Fritz Stehlin

Us der alemannische Wikipedia, der freie Dialäkt-Enzyklopedy
Dialäkt: Baseldütsch
Der Fritz Stehlin.

Dr Fritz Stehlin (* 25. Septämber 1861 z Baasel, † 6. Dezämber 1923 z Baasel) isch e Baasler Archidekt gsi. Er isch dr Nöwöö vom Archidekt Johann Jakob Stehlin em Jüngere.

Lääbe und Wärk[ändere | Quälltäxt bearbeite]

Dr Fritz Stehlin isch as Soon vom Politiker Karl Rudolf Stehlin z Baasel uf d Wält khoo. Si Brueder Hans Georg isch bekannt drfür, ass er die fossili Süügersammlig vom Naturhistorische Museum Baasel usbaut het. Si Brueder Karl isch e liberal-konservative Baasler Politiker und wääred Joorzäänte Vorstand vo dr Historische und Antiquarische Gsellschaft z Baasel gsi, und vo 1895 bis 98 Bresidänt vo dr Schwizerische Gsellschaft für d Erhaltig vo historische Kunstdänggmööler.

Dr Fritz Stehlin isch mit dr Helene Bavier, dr Dochder vom Simeon Bavier, verhürootet gsi. Si Dochder, d Maja Sacher, isch e groossi Kunst-Mäzenin vo dr Stadt Baasel gsi,[1] wo under anderem d Emanuel Hoffmann-Stifdig gründet het.

Vo 1881 bis 82 isch er uf d Ecole d'architecture z Bariis gange, denn bis 1887 uf d Ecole des Beaux-Arts z Bariis. 1888 het er im Büro vo sim Unggle Johann Jakob Stehlin afo schaffe und, wo dä 1894 gstorbe isch, het er d Firma in dr Dradizion vo dr Archidektefamilie Stehlin witergfüert. Fast alli Geböid vom Stehlin si im Stiil vom Nöibarock baut. Er het e Hufe Willene baut, under anderem 1891–92 und 1893–94 Ängelgass 79 und 77, Baasel; 1901 Zum nöije Kettihoof, Dalbe-Vorstadt 72, Baasel; 1903 dr Pfäffigerhoof am Sevogelblatz. Au chliini schlössliartigi Aalaage häi zu sine Brojekt ghöört wie s Schloss Pfäffige 1896–1900 und Industriibaute (1903–21 Verwaltigs- und Fabrikbaute für d Ciba Klybeck, Baasel) und Woonhüüser für Arbäiter (1919–20 Horburgstrooss, Baasel, wo abgrisse worde isch).[2] Er het dr Aabau an Muusigsaal, dr Hans-Hueber-Saal, 1904/05 noch de Entwürf vo sim Unggle usgfüert und d Wanddekorazione im groosse Muusigsaal fertig gmacht, wo s Gäld für sä 1876 nid glängt het.[1]

Vo 1901 bis 1903 het er mit em Emanuel La Roche s De-Wette-Schuelhuus z Baasel baut. Si Muusigschuel an dr Lienerdstrooss us em Joor 1903 existiert hüte no.[1] 1907–09 het er s alte Stadttheater wider härgstellt, wo 1904 aabebrennt isch.[2]

Vo 1905 bis 1823 isch dr Stehlin Bresidänt vom Aarbetsusschuss vo dr Bürgerhuus-Kommission für d Veröffentligung vo dr Räije "Das Bürgerhaus in der Schweiz" gsi.[2]

Fuessnoote[ändere | Quälltäxt bearbeite]

  1. 1,0 1,1 1,2 Heimatschutz Basel, Mai 2012, Mitteilungsblatt No 112. Archiviert vom Original am 25. Dezember 2018; abgruefen am 30. November 2019.
  2. 2,0 2,1 2,2 Romana Anselmetti: Stehlin, Fritz. In: Historisches Lexikon vo dr Schwiiz.