Gero Herr

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen

Dr Gero Herr (* 2. Augschte 1953 z Offeburig; † 11. Mai 2011 z Fryybeg) isch e dytsche Lehrer, Liedermacher un Sänger gsii.

Uusbildig un Beruef[ändere | Quälltäxt bearbeite]

Dr Gero Herr isch im Orteberger Ortsdail Käferschberg ufgwagse. No dr Schuel het er an dr Universitet Fryybeg Germanischtik, Bolitischi Wisseschafte un Volkskund studiert un het mit dr Lehramtsbriefig fir beruefligii Schuele abgschlosse.

Noch em Studium het er siibe Johr as Fachreferänt fir d Altehilf bim DRK-Landesverband vum Badische Rote Chryz gschafft un het näbehär no Bedriibswirtschaft studiert. Anne 1991 isch er zue dr Stiftigsverwaltig Fryybeg un isch dert as Stellverdrättende Stiftigsdirektor zueständig gsii fir s Personal un d Organisation vu Yyrichtige vu dr Alte- un Jugedhilf.

Vum Spotjohr 2006 bis zue syym Dood 2011 het er as Lehrer an dr Sonderschuel "Schubs" gschafft, ere Modellyyrichtig fir Erziehigshilf vu dr Waisehuusstiftig Fryybeg.

Alemannischi Lieder[ändere | Quälltäxt bearbeite]

In dr Region isch dr Gero Herr bekannt wore as Liedermacher, wu zue dr Gitarre alemannischi Lieder gsunge het. Näbe aigene het er au Lieder vu andre alemannische Liedermacher gsunge, derzue het er alemannischi Gedicht un Aphorisme gsammlet, wun er bi syyne Ufdritt zwische dr Lieder vordrait het.

Brogramm
  • Badisch Rotgold: Rundrais dur di alemannische Sprochlandschafte mit Lieder, Sprich, Gedicht, Anekdote un Gschichte vum Gero Herr sälber un vu andre Liedermacher un Dichter (z. B. Uli Führe, Gälfiäßler, Martin Schley, Mani Matter, Roger Siffer, Gerhard Jung).
  • S'Eige zeige - LIEDriges / Mund- und UnARTiges: Aigeni Lieder un mit alemannische Text unterlaiti Rock-, Folk- un Bluesmusik us dr 60er- un 70er-Johr.
  • Lieder gegen den Tritt: Bolitischi Broteschtlieder vum Buurechrieg bis zue dr Gegewart.

Sunschtigs[ändere | Quälltäxt bearbeite]

Dr Gero Herr isch ghyrote gsii un het zwai Chinder ghaa. Mit syre Frau het er z Hasle gwoont.

Im Johr 2008 het er bi dr Burgermaischterwahl z Orteberg kandidiert. Bi dr Wahl het er 16,6 % vu dr Stimme iberchu.

In dr Käferschberger Bloosmusik-Band "Montenegriner" het er 25 Johr lang Tenorhorn und Gitarre gspiilt.

Är isch vu 1992 bis 2008 Chraisvorsitzende vum Chraisverband Fryybeg/Bryysgau-Hochschwarzwald vum Paritätische Wohlfahrtsvernad (DPWV) gsii.

Weblink[ändere | Quälltäxt bearbeite]