S Gfächt bi Längnau

Us der alemannische Wikipedia, der freie Dialäkt-Enzyklopedy


S Gfächt bi Längnau het am 2. Merz 1798 bi Längnau im Bärner Mittelland zwüsche bärnische und franzöösische Drubbe stattgfunde und het mit eme Siig vo de Franzoose gändet. Si isch Däil vom Franzoseniifall in die Alti Äidgenosseschaft gsi.

Vorgschicht[ändere | Quälltäxt bearbeite]

Dr General Alexis Balthazar Henri Schauenburg (1748-1831).

Am 25. Januar 1798 z Nacht isch e franzöösische Husar wägene eme Missverständnis im waadtländische Thierrens umchoo, und Frankriich het das as Usreed brucht, zum d Waadt z bsetze. Dr General Guillaume Brune, wo dr Ooberbefäälshaaber vo dr franzöösische Helvetische Armee gsi isch, het im General Schaueburg dr Befääl gää, Soledurn z eroobere und eso dr Wääg uf Bärn freizmache.

D Schlacht[ändere | Quälltäxt bearbeite]

Am 2. Merz isch die 15'000 bis 20'000 Maa starki Arme z Längnau aachoo, won e Batallion vo Bärner Milizionär stazioniert gsi isch. Noch eme churze Kampf si d Bärner besigt gsi. Si häi 200 Dooti und Verwundeti ghaa und no öbbe eso vili si gfangegnoo worde. Uf iirem Rückzuug häi si iiri acht Kanone zruggloo.

Uf em Fridhoof z Längnau hets hüt immer no es Monument i Form vomne Obelisk, wo druf stoot: «Den Toten zur Ehr, den Lebenden zur Lehr. 2 März 1798 - 2 März 1898.» Wohrschindli isch es ebe 100 Joor später errichtet worde.

Folge[ändere | Quälltäxt bearbeite]

D Franzoose si witer uf Soledurn marschiert und häi d Stadt am neggste Daag bsetzt. Dr Schaueburg het druf alli Waffe vo de Soledurner lo iisammle.

Bibliografii[ändere | Quälltäxt bearbeite]

  • Jean-Pierre Felber, De l'Helvétie romaine à la Suisse romande, Gämf, 2006
  • Adolphe Joanne, Itinéraire descriptif et historique de la Suisse, Paulin, 1841, 635 p..
  • Archives pour l'histoire de la Suisse, vol. 14, S. Höhr, 1864, 414 p..
Dä Artikel basiert uff ere fräie Übersetzig vum Artikel „Bataille_de_Longeau“ vu de franzöösische Wikipedia. E Liste vu de Autore un Versione isch do z finde.

Koordinate: 47° 10′ 55″ N, 7° 22′ 0″ O; CH1903: 594545 / 225668