Peer Steinbrück

Us der alemannische Wikipedia, der freie Dialäkt-Enzyklopedy
Peer Steinbrück (2013)
Unterschrift vum Peer Steinbrück
Unterschrift vum Peer Steinbrück

Dr Peer Steinbrück (* 10. Jänner 1947 z Hamburg) isch en ehmolige dytsche Bolitiker (SPD). Vu 2002 bis 2005 isch dr Steinbrück Minischterbresidänt vum Land Nordrhy-Weschtfale gsii, vu 2005 bis 2009 Bundesfinanzminischter un Stellverdrätter vum SPD-Bundesvorsitzer. Vu 2009 bis 2016 isch er Mitglid vum Dytsche Bundesdag gsii. Am 9. Dezämber 2012 isch dr Peer Steinbrück vum SPD-Barteidag zum Chanzlerkandidat vu dr SPD fir d Bundesdagswahl 2013 gwehlt wore.[1]

Familie[ändere | Quälltäxt bearbeite]

Dr Peer Steinbrück isch as erschte vu zwee Sihn vum Ernst Steinbrück (1914–1998) un dr Ilse geb. Schäper (1919–2011) z Hamburg uf d Wält chuu[2]. Em Peer Steinbrück sy Mueter chunnt us ere Hamburger Chaufmannsfamilie un het uf dr Muetersyte dänischi Wurzle ghaa. Mitti 1930er Johr, in dr Zyt vum Nationalsozialismus, het si lengeri Zyt bi ihre Verwandte z Dänemark un Schwede verbrocht, go em „Bund Deutscher Mädel“ z entgoh.[3] Dr Vater, Ernst Steinbrück, isch z Pommern uf d Wält chuu un isch z Hamburg Architekt wore. Drot ass dr Vater us dr wytverzwygte, großburgerlige Familie Delbrück stammt, isch dr Peer Steinbrück in burgerlige Verhältnis in eme Mietshuus im dodmol proletarisch bregte Hamburg-Uhlenhorst ufgwachse.[4][5]

Dr Steinbrück läbt im Bonner Stadtdail Plittersdorf[6], derzue het er e Zwaitwohnig z Berlin im Weddinger Sprengelkiez[7]. Är isch syt 1975 ghyrote mit dr Gertrud Steinbrück geb. Isbary (* 1950), ere promovierte Lehreri fir Biology un Bolitik am evangelische Amos-Comenius-Gymnasium Bonn.[8] Si hän zämme ne Suhn un zwoo Dechtere.[9]

Uusbildig[ändere | Quälltäxt bearbeite]

Är isch uf s altsprochli Glehrteschuel vum Johanneum gange, wun er wäge schlächte Note in dr Sekundarstufe I het wider mieße abgoo. Dr Steinbrück isch in syre gsamte Schuelzyt (1953 bis 1968) zwai Mol hocke blibe un het anne 1968 s fachbunde Abitur (Fachrichtig Wirtschaft) an dr Staatlige Handelsschuel Am Lämmermarkt z Hamburg-Hohenfelde gmacht. Dr Steinbrück isch mit achtzeh us dr evangelische Chilchen uusdrätte.[10][11] Är isch speter wider in dr Chilche yydrätte.[12]

Vu 1968 bis 1970 het dr Steinbrück as Soldat uf Zyt (SaZ 2) bi dr Färnmäldeainhait vum Panzerbataillon 314 z Oldenburg-Bümmerstede sy Grundwehrdienscht in dr Bundeswehr un en Uusbildig as Reserveoffizieraawärter vum Heer absolviert.[13] Sy derzytige Dienschtgrad isch Leutnant vu dr Reserve.

Ab em Summersemeschter 1970 het er Volkswirtschaft mit em Näbefach Soziology an dr Christian-Albrechts-Universität (CAU) z Kiel studiert, wu au dr schleswig-holsteinisch FDP-Bolitiker Wolfgang Kubicki zue syne Kommilitone zellt het.[14] S Studium het er anne 1974 as Diplom-Volkswirt abgschlosse.

Beruef vu 1974 bis 1990[ändere | Quälltäxt bearbeite]

Noch em Studium het er 1974 zerscht im Ramme vun eme 15-monetige Wärchverdrag[15] fir s Bundesminischterium fir Ruumornig, Böuwäse un Stadtböu gschafft un ab em Spotjohr 1976 im Effetlige Dienscht im neie Bundesminischterium fir Verchehr, Böu un Stadtentwicklig. Anne 1977 isch er persenlige Referänt vu dr Minischter Hans Matthöfer un Volker Hauff im Bundesminischterium fir Forschig un Technology wore. Fir dr Matthöfer het dr Steinbrück Rede gschribe.[16] Vu Juni 1978 bis zum Februar 1981 het dr Steinbrück as wisseschaftlige Mitarbaiter im hechere Dienscht (offiziäll Hilfsreferent) im Chanzleramt vum Helmut Schmidt gschafft.[17] Är het dert e Stell im Spiegelreferat zum Bundesminischterium fir Forschig un Technology ghaa.[18] Im Johr 1981 het dr Steinbrück in dr Ständige Verdrättig vu dr Bundesrepublik z Oscht-Berlin in dr Abdailig Wirtschaft gschafft. 1981/82 isch er wider persenlige Referänt gsii, desmol vum Bundesforschigsminischter Andreas von Bülow.

Bolitischi Laufbahn[ändere | Quälltäxt bearbeite]

Dr Peer Steinbrück isch anne 1969 in d SPD yydrätte.

Staatssekretär z Schleswig-Holstein[ändere | Quälltäxt bearbeite]

Anne 1990 isch dr Steinbrück as Staatssekretär in d Landesregierig vu Schleswig-Holstein unter m Minischterbresidänt Björn Engholm gwächslet, zerscht in s Minischterium fir Natur, Umwält un Landesentwicklig (bis 1992), derno in s Minischterium fir Wirtschaft, Tächnik un Verchehr (bis 1993).

Landesminischter z Schleswig-Holstein un z Nordrhy-Weschtfale[ändere | Quälltäxt bearbeite]

Am 19. Mai 1993 isch dr Steinbrück zum Minischter fir Wirtschaft, Tächnik un Verchehr vum Land Schleswig-Holstein ernännt wore (Kabinett Simonis I un II). Des Amt het er bis zum 28. Oktober 1998 uusgiebt un isch derno retuur uf Nordrhy-Weschtfale, wun er ab em 28. Oktober 1998 zerscht s Minischterium fir Wirtschaft un Mittelstand, Technology un Verchehr (Kabinett Clement I) un ab em 22. Februar 2000 s Finanzminischterium (Kabinett Clement I un II) glaitet het.

Vu 2000 bis 2005 isch er au Abgordnete im Landdag vu Nordrhy-Weschtfale gsii.

Minischterbresidänt vu Nordrhy-Weschtfale[ändere | Quälltäxt bearbeite]

Am 6. Novämber 2002 isch dr Steinbrück zum Minischterbresidänt vum Landes Nordrhy-Weschtfale gwehlt wore. Är het dodermit d Noofolg vum Wolfgang Clement aadrätte, wu s Amt ufgee ghaa het go Bundesminischter fir Arbet un Wirtschaft z wäre. Wu d SPD mit ihrem Spitzekandidat Steinbrück bi dr Landdagswahl z Nordrhy-Weschtfale 2005 mit 37,1 % uf ihre schlächtscht Ergebnis bi re Landdagswahl z NRW syt 1954 chuu isch un au di Griene Stimme verlore hän, het di rot-grien Koalition ihri Meehait im Landdag verlore. Zum Noofolger vum Steinbrück as Minischterbresidänt isch am 22. Juni 2005 dr Jürgen Rüttgers (CDU) gwehlt wore.

Bundesfinanzminister in dr große Koalition[ändere | Quälltäxt bearbeite]

Am 22. November 2005 isch dr Steinbrück as Bundesminischter vu dr Finanze in di vu dr Bundeschanzleri Angela Merkel gfiert Bundesregierig beruefe wore. In sy Zyt as Finanzminischter isch d Bankekrise 2008/09 as Dail vu dr Wältwirtschaftskrise ab 2007 gfalle. Noch em Zämmebruch vu dr US-amerikanische Bank Lehman Brothers sin au verschideni dytschi Banke in Finanzneet chuu un sin zum Dail dur staatligi Hilf unterstitzt wore. D Rettig vu dr Hypo Real Estate isch as z dyyr kritisiert wore un s het au ne Untersuechigsuusschuss derzue gee.

SPD-Bundestagsabgeordneter 2009 bis 2016[ändere | Quälltäxt bearbeite]

Zue dr Bundesdagswahl 2009 isch dr Steinbrück im Wahlchrais 105 (Mettmann I) as Diräktkandidat fir d SPD aadrätte. Är het am 27. September 2009 dr Kampf um s Diräktmandat mit 33,8 % gege d Michaela Noll (CDU) verlore, wu uf 44,4 % vu dr Stimme chuu isch. Dr Steinbrück isch statt däm derno as Dritte vu dr Landeslischt Nordrhy-Weschtfale zum erschte Mol in dr Bundesdag yyzoge. Am 29. Septämber het dr Steinbrück aagchindet, ass er si im Große un Ganze us dr Spitzebolitik zruckzie wett un het sy Amt as Stellverdrätter vum SPD-Bundesvorsitzer niderglait. Am 27. Oktober 2009 het er er sy Entlassigsurkund as Finanzminischter Iberchuu.

Im Summersemeschter 2011 het dr Steinbrück d Gaschtprofessur fir Bolitikmanagement vu dr Stiftig Mercator an dr NRW School of Governance vu dr Universität Duisburg-Essen iberchuu.[19] Ändi 2011 het er e Honorarprofessur fir Effetligi Finanzwirtschaft un internationali Finanzbolitik an dr Universität Leipzig aagnuu.[20]

SPD-Chanzlerkandidat fir d Bundesdagswahl 2013[ändere | Quälltäxt bearbeite]

Am 1. Oktober 2012 isch dr Steinbrück vum SPD-Barteivorstand aistimmig as Chanzlerkandidat vu dr SPD fir d Bundesdagswahl 2013 nominiert wore.[21] Am 9. Dezämber isch er derno uf em Sunderbarteidag mit 93,45% zum Chanzlerkandidat gwehlt wore.[1]

No dr Bundesddagswahl, wu d SPD verlore het, un dr Bildig vu dr große Koalition unter dr Chanzleri Angela Merkel, het dr Steinbück sy Ruggzug us dr SPD-Spitz aagchindet. Är isch no bis Ändi Septämber 2016 Abgordnete im Bundesdag blibe, derno isch er us dr Bolitik uusgschide.[22]

Uuszaichnige[ändere | Quälltäxt bearbeite]

  • 2006: Georg-Schulhoff-Bryys vu dr Handwärchschammere Düsseldorf
  • 2008: "Politiker des Jahres" (Politik und Kommunikation)
  • 2011: Cicero-Rednerbryys
  • 2011:Ehredokter vu dr Heinrich-Heine-Universitet Düsseldorf (HHU)

derzue

  • 2007: Big Brother Award fir d Yyfierig vum dr läbeslang giltige Styyr-Identifikationsnummere fir alli Yywohner vu Dytschland

Mitglidschafte[ändere | Quälltäxt bearbeite]

  • syt 2010 Ufsichtsrot vu Borussia Dortmund
  • syt Jänner 2010 fir fimf Johr Ufsichtsrot vu ThyssenKrupp
  • syt 2010 Mitglid im Senat vu dr Dytsche Nationalstiftig
  • 2011 Mitglid im Kuratorium vu dr Zeit-Stiftig Ebelin un Gerd Bucerius
  • Mitglid vu dr Chammere fir soziali Ornig in der EKD
  • Stellverdrättende Vorsitzer vu dr Helmut-und-Loki-Schmidt-Stiftig
  • Mitglid in dr IG Bärgböu, Chemy, Energy

Schrifte[ändere | Quälltäxt bearbeite]

Literatur[ändere | Quälltäxt bearbeite]

  • Daniel Friedrich Sturm: Peer Steinbrück, Biografie mit Karikaturen von Heiko Sakurai, Deutscher Taschenbuch Verlag, München 2012, ISBN 978-3-423-24924-9.
  • Uwe-Karsten Heye, Hugo Müller-Vogg: Steinbück oder Merkel? Deutschland hat die Wahl, Quadriga, Berlin 2013, ISBN 978-3-86995-056-3.

Fueßnote[ändere | Quälltäxt bearbeite]

  1. 1,0 1,1 Björn Hengst: SPD-Sonderparteitag: Steinbrück mit 93 Prozent zum Kanzlerkandidaten gewählt. In: Der Spiegel (Onlineausgabe). , abgruefen Format invalid.
  2. Christoph Rybarczyk: Peer Steinbrück trauert um seine Mutter Ilse. Hamburger Abendblatt, 27. September 2011, abgruefen am 27. Februar 2012.
  3. Daniel Friedrich Sturm: Peer Steinbrück, Biografie mit Karikaturen von Heiko Sakurai, Deutscher Taschenbuch Verlag, München 2012, S. 11
  4. Peter Carstens: Groß gewachsen unter kleinen Leuten. Frankfurter Allgemeine Zeitung, 1. Oktober 2012, abgruefen am 15. Mai 2013.
  5. Früh übt sich
  6. Super-Illu Nr. 41/2012 vom 4. Oktober 2012
  7. Olaf Wedekind: "Sozi Steinbrück wohnt jetzt im roten Wedding. B.Z., 26. Mai 2013, abgruefen am 17. Juni 2013. (Site cha nüme abgrüeft wärde; Suche im Webarchiv)[1] [2] Vorlage:Toter Link/www.bz-berlin.de
  8. Dagmar Haas-Pilwat: "Ich mach was ich will - auch als Landesmutter". Welt am Sonntag, 15. Dezember 2002, abgruefen am 27. Februar 2012: „Die stolze Mutter von drei wohlgeratenen Kindern unterrichtet am Amos-Comenius-Gymnasium in Bad Godesberg Biologie und Politik.“
  9. Radiointerview im hessische Rundfunk hr1 Talk vum 15. Mai 2011
  10. Daniel Friedrich Sturm: Steinbrücks katastrophale Jahre in der Mittelstufe. welt.de vom 29. September 2012
  11. Die Welt: Steile Karriere als Parkplatzwächter
  12. Sändig 3nach9, Radio Bremen vum 29. Oktober 2010.
  13. Peer Steinbrück. Abgruefen am 27. Februar 2012 (Vita uf syre Internetsyte).
  14. Kubicki will mit Steinbrück regieren. n-tv, 24. September 2012, abgruefen am 24. September 2012.
  15. Daniel Friedrich Sturm: Peer Steinbrück, Biografie. München 2012, S. 39.
  16. Daniel Friedrich Sturm: Peer Steinbrück, Biografie. München 2012, S. 43.
  17. Artikel: Bühne frei für Schmidt und Steinbrück. In: Frankfurter Rundschau vom 24. Oktober 2011.
  18. Abgeordnetenbiografie auf bundestag.de Archivlink (Memento vom 4. Oktober 2012 im Internet Archive)
  19. Gastprofessur an der NRW School: Peer Steinbrück kommt; stiftung-Mercator.de, 21. März 2011 Archivlink (Memento vom 7. April 2014 im Internet Archive)
  20. Peter Seybold: Honorarprofessor in Leipzig. Steinbrück erklärt die Welt. SPON vum 9. Dezember 2011
  21. Steinbrück einstimmig zum Kanzlerkandidaten nominiert, FAZ, 1. Oktober 2012
  22. Sozialdemokrat außer Dienst: Die letzte Rede des Peer Steinbrück, Süddeutsche, 29. Septämber 2016

Weblink[ändere | Quälltäxt bearbeite]

Dä Artikel basiert uff ere fräie Übersetzig vu dere Version vum Artikel „Peer_Steinbrück“ vu de dütsche Wikipedia. E Liste vu de Autore un Versione isch do z finde.