worde, me het aber druuf gachtet, das es nid z modern wird. Sälbscht ds Tor het me erhalte. We me aber dürs Tor louft oder hinder em Schloss düre, de gseht me e grossi Glasfront, wo nid würklech zum Styl vom Schloss passt. Me gseht sofort, das ds Schloss uf dere Syte massiv isch modernisiert worde. D Font ghört übrigens zum Resturant. Der Platz im Bereich vo der Glasfront isch so gross, das ds Resturant problemlos d Gescht cha dussen u dinne bewirte. Da ds Neue Schloss ds Standesamt vo der Stadt Bärn isch, göh vili Paar nach der Trouig i ds Alte Schloss ga ässe.

I diräcker Nachberschaft lyt d Permanos, das isch es chlyners Spital, u die Neuapostolischi Chilche vo Bümpliz. Usserdäm lyt ds Schloss unmittelbar an ere Strass. Dert gits e Böshaltstell, wo me mit der Linie 27 Richig Weyermannshuus Bad oder uf Niderwange cha fahre. Zudäm isch der Bahnhof Bümpliz Nord äbefalls i der Nechi.

Weblink[ändere | Quälltäxt bearbeite]

 Commons: Altes Schloss Bümpliz – Album mit Multimediadateie