Parco Nazionale del Locarnese

Us der alemannische Wikipedia, der freie Dialäkt-Enzyklopedy

De planet Parco Nazionale del Locarnese isch es Gebiet vo nazionaler Bedütig im Tessin. 2018 isch er in ere lokale Volchsabstimmig gschiteret.

S Dorf Mosogno im Onsernone-Tal chönnti Tail vom nöije Nazionalpark wärde.

Gschicht[ändere | Quälltäxt bearbeite]

Im Johr 2000 forderet d Pro Natura alli Schwizer Gmainde uf, öber d Schaffig vomene nöije Nazionalpark nochezdänke und stellt en Betrag vo ainere Million Franke för en zwaite Park in Uussicht. D Region Locarnese, da sind doozmol 13 Gmainde vo Locarno und Umgebig gsi (spöter hand e paar vo däne fusioniert), gend e Studie öber d Machbarkait in Uftrag. Im 2002 wird de betroffene Gmainde e entsprächendi Studie för d Schaffig vomene Parco Nazionale del Locarnese öberraicht.

Im Dezember 2005 entschaided d Bürgermaister vo de Täler vom Locarnese, es Parkprojekt z lanciere. De Vorstand vom Parco Nazionale del Locarnese stellt im Februar 2008 300'000 Franke för öpe 15 Pilotprojekt zur Verfüegig. D Gmaind Campo Valle Maggia ziet sich glichzitig us em Projekt zrugg. Im Dezember vom gliiche Johr gend doozmoligi 10 Gmainde «grües Liecht» zum Projekt Parco Nazionale del Locarnese. D Gmaind Cerentino ziet sich Endi 2010 us em Projekt zrugg und d Gmaind Cevio möcht e Bedänkzit. Zum de Verlust vo däne grosse Gebiet im obere Maggiatal wider wett zmache, wärded 2010 di südliche Gmainde Ascona, Brissago, Cavigliano, Losone, Ronco ob Ascona und Verscio is Projekt ibezoge. Im Januar 2011 wird z Bern di nöi Version vom Projekt vorglait. S Projekt Parco Nazionale del Locarnese wird vo de Bundesbehörde im September vom gliiche Johr als offizielle Kandidat ufgno und dodemit wird für d Phase 3 «grües Liecht» ge. I de Zyt bis 2015 wird de Vorstand vom Projekt i Zämenarbet mit allne betailigte Gmainde e Raihe vo konkrete Aktivitäte realisiere. Parallel dezue wird e Satzig för de Park erarbaited, wo dänn de Bevölkerig vo de beträffende Gmainde zur Abstimmig vorglait wird.

Gebiet[ändere | Quälltäxt bearbeite]

S Gebiet vom zuekünftige Park hett sölle 220 km² gross wärde und vo rund 2'000 Lüt bewohnt si. De Park hett verschidnigi Klimazone, vo subtropischem bis zu alpinem Klima, gha und sich vo de Brissago-Insle über Ascona, is Centovalli, Valle Onsernone, Val Rovana (Zaubertal) bis zu de Walsersidlig Bosco/Gurin erstreckt. De tüüfschti Punkt gsii wäär s Ufer vom Langesee mit 193 m und de högschti Punkt s Wandfluhhorn (Pizzo Biala), uf 2'863 m ü. M.

Volchsabstimmig[ändere | Quälltäxt bearbeite]

I de Volchsabstimmig vom 10. Juni isch de Nationalpark aber mit 4279 Jo gäge 4170 Nai gschiteret. Jo gsait hand nu Ascona (59 %) und Bosco/Gurin (54 %), di andere sächs Gmainde, nämli Brissago, Centovalli (am tütlichste: 54,5 %), Losone, Onsernone, Ronco ob Ascona (am kneppschte: nu 1 Nai-Stimm mee as Ja-Stimme) und Terre di Pedemonte, hand «nai» gsait.[1] Alli Gmaindrööt hand de Park zwor understützt, aber schynts hand vil Lüüt Angscht übercho, si chönnted i däm Park nüme so läbe wie vorane.

Varia[ändere | Quälltäxt bearbeite]

Zum de Tessiner Bevölkerig zaige, was e sonen Nazionalpark bedüte chan, isch z Tenero im März 2014 e «Natur»-Uusstellig eröffnet worde. Die Veraastaltig isch de Start vom Jubiläum 100 Johr Schwizerische Nazionalpark.[2]

Weblink[ändere | Quälltäxt bearbeite]

Fuessnoote[ändere | Quälltäxt bearbeite]

  1. D Prozäntzaale us em pro natura magazin 04/2018, S. 25.
  2. Der Nationalpark feiert Jubiläum Sändig «Die Anderen – Les autres – Gli altri – Ils auters» vo Radio SRF 1 vom 22. März 2014.