Schlacht am Grauholz

Us der alemannische Wikipedia, der freie Dialäkt-Enzyklopedy
Dr letscht Daag vom alte Bärn, Gmäld vom Friedrich Walthard (1818–1870)

In dr Schlacht am Grauholz am 5. Merz 1798 häi sich bärnischi Drubben under em Befääl vom Karl Ludwig von Erlach und e franzöösischi Armee under em General Schaueburg e Schlacht gliiferet, au wenn d Bärner Regierig an däm Zitpunkt scho kapituliert het.

Dr Lauf vo dr Schlacht[ändere | Quälltäxt bearbeite]

D Verdäidiger vo Bärn häi zerst bi Fraubrunne und denn im Grauholz, eme bewaldete Hüügelzug nid wit vo dr Stadt Bärn, erbitterete Widerstand gläistet. E Hufe Fraue, alti Manne und sogar Chinder us dr Landbevölkerig häi sich de kämpfende Bärner Drubbe aagschlosse und brobiert, iiri Stadt vor dr franzöösische Inwasion z schütze.

D Übermacht vo de Franzoose isch grooss gsi, und d Bärner si z Fraubrunne und au im Grauholz gschlaage worde. Dr Erlach het sich mit de Räst vo sinere Armee zruggzooge und ooni Erfolg brobiert, d Franzoose uf dr Schosshalde vor de Door vo Bärn aazhalte.

D Regierig vo Bärn under em Schulthäiss Niklaus Friedrich von Steiger het denn scho kapituliert ghaa und dr ganz Bärner Widerstand isch zämmebroche – drotz em Siig vom General Johann Rudolf von Graffenried bi Nöienegg.

Verzwiifleti Buure, wo glaubt häi, dr General Karl Ludwig vo Erlach häig Bärn verroote, häi dä bi Wichtrach umbrocht, won er uf em Wääg ins Bärner Ooberland gsi isch, zum vo dört us dr Widerstand gege d Franzoose z organisiere.

Gedänke[ändere | Quälltäxt bearbeite]

An d Schlacht am Grauholz erinneret s Grauholzdänkmol, wo 1886 am Grauholz iigweiht worde isch.

Weblingg[ändere | Quälltäxt bearbeite]

Dä Artikel basiert uff ere fräie Übersetzig vum Artikel „Schlacht_am_Grauholz“ vu de dütsche Wikipedia. E Liste vu de Autore un Versione isch do z finde.

Koordinate: 47° 1′ 0″ N, 7° 30′ 0″ O; CH1903: 604666 / 207293