Ääscheniöörwüsseschafte

Us der alemannische Wikipedia, der freie Dialäkt-Enzyklopedy


D Watt-Dampfmaschine isch e wichdigi Driibfäädere für die industrielli Revoluzioon gsi und understruicht d Bedütig vo dr Technik in dr modärne Gschicht. Das Modäll stoot im Hauptgeböid vo dr ETSIIM vo dr Polytechnische Uniwersidäät Madrid.

As Ääscheniöörwüsseschafte (au Ääscheniöörwääse) wärde die Wüsseschafte bezäichnet, wo sich mit dr Forschig und dr technische Entwicklig oder au Konstrukzioon und dr Brodukzioonstechnik beschäfdige. Drbii wärde naturwüsseschaftligi Erkenntniss mäistens aawändigsorientiert erforscht und braktisch aagwändet.

De äinzelne technische Diszipline säit mä mänggisch spezielli Technologie, zum sä vo dr allgemäine Technologii abzgränze, wo sich mit de allgemäine Brinzip vo dr Technik beschäfdigt.

Übersicht[ändere | Quälltäxt bearbeite]

Die klassische Ääscheniöörwüsseschafte sin s Bauääscheniöörwääse, wo au s Vermässigswääse drzueghöört, dr Maschinebau und d Elektrotechnik. Historisch bedütsam si usserdäm dr Bärgbau, s Hüttewääse (Metallurgii) und s Markschäidewääse. D Archidektuur veräinigt Elimänt vo de Ääscheniöörwüsseschafte mit deene vo dr bildende Kunst. Jüngeri Studiegäng si d Energiitechnik, d Sicherhäitstechnik, Huus- und Geböidtechnik, s Chemiiääscheniöörwääse, d Verfääretechnik, d Umwälttechnik und d Fiinwärktechnik.

Es git Überschniidige zwüsche dene Diszipline, so dass d Übergäng fliessend si. Bsundrigs dütlig wird das bi dr Füsikalische Technik.

S Wirtschaftsääscheniöörwääse kombiniert Wirtschaftswüsseschafte (Bedriibswirtschaftsleere und Volkswirtschaftsleere), Rächtswüsseschafte und äini oder meereri Ääscheniöörwüsseschafte im ene äigene, interdisziplinäre wüsseschaftlige Studium. Äänlifs gältet für dr Studiegang vom Badäntääscheniöörwääse.

Öb d Informatik bzw. dr Däilberiich Software Engineering scho as Ääscheniöörwüsseschaft söll gälte, isch nonig usgmacht.

Litratuur[ändere | Quälltäxt bearbeite]

Dä Artikel basiert uff ere fräie Übersetzig vum Artikel „Ingenieurwissenschaften“ vu de dütsche Wikipedia. E Liste vu de Autore un Versione isch do z finde.