Dr Hans-Hueber-Saal
Koordinate: 47° 33′ 15″ N, 7° 35′ 25,5″ O; CH1903: 611426 / 267061
| Dialäkt: Baseldütsch |
Dr Hans Hueber-Saal isch dr chliinst Saal im Baasler Stadtcasino am Stäinebärg 14.
Dr Saal isch noch em Komponist Hans Hueber benennt und het öbbe 540 Blätz. Er wird für Kammerkonzärt, chliini Solistekonzärt, Vordrääg, Daagige und Apéro benützt. Vo de Muusigliebhaber wird er für si usgezäichneti Akustik gschetzt.
Er isch 1891 vom Archidekt Johann Jakob Stehlin em Jüngere entworfe worde, wo au dr Archidekt vom Muusigsaal nääbedraa gsi isch. D Blään, wo im Johann Jakob Stehlin si Nöwöö, dr Fritz Stehlin, noch em Dood vo sim Unggle umgsetzt het, si im brivate Stehlin-Archiv ufbewaart. Dr Fritz Stehlin het sich genau an dr Entwurf ghalte, aber bi dr Innedekorazion vom Saal het er e freiji Hand gha, wil s drfür käini Blään gee het. Er het d Usstattig ganz äifach ghalte und eso gseet dr chlii Saal vil modärner us as dr grooss Muusigsaal, won er sim Unggle sini alte Entwürf umgsetzt het, wil 1876 nid gnueg Gäld drfür übrig bliibe isch.[1]