Guadeloupe

**Guadeloupe (971)**
Basisdate
Fahne vo Guadeloupe	Wappe vo Guadeloupe
Amtssprooch	Französisch
Hauptort	Basse-Terre
Flechi	1.628 km²
Iiwohner	383.559 (1. Januar 2020)^[1]
Bevölkerigsdichti	234,9 Iiwohner pro km²
Arrondissements	2
Kanton	40
Gmeinde	32
Präfekt	Jean-Luc Fabre
Presidänt vom Regionalroot	Josette Borel-Lincertin
Presidänt vom Generalroot	Jacques Gillot
Währig	Euro (€) 1 Euro = 100 Cent
Zitzone	UTC-4
Internet-TLD	. gp
Vorwahl	+590
Charte
D Position in dr Karibik
Charte vo de Hauptinsle vo Guadeloupe
Guadeloupe vo dr ISS us fotigrafiert

Guadeloupe [gwaˈdlup], die Iiheimische sägen em au Gwada, isch e Überseedepartement und e Region vo Frankriich. Si bestoht us ere Gruppe vo nüün Insle in de Chliinen Antille innerhalb vo de Insle über em Wind in dr Karibik.

Guadeloupe isch e vollintegrierte Deil vom französische Staat und eso au Deil vo dr Europäischen Union. Zsämme mit Martinique bildet s die Französische Antille.

Geographii

Südlig vo Guadeloupe befindet sich d Insle Dominica, nordwestlig d Insle Montserrat und nordöstlig d Insle Antigua, wo zum Inselstaat Antigua und Barbuda ghört. Öbbe 250 km im Weste lit die unbewohnti venezolanischi Insle Aves.

Guadeloupe bestoht us acht bewohnte und no meh chliine unbewohnte Insle.

Die beide Hauptinsle si Basse-Terre und Grande-Terre, wo dur e schmale Meeresarm, wo an dr ängste Stell öbbe 50m breit isch, vonenander drennt si. Grad drnäbe lige die bewohnte Insle Marie-Galante und La Désirade, die zwei chliine, unbewohnte Îles de la Petite Terre und die chliini Inselgruppe vo de Îles des Saintes, wo zwei bewohnti und siben unbewohnti Insle umfasst.

Bis 2007 hai d Insle Saint-Barthélemy und dr französischi Deil vo dr Insle Saint-Martin as Arrondissement Saint-Martin-Saint-Barthélemy zu Guadeloupe ghört. Die lige öbbe 200 km nördlig vo de Hauptinsle. Im Februar 2007 si die beiden Insle vo Guadeloupe abdrennt und zu zwei eigene überseeische Gebietskörperschafte (collectivités d’outre-mer) ufgwärtet worde.

Basse-Terre isch vulkanisch mit Bärg im Landesinnere, Grande-Terre isch relativ flach und bestoht hauptsächlig us Chalchstein. Dr Ursprung vo de meiste vo de andere Insle isch vulkanisch. Dr höchst Punkt isch d Soufrière mit 1.467 m über NN, wo en aktive Vulkan isch.

S Klima isch vo subtropische Tämprature dur Passatwind und vo moderater Feuchtigkeit kennzeichnet. Vom Juni bis zum Oktober bestoht d Gfohr vo Hurrikane.

D Landflechi bestoht zu 14 % us Aabauflechi, zu 4 % us Duurkulture, zu 14 % us Weideflechene und zu 39 % us Wälder.